Böyüməkdə
olan nəslin sağlam və yüksək ideallar ruhunda tərbiyəsi
Azərbaycan dövlətinin prioritet məqsədlərindəndir.
Bu gün anaların iqtisadiyyatda, sosial sferada, ictimai həyatda
daha böyük uğurlar qazanması, sərbəst, rahat və
problemsiz fəaliyyət göstərməsi xeyli dərəcədə
körpələrə, məktəb yaşlı uşaqlara
yaradılan yüksək səviyyəli şəraitlə
şərtlənir.
İmkanlı təşkilatlar
və idarələr öz işçilərinin qayğısına
qalarkən ilk növbədə balacaları nəzərə
alır, onların sağlam böyüməsi, hərtərəfli
inkişafı üçün bütün mümkün tədbirləri
görürlər. Dövlət Neft Şirkətində
olduğu kimi.
Dövlət Neft
Şirkəti Sosial İnkişaf İdarəsi Təlim, tədris
və sertifikatlaşdırma departamenti baş direktorunun birinci
müavini Dünyamalı Pənahov bildirir ki, hazırda
şirkətin balansındakı 41 bağçada 3300 uşaq
sözün əsl mənasında böyük həyata
hazırlanır. Körpə fidanların əməyə
alışdırılması, istedadlarının üzə
çıxarılması, xarici dil öyrənməsi
üçün bu müəssisələrdə hər
cür şərait var.
Departamentin məktəbəqədər
uşaq müəssisələri şöbəsində
çalışan yüksək səviyyəli mütəxəssislər,
pedaqoji işin incəliklərindən yaxşı baş
çıxaran tərbiyəçi müəllimlər,
uşaqlara əsl ana nəvazişi göstərən dayə
və aşpazlar gələcəyin sağlam və bilikli vətəndaşlarının
yetişdirilməsində bacarıqlarını əsirgəmirlər.
Neftçi
balalarının təlim-tərbiyəsi bağça
kollektivlərinin bugünkü işi olsa da, gələcəyə
hesablanmış uğurlu strategiyanın tərkib hissəsidir.
Bütün uşaq tərbiyə müəssisələrində,
xüsusən "Zanbaq"da, "Turac"da, "Günəş"də
məhz bu cür düşünürlər. Bu
bağçaların müdirlərindən tutmuş dayə
köməkçisinə kimi hər kəs anaların
etibarını və etimadını doğrultmağı
özünün birinci dərəcəli vəzifəsi
sayır.
Azərbaycan.- 2009.- 11 avqust.- S. 5.