Nikolay Ontsyanu: Azərbaycanda tətbiq olunan təcrübə istənilən Avropa ölkəsinə nümunə ola bilər

Buxarest şəhərinin 2-ci sektorunun meri Nikolay Ontsyanu Talassemiya Mərkəzi, Nərimanov rayonundakı Uşaq psixo-nevroloji mərkəzi və Akademik Zərifə Əliyeva adına uşaq bağçası ilə tanışlıqdan sonra jurnalistlərlə öz təəssüratlarını bölüşmüşdür.

Talassemiya Mərkəzinin dünya standartlarına cavab verdiyini, texniki təchizat və tibbi heyətin peşəkarlığı baxımından ən məşhur tibb mərkəzləri ilə rəqabət aparmaq gücündə olduğunu söyləyən mer demişdir: "Mən hesab edirəm ki, siz belə bir tibbi mərkəzlə fəxr edə bilərsiniz".

Heydər Əliyev Fondunun və ölkə rəhbərliyinin səhiyyəyə, o cümlədən uşaqların sağlamlığına göstərdiyi diqqətə valeh olduqlarını bildirən rumıniyalı qonaq Uşaq psixo-nevroloji mərkəzinin və uşaq bağçasının ən müasir avadanlıqla təchiz olunduğunu qeyd etmişdir.

"Təəssüratlarıma əsasən deyə bilərəm ki, Prezident İlham Əliyev səhiyyəyə böyük diqqət və qayğı göstərir", - söyləyən Nikolay Ontsyanu dövlətin həm iqtisadi, həm mədəni sahələrə sərmayə qoymaqla yanaşı, vətəndaşlarının sağlamlığına da böyük diqqət göstərməsini təqdirəlayiq hal kimi qiymətləndirmişdir.

Nikolay Ontsyanu Heydər Əliyev Fondunun prezidenti Mehriban xanım Əliyevanın təşəbbüsü ilə təhsil, səhiyyə və digər sahələrdə bir sıra iri layihələrin həyata keçirildiyindən də danışmışdır.

Mer sonda demişdir: "Mən hesab edirəm ki, bu üç müəssisədə tətbiq olunan təcrübə istənilən Avropa ölkəsinə nümunə ola bilər".

Azərbaycan.- 2009.- 9 avqust.- S. 3.