Mətyu Brayzə: "Dağlıq Qarabağa dair danışıqlar prosesi əlverişli mərhələdədir"

Mətyu Brayzə ATƏT-in Minsk qrupunun amerikalı həmsədri kimi keçirdiyi son mətbuat konfransında demişdir: "ATƏT-in Minsk qrupu çərçivəsində Dağlıq Qarabağa dair danışıqlar prosesi əlverişli mərhələdədir". Diplomat əlavə etmişdir ki, münaqişənin tezliklə tənzimlənməsi həm ABŞ-ın, həm də Azərbaycanın maraqlarına uyğundur. Brayzə vurğulamışdır ki, onun həmin vəzifədə olduğu dövrdə ABŞ-Azərbaycan münasibətləri daha da möhkəmlənmişdir.

M.Brayzə demişdir ki, həmsədr vəzifəsində onu zəngin təcrübəyə və yüksək peşəkar keyfiyyətlərə malik olan bir şəxs əvəz edəcəkdir. Brayzə vurğulamışdır ki, Prezident Obamanın administrasiyası bu vəzifəyə yeni namizədin münaqişə tərəflərinin hər ikisini qane etməsi üçün lazım olan hər şeyi edəcəkdir, çünki bu region və xüsusən Azərbaycan Birləşmiş Ştatlar üçün strateji əhəmiyyət kəsb edir.

M.Brayzə demişdir: "Birləşmiş Ştatlar ilə Azərbaycan arasında dostluq və tərəfdaşlıq münasibətləri mövcuddur. Təhlükəsizliyin qorunması və terrorizmə qarşı mübarizə sahələrində hər iki ölkənin maraqları eynidir".

Amerikalı həmsədr bildirmişdir ki, Azərbaycan Avropaya enerji nəqlinin şaxələndirilməsinin təmin edilməsində lider ölkələrdən biridir.

AzərTAc

Azərbaycan.- 2009.- 13 avqust.- S. 4.