Milli Məclisdə görüş

Görüşdə spiker qonağı ölkəmizdə səfir təyin olunması münasibətilə təbrik edərək, ona diplomatik fəaliyyəti dövründə Azərbaycan-İran münasibətlərinin daha da inkişaf etdirilməsi naminə fəaliyyətində uğurlar arzuladı. Bildirildi ki, xalqlarımız arasında mövcud olan tarixi, mədəni bağlılıq iki ölkə arasında dostluq əlaqələrinin gələcək inkişaf perspektivlərinə nikbinliklə baxmağa əsas verir.

Milli Məclisin Sədri qeyd etdi ki, iki ölkə arasında əməkdaşlığın inkişafında dövlət başçılarının qarşılıqlı səfərləri mühüm rol oynamışdır. Azərbaycan ilə İran arasında bugünədək 90-dan artıq sənəd imzalanmışdır. İranla siyasi, iqtisadi, ticari və mədəni əlaqələrin daha da inkişaf etdirilməsi xalqlarımızın ümumi mənafeyinə xidmət edir. Azərbaycan-İran Dövlətlərarası Müştərək Komissiyası iqtisadi əlaqələrimizin inkişafına dəyərli töhfələr verir. Bu gün kənd təsərrüfatı, maşınqayırma, kimya, yüngül sənaye, turizm sahələrində əməkdaşlığın daha da dərinləşdirilməsi üçün geniş imkanlar mövcuddur.

Söhbətdə Sədr vurğuladı ki, münasibətlərimizin inkişafında parlamentlərarası əlaqələrin rolu böyükdür. Təqdirəlayiq haldır ki, hər iki ölkənin qanunvericilik orqanlarında dostluq qrupları fəaliyyət göstərir. Deputatlarımızın qarşılıqlı səfərləri, müxtəlif beynəlxalq qurumlarda görüşləri bu sahədə əməkdaşlığın möhkəmləndirilməsi baxımından önəmlidir.

Görüşdə Sədr Azərbaycanın ən ağır problemi olan Dağlıq Qarabağ münaqişəsində İranın dövlətlərin ərazi bütövlüyü, sərhədlərin toxunulmazlığı prinsiplərinə sadiq qalaraq, BMT və İKT təşkilatları çərçivəsində Azərbaycanın mövqeyini dəstəkləməsini yüksək qiymətləndirdi. Spiker ümidvar olduğunu bildirdi ki, İran gələcəkdə də bu mövqedən çıxış edəcəkdir.

Səmimi qəbul üçün minnətdarlığını bildirən səfir Azərbaycanda diplomatik fəaliyyəti dövründə ölkələrimizarası münasibətlərin daha da inkişaf etməsi üçün səylərini əsirgəməyəcəyini bildirdi.

Qonaq İranın Azərbaycanla həyatın müxtəlif sahələrində əməkdaşlığa böyük maraq göstərdiyini vurğuladı. Bildirildi ki, bu gün iqtisadi, mədəni, humanitar sahələrdə əldə edilmiş nailiyyətlərin gələcəkdə daha da artırılması üçün lazımi şərait mövcuddur.

Söhbətdə Azərbaycan-İran əməkdaşlığının gələcək inkişaf perspektivləri, parlamentlərarası əlaqələrin genişləndirilməsi və tərəfləri maraqlandıran digər məsələlər ətrafında fikir mübadiləsi aparıldı.

Milli Məclisin

Mətbuat xidməti

Azərbaycan.- 2009.- 15 avqust.- S. 2.