Prezidentin mətbuat xidmətinin məlumatı

Azərbaycan Respublikasının Prezidenti İlham Əliyev avqustun 7-də "Qarabağ" futbol komandasının baş məşqçisi Qurban Qurbanova telefonla zəng etmiş, "Qarabağ" komandasının Finlandiyanın "Honka" komandasını məğlub edərək avroliqanın 4-cü mərhələsinə çıxması münasibətilə təbrik etmişdir.

Komandanın Ağdam şəhərindən olmasının və Qarabağın adını daşımasının xüsusi əhəmiyyətini vurğulayan dövlətimizin başçısı komanda üzvlərinin tam əksəriyyətinin Azərbaycan vətəndaşlarından ibarət olmasının və məşqçinin yerli kadr olduğunun önəmini qeyd etmişdir. Prezident İlham Əliyev "Qarabağ" komandasının əvvəlki mərhələdə də güclü futbol komandasına qalib gəldiyini vurğulayaraq bildirmişdir ki, bütün bunlar Azərbaycanın böyük futbol potensialına malik olduğunu göstərir. Dövlətimizin başçısı qələbə münasibətilə bütün komanda üzvlərini bir daha təbrik etmiş, onlara yeni qələbələr arzulamışdır.

Komandanın baş məşqçisi Qurban Qurbanov təbrikə görə dövlət başçısına minnətdarlıq etmişdir. Azərbaycan idmanına, o cümlədən "Qarabağ" futbol komandasına göstərdiyi diqqət və qayğıya görə Azərbaycan Prezidentinə komandanın üzvləri adından minnətdarlığını bildirən baş məşqçi bu diqqət və qayğıya layiqli oyunları ilə cavab verəcəklərini bildirmişdir.

Azərbaycan.- 2009.- 8 avqust.- S. 1.