Azərbaycan güləşçisi Həsən Əliyev dünya çempionu olmuşdur

Ankarada güləş üzrə gənclər arasında dünya birinciliyinə start verilmişdir. İlk yarış günü döşək üzərinə çıxan 3 yunan-Roma güləşçimizdən 2-si medal qazanmışdır. 60 kq çəki dərəcəsində yarışan son Avropa birinciliyinin qalibi Həsən Əliyev dünyanın da ən güclüsü olduğunu sübut etmişdir.

Mübarizəyə 1/16 final mərhələsindən başlayan güləşçimiz ilk qarşılaşmada rumıniyalı Razvan Motoyu (1:1, 7:0), 1/8 finalda misirli Əli Məhəmmədi (7:2, 6:0), 1/4 finalda isə gürcüstanlı Arçil Turmanidzeni məğlubiyyətə uğratmışdır (1:0, 0:1, 4:0). Finala çıxış uğrunda Həsənin rəqibi İran təmsilçisi Abuza Nurzadə olub ki, o da idmançımızın qarşısında duruş gətirə bilməmişdir (3:0, 5:0).
Dünya çempionu adı uğrunda Həsən Əliyev türkiyəli güləşçi, ötən il dünya birinciliyinin qalibi olmuş Rəhman Bilici ilə qarşılaşmışdır. Yeri gəlmişkən qeyd etmək lazımdır ki, Həsən iyulda Tbilisidə keçirilən Avropa birinciliyinin yarımfinalında adıçəkilən güləşçini təmiz qələbə ilə məğlubiyyətə uğratmışdır. Gərgin keçən final görüşünün 1-ci hissəsində idmançımız çətin qələbə qazansa da (2:1), 2-ci hissədə daha inamlı təsir bağışladı (6:1) və Avropa çempionluğunun ardınca dünya çempionluğunu da bayram etmişdir.

Medal qazanan digər idmançımız isə 50 kq çəkidə yarışan Avropa birinciliyinin bürünc mükafatçısı Xurşud Babaşovdur. 1/16 finalda iranlı Məhəmməd Qodrini (2:0, 0:2, 3:0), 1/8 finalda isə gürcü Zurab Matçaraşvilini məğlub edən (1:0, 0:1, 5:0) Xurşud 1/4 finalda qazaxıstanlı Artur Umbetkaliyevə uduzmuşdur. Rəqibin finala çıxması güləşçimizin təsəlliverici görüşlərdə iştirakına şərait yaratmışdır. Amerika Birləşmiş Ştatlarının idmançısı Maks Novrini məğlub edən təmsilçimiz (6:0, 1:0) dünya birinciliyinin bürünc medalı uğrunda qırğızıstanlı Həsən Süleymanovla qarşılaşmışdır. 1-ci hissədə güləşçimiz 1:2 hesabı ilə uduzsa da, 2-ci yarıda inamla müdafiə olunaraq aktivinə bir xal yazıb və ümumi hesab bərabərləşmişdır. Həlledici hissədə isə Xurşud 2-1 hesablı qələbə qazanmaqla dünya birinciliyinin bürünc medalını əldə etmişdir.

96 kq çəki dərəcəsindəki təmsilçimiz Səbuhi Hümbətov isə ilk qarşılaşmada iraqlı Əli Qasımı məğlub etsə də (2:0, 6:0), ikinci görüşdə Rusiya güləşçisi İslam Maqomedova uduzmuşdur (0:1, 0:2). Rusiya təmsilçisinin yarımfinalda kubalı güləşçiyə məğlubiyyəti isə Səbuhini medal şansından məhrum etmişdir.

Beləliklə, ilk yarış gününü Azərbaycan yığma komandası 1 qızıl və 1 bürünc medalla başa vurmuşdur.

Bu gün daha 3 güləşçimiz - 55 kq-da Orxan Əhmədov (Avropa çempionu-2009), 66 kq-da Rüstəm Əliyev və 84 kq-da Murtuza Tağıyev (Avropa ikincisi-2009) dünya birinciliyinin medalları uğrunda yarışacaqlar.

AzərTAc

Azərbaycan.- 2009.- 6 avqust.- S. 6.