Azərbaycan vətəndaşı bp-yə rəhbərliyi işlərin həlledici dövründə qəbul edir

Ölkə Prezidenti İlham Əliyev hələ 1996-cı ildə, ARDNŞ-in birinci vitse-prezidenti vəzifəsində çalışdığı zaman çıxışlarının birində demişdir ki, vaxt gələcək, ən iri neft-qaz layihələrində işçilərin 90 faizdən çoxu Azərbaycanın öz vətəndaşları olacaq.

bp-də də belə deyirdilər. Dünya şöhrətli şirkət bu məqsədə doğru addım-addım irəliləyirdi. Ölkəmizdə bp-nin əməliyyatçılıq etdiyi neft-qaz yataqlarının işlənməsi, hasilat və ixrac layihələrində çalışan Azərbaycan vətəndaşlarının sayı aydan-aya artırdı. Neft mövzusunda yazan jurnalistlər bp-nin təşkilatçılığı ilə işlərin getdiyi obyektlərə səfər edərkən bunun əyani şahidi olurdular.

Səngəçal terminalında genişləndirmə proqramı həyata keçirilərkən tikintidə Qaradağ rayonunun ətraf yaşayış məntəqələrinin, eləcə də qaçqın və məcburi köçkünlərin məskunlaşdığı "Ümid" qəsəbəsinin yüzlərlə sakini burada özünə iş yeri tapmışdı.

Eyni mənzərə Heydər Əliyev adına Bakı Dəniz Özüllər Zavodunda da müşahidə olunurdu. "Azəri-Çıraq-Günəşli" yataqları üçün platformalar inşa olunan zaman burada işçilərin 80 faizdən çoxu Azərbaycan vətəndaşları idi.

Heydər Əliyev adına Bakı-Tbilisi-Ceyhan neft kəməri çəkilərkən xətt boyu kənd və bölgələrin sakinləri işə cəlb olunmuşdular. bp-nin digər obyektlərində - Bibiheybətdəki ATA ("Azfen-Tekfen-AMEK") tikinti-quraşdırma sahəsində, Zığda, "Şahdəniz" üçün inşa edilən TPC-500 platformasının tikildiyi ərazidə də belə idi. İşçilərin 70-75 faizi, bəzən daha çox hissəsi yerli sakinlərdən ibarət olurdu.

Layihələri həyata keçirən mütəxəssislər arasında da Azərbaycan vətəndaşlarının sayı getdikcə artırdı. bp-nin qarşıya qoyduğu aydın məqsəd və götürdüyü uğurlu start onunla nəticələndi ki, artıq yerli vətəndaşlar şirkətin rəhbərliyində özlərinə yer tutmağa başladılar. Baş mütəxəssislər, şöbə müdirləri, platforma menecerləri vəzifəsinə azərbaycanlı mütəxəssislər irəli çəkildilər. Nəhayət, bir neçə il əvvəl "bp Azərbaycan" şirkətinin vitse-prezidenti vəzifəsini ölkəmizin öz vətəndaşı icra etməyə başladı.

Bu, Rəşid Cəmil oğlu Cavanşirdir və indi o, "bp Azərbaycan" şirkətinin prezidenti təyin olunub. Gələn ayın 1-dən R.Cavanşir öz yeni vəzifəsinin icrasına başlayacaq.

Rəşid Cavanşir bu vəzifədə TNK-bp-nin baş əməliyyat direktoru təyin olunmuş Bill Şreyderi əvəz edəcək. O, "bp Azərbaycan" şirkətinə rəhbərlik edən ilk Azərbaycan vətəndaşı olacaq. R.Cavanşirin rəhbərlik edəcəyi işlər bp-nin Azərbaycan və Gürcüstandakı bütün fəaliyyətindən, həmçinin Türkiyədəki ixrac əməliyyatlarından ibarət olacaq. Şirkət Azərbaycan vətəndaşının rəhbər vəzifəyə təyin edilməsini özünün milli kadrlarla bağlı planının uğurlu nəticəsi hesab edir. Bu planın əsas məqsədi yerli işçilərin inkişafına şərait yaratmaqla fəaliyyətin bütün sahələrində onların rəhbər vəzifələri tutmasına nail olmaqdır.

bp-nin axtarış-kəşfiyyat və hasilat üzrə baş icraçı direktoru Əndi İnqlis belə deyir: "Rəşid bu vəzifəyə Xəzərlə bağlı dərin geoloji və texniki bilgilərini və ötən 14 il ərzində bp-dəki təcrübəsindən toplanmış geniş biznes perspektivini gətirir. O, bp-nin Azərbaycandakı işlərinə rəhbərliyi elə həlledici bir vaxtda öz üzərinə götürür ki, irəlidə "Şahdəniz"in işlənməsinin ikinci mərhələsi durur, həmçinin "Şəfəq" və "Asiman" strukturlarının axtarış-kəşfiyyat işləri də hələ qabaqdadır".

Rəşid Cavanşir vitse-prezident kimi Azərbaycan, Gürcüstan və Türkiyədə bp-nin bütün qurudakı əməliyyatlarına, Bakı-Tbilisi-Ceyhan neft kəməri, qaz ixrac edən Cənubi Qafqaz Boru Kəməri və "Şahdəniz" layihəsinə, xüsusilə onun ikinci mərhələsinin həyata keçirilməsi ilə bağlı işlərə rəhbərlik edirdi.

Xatırladaq ki, onun bp-də müxtəlif vəzifələrdə 14 illik iş təcrübəsi var. İndiyədək R.Cavanşirin tutduğu vəzifələr bunlar olub: "Amoko Kaspian Si" şirkətinin axtarış-kəşfiyyat işləri üzrə direktoru, "İnam" əməliyyat şirkətinin prezidenti, "Şahdəniz", "İnam" və "Araz-Alov-Şərq" üzrə Hasilatın Pay Bölgüsü sazişlərinin prezidenti, Londondakı Qlobal Biznes Mərkəzində bp qrupu strategiyasının işlənməsi üzrə rəhbər, Aberdində (Şotlandiya) bp-nin Şimal dənizinin cənub hissəsindəki əməliyyatları üzrə vitse-prezidenti, "BTC Ko" şirkətinin prezidenti, "bp Azərbaycan" şirkətinin qurudakı əməliyyatları üzrə vitse-prezidenti.

Rəşid Cavanşir həmçinin beynəlxalq miqyasda tanınmış alimdir. O, 200-dən artıq elmi əsərin müəllifi, geologiya-mineralogiya elmləri doktoru, professor, Azərbaycan MEA-nın müxbir üzvüdür.

Rəşid Cavanşir həmçinin beynəlxalq səviyyədə biznes rəhbərliyi və idarəçiliyi üzrə də ixtisaslaşıb. O, ABŞ-ın tanınmış Dyuk və Rays universitetlərinin və Harvard Biznes Məktəbinin yüksək səviyyəli biznes rəhbərləri üçün nəzərdə tutulmuş proqramlarını bitirib.

Hazırda bp-nin Azərbaycandakı ofislərində, eləcə də hasilat və ixrac obyektlərində əsasən azərbaycanlılar çalışır. Bu işlərə məhz Azərbaycan vətəndaşının rəhbərlik etməsi isə daha çox söz deyir: mütəxəssislərimizin zəngin təcrübəyə malik neft ölkəsinin övladları olduğunu təsdiqləyir, ən müasir dünya standartları səviyyəsində layihələri həyata keçirməyi, hətta bu işlərə rəhbərlik etməyi bacardıqlarını sübut edir.

F.SADIQLI

Azərbaycan.- 2009.- 14 avqust.- S. 4.