ATƏT Dağlıq Qarabağ münaqişəsinin tezliklə həll olunması üçün səylərini əsirgəməyəcəkdir

ATƏT Dağlıq Qarabağ münaqişəsinin tezliklə həll olunmasi üçün səylərini əsirgəməyəcəkdir.

Bunu ATƏT-in sədri, Yunanıstanın xarici işlər naziri xanım Dora Bakoyanni Azərbaycanın xarici işlər naziri Elmar Məmmədyarovla telefon danışığında demişdir.

Xarici İşlər Nazirliyindən bildirmişlər ki, D.Bakoyanni və E.Məmmədyarov münaqişənin həlli ilə bağlı aparılan son danışıqlar prosesini və növbəti görüşləri müzakirə etmişlər.

Ermənistan-Azərbaycan, Dağlıq Qarabağ münaqişəsinə dair ölkəmizin mövqeyini ATƏT-in sədrinə çatdıran nazir E.Məmmədyarov vurğulamışdır ki, problem yalnız Azərbaycanın ərazi bütövlüyü çərçivəsində həll olunmalıdır.

Bundan əlavə, telefon danışığı zamanı Azərbaycan ilə ATƏT arasında münasibətlər, eləcə də regionda baş verən proseslər müzakirə edilmişdir.

AzərTAc

Azərbaycan.- 2009.- 7 avqust.- S. 1.