Latviya Prezidentinin xanımı Beynəlxalq Muğam Mərkəzi ilə tanış olmuşdur

Azərbaycanda rəsmi səfərdə olan Latviya Prezidenti Valdis Zatlersin xanımı Lilita Zatlere avqustun 10-da Beynəlxalq Muğam Mərkəzində olmuşdur.

Latviya Prezidentinin xanımına dənizkənarı Milli Parkda yerləşən mərkəz haqqında ətraflı məlumat verildi.

Xanım Lilita Zatlere qaval daşlarına maraqla baxdı.

Bildirildi ki, Heydər Əliyev Fondunun milli mənəvi dəyərlərimizin qorunması və dünyada geniş təbliği ilə bağlı reallaşdırdığı layihələr sırasında xüsusi əhəmiyyəti olan bu mərkəzin inşası Fondun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyevanın təşəbbüsü ilə həyata keçirilmişdir. 2005-ci il aprelin 6-da Prezident İlham Əliyev Bakıda Beynəlxalq Muğam Mərkəzinin yaradılması haqqında sərəncam imzalamışdır. Azərbaycan muğamının bəşər mədəniyyətinin nadir inciləri ilə bir sırada YUNESKO-nun dünya qeyri-maddi mədəni irs siyahısına daxil edilməsi onun nə dərəcədə bənzərsiz sənət növü olduğunu bir daha təsdiqləyir.

Mərkəz ilə yaxından tanış olan xanım Lilita Zatlere burada Azərbaycanın görkəmli muğam ifaçılarının büstlərinə baxdı və ona musiqi alətləri barədə ətraflı məlumatlar verildi.

Latviya Prezidentinin xanımı beynəlxalq muğam müsabiqəsinin laureatı Vəfa Orucovanın ifasında Azərbaycan muğamlarını dinlədi.

Sonra hörmətli qonağa Heydər Əliyev Fondunun təşəbbüsü ilə çap edilmiş "Qarabağ xanəndələri" albomu, "Azərbaycan musiqi alətləri" kitabı və Bakıda keçirilmiş "Muğam aləmi" Beynəlxalq festivalının diskləri təqdim edildi.

Xanım Lilita Zatlere də Beynəlxalq Muğam Mərkəzinə "Latviya klassik musiqi albomu"nu və bu ölkədə 4 ildən bir keçirilən beynəlxalq musiqi festivalının diskini hədiyyə etdi.

AzərTAc

Azərbaycan.- 2009.- 11 avqust.- S. 4.