YAP-ın sədr müavini Polşa Prezidenti dəftərxanasının beynəlxalq əlaqələr departamentinin rəisi, nazir Mariuş Handzliklə görüş keçirmişdir

Yeni Azərbaycan Partiyasının sədr müavini-icra katibi, Milli Məclisin deputatı Əli Əhmədov aprelin 28-də Polşa Prezidenti dəftərxanasının beynəlxalq əlaqələr departamentinin rəisi, dövlət katibinin müavini, nazir Mariuş Handzlik ilə görüşmüşdür.

Polşa ilə Azərbaycan dövlətləri arasında münasibətlərin strateji xarakter daşıdığını vurğulayan M.Handzlik Azərbaycan Prezidenti İlham Əliyevin səyləri nəticəsində bu əlaqələrin daha da genişləndiyini qeyd etmişdir. Azərbaycanın ərazi bütövlüyünün Polşa tərəfindən daim dəstəkləndiyini deyən nazir ölkəmizin Polşa üçün regionda ən mühüm tərəfdaş dövlət olduğunu qeyd etmişdir.

Əli Əhmədov Azərbaycan-Polşa əlaqələrinin daim ölkə Prezidenti İlham Əliyevin diqqət mərkəzində olduğunu bildirmiş və bu münasibətlərin getdikcə daha da inkişaf və dərinləşməsi naminə Yeni Azərbaycan Partiyasının səylərini əsirgəməyəcəyini xüsusi qeyd etmişdir.

Görüşün sonunda nazir Mariuş Handzlik Polşa Respublikasının Prezidenti Lex Kaçinskinin səmimi salamlarını Azərbaycanın dövlət başçısı İlham Əliyevə çatdırmağı xahiş etmişdir.

AzərTAc

Azərbaycan.-2009.- 30 aprel.-S.2.