AzərTAc ilə KUNA agentliyi arasında saziş imzalanmışdır

Bu vaxtadək Asiya və Sakit Okean Ölkələri Xəbər Agentlikləri Təşkilatı (OANA) çərçivəsində əməkdaşlıq edən AzərTAc və KUNA indən belə birbaşa əlaqə saxlayacaq, informasiya və təcrübə mübadiləsi aparacaqlar.

Sazişə əsasən, tərəflər öz ölkələrində baş verən hadisələrin işıqlandırılmasında bir-birinə kömək göstərəcək, müntəzəm xəbər mübadiləsi edəcək, aldıqları xəbərləri öz dövlətlərinin ərazisində yayacaqlar.

AzərTAc-ın baş direktoru Aslan Aslanovun və KUNA-nın Direktorlar Şurasının sədri və baş direktor Şeyx Mübarək Duaic İbrahim əl-Sabahın imzaladıqları sənəddə dövlət başçılarının, rəsmi nümayəndə heyətlərinin qarşılıqlı səfərləri zamanı informasiya dəstəyinin təmin olunması, agentliklərin əməkdaşlarının peşə fəaliyyətinə aid məşğələlərin təşkili və s. nəzərdə tutulur. Tərəflər, həmçinin öz dövlətlərinin ərazisində bir-birinin müxbirlərinə lazımi imkanlar yaratmağı öhdələrinə götürmüşlər.

Bundan başqa, AzərTAc və KUNA xəbər bülletenləri, kitablar və özlərinin fəaliyyətinə aid digər materiallar mübadiləsinin mümkünlüyünü nəzərdə tuturlar.

Azərbaycan həqiqətlərinin dünya informasiya məkanında daha geniş yayılmasını təmin etmək üçün Avropanın və Asiyanın müxtəlif ölkələrinin aparıcı xəbər agentlikləri ilə birbaşa əlaqələrin qurulması və bu əməkdaşlığın daha da genişləndirilməsi AzərTAc-ın fəaliyyətinin üstün istiqamətlərindən biridir. Dünyanın ən nüfuzlu agentliklərindən biri olan KUNA ilə imzalanmış saziş də bu baxımdan faydalı olacaqdır.

Azərbaycan.- 2009.- 5 avqust.- S. 4.