Onun səmərəli keçməsi
üçün Sumqayıtda hər cür şərait var
Yay gələndə
Sumqayıtda da dəniz sahillərinə gələnlərin
sayı artır. Gündüzlər işdə olanlar
axşam vaxtı dəniz sahillərinə, bağ və
parklarda gəzintiyə çıxmağa üstünlük
verirlər.
Ümumiyyətlə,
asudə vaxtını səmərəli keçirmək istəyən
vətəndaşlar üz tutduqları istirahət yerlərində
təmizliklə qarşılaşanda, zövq oxşayan mənzərələrlə
üzləşəndə həmin ərazilərə dəfələrlə
gəlirlər.
Nəsimi adına
Sumqayıt şəhər mədəniyyət və istirahət
parkı 1967-ci ildən fəaliyyət göstərir. 80 hektar
ərazisi var. Parkın direktoru Çingiz Allahverdiyev bildirdi
ki, ərazidə yeddi mexaniki attraksion
quraşdırılıb. Böyüklərlə
yanaşı, balacalar üçün də ayrıca əyləncə
mərkəzləri yaradılıb. Bu da onların sərbəst
istirahət etmələrinə şərait yaradır. Burada
istirahət günlərində (yayda hər gün)
yaradıcılıq sərgiləri, kitab günləri,
şeir müsabiqələri, viktorinalar keçirilir. Uşaqlar
da belə tədbirlərin iştirakçısına
çevrilirlər. Bunlardan əlavə, bir neçə yerdə
stolüstü oyunlar üçün texniki avadanlıqlar
quraşdırılıb .
- Yay gələndən
tədbirlərimiz də çoxalıb, - müsahibim
sözünə davam edir, - bura çoxu, demək olar, ailəliklə
gəlir. Gənclərin vətənpərvərlik tərbiyəsinə,
hüquq və dövlətçilik ənənələrinə
həsr olunmuş kütləvi tədbirlər keçiririk. İştirakçılar
əsasən gənclər olur. Şəhər
hüquq-mühafizə orqanları ilə birlikdə yayda hər
həftə təşkil olunan "Sumqayıt gəncləri
narkomaniyaya yox deyir!" devizi altında keçirilən tədbir
xüsusi yer tutur.
Parkda yerləşən
yay klubu kütləvi tədbirlərin keçirildiyi əsas
yerdir. Ç.Allahverdiyev onu da bildirdi ki, açıq səma
altında olan həmin kluba Bakıdan tanınmış
musiqiçilər, müğənnilər, aktyorlar dəvət
olunur. Konsertlər Sumqayıtın "Dünya" televiziya
şirkəti vasitəsilə birbaşa yayımlanır. Hətta
tamaşa etməyə gələnlər arasında
istedadı olanlar səhnəyə çıxır,
çıxış edirlər.
Proqramda gənc ailələrə
aid tədbirlər xüsusi yer tutur. Məsələn,
parkdakı "Göyərçin" abidəsinin yanında
qeyd edilən "Cəmiyyət və gənc ailə"
adlı tədbirdə milli-mənəvi dəyərlərə
əsaslanan sual-cavab, musiqi nömrələri, yeməyin
sürətlə və keyfiyyətlə hazırlanması
kimi yarışlar keçirildi. Tədbirdə şəhər
icra hakimiyyətinin başçısı Vaqif Əliyev və
ictimaiyyətin nümayəndələri
çıxış edərək gənc ailələrə
xoş arzularını bildirdilər. Sonda qaliblərə hədiyyələr
verildi.
Yay
mövsümünün sonunadək bir neçə bu
mövzuda tədbirin keçirilməsi nəzərdə
tutulub.
Ümumiyyətlə, təkcə
yay aylarında deyil, ilin bütün fəsillərində mavi
Xəzərin sahilində yerləşən Sumqayıtın
istirahət parklarında, xiyabanlarında axşamlar qələbəlik
olur. Əhali istirahət və mədəniyyət parkında
keçirilən rəngarəng tədbirlərə,
yaradılan şəraitə görə əlaqədar təşkilatlardan
həmişə razılıq edir.
Akif ƏLİYEV
Azərbaycan.- 2009.- 2 avqust.- S. 6.