"Sərhədlərimizin keşiyində" mövzusunda müsabiqəyə yekun vurulmuşdur

Avqustun 14-də Dövlət Sərhəd Xidmətinin (DSX) Heydər Əliyev Elmi Araşdırmalar Mərkəzində Sərhəd Qoşunlarının yaradılmasının 90 illik yubleyinə həsr olunmuş "Sərhədlərimizin keşiyində" mövzusunda müsabiqəyə yekun vurulmuşdur.

Bu münasibətlə keçirilən mərasimdə çıxış edən DSX rəisinin müavini, general-mayor Məhəmməd Abbasquliyev ölkəmizdə yaradıcılıq üçün əlverişli şəraitin olduğunu vurğulayaraq bildirmişdir ki, ümummilli lider Heydər Əliyev mədəniyyət və incəsənət işlərinə həmişə qayğı ilə yanaşmış, onların əməyini yüksək qiymətləndirmişdir.

M.Abbasquliyev Silahlı Qüvvələrin Ali Baş Komandanı, Prezident İlham Əliyevin də yaradıcı insanlara göstərdiyi diqqət və qayğıdan danışmışdır.

Rəis müavini qeyd etmişdir ki, Dövlət Sərhəd Xidmətinin çoxsahəli fəaliyyətində hərbi vətənpərvərlik tərbiyəsi, Vətənə, onun sərhədlərinə məhəbbət hissinin gücləndirilməsi prioritet sahələrdəndir. Bu istiqamətdə həyata keçirilən tədbirlər sırasında müxtəlif yaradıcılıq müsabiqələrinin təşkili xüsusi yer tutur. Hər il olduğu kimi, bu il də Sərhəd Qoşunlarının yaradılmasının ildönümü münasibətilə "Sərhədlərimizin keşiyində" mövzusunda kino sənəti, musiqi yaradıcılığı, təsviri sənət, foto sənəti və inşa yazısı üzrə 5 nominasiyada müsabiqə elan edilmişdir. Müsabiqədə ölkəmizin peşəkar və həvəskar rəssamları, bəstəkarları, tələbələri, sərhədçi əsgərlər, sərhədçi zabit və gizirlərin ailə üzvləri, sərhədyanı rayonların ümumtəhsil məktəblərinin şagirdləri iştirak etmişlər.

Bildirilmişdir ki, yaradıcılıqla məşğul olan insanlar müsabiqəyə böyük maraq göstərmişlər. Ümumiyyətlə, müsabiqələrdə 600 nəfərdən çox yaradıcı insan iştirak etmişdir.

Müsabiqəyə musiqi yaradıcılığı üzrə 15, təsviri sənət üzrə 40, kino sənəti üzrə 10, foto sənəti üzrə 9 və sərhədyanı kənd ümumtəhsil məktəblərinin yuxarı sinif şagirdləri arasında inşa üzrə yüzlərlə iş təqdim olunmuşdur. Bu əsərlərin janrları da, müəlliflərin yaş, təhsil, peşəkarlıq səviyyəsi və sosial mənşəyi də müxtəlifdir. Əsərlərin ən yaxşıları münsiflər heyəti tərəfindən seçilmiş və mükafatlara layiq görülmüşdür.

Yazıçılar Birliyinin sədri, xalq yazıçısı Anar, Bəstəkarlar İttifaqının katibi Ramiz Zöhrabov, xalq artisti Rasim Balayev, bəstəkar Eldar Mansurov qalibləri təbrik etmiş, onlara yaradıcılıq uğurları arzulamışlar.

Çıxış edənlər bildirmişlər ki, ölkəmizin çoxsaylı vətəndaşının öz yaradıcılıq duyğularını sərhədlərimizə, sərhəd mövzusuna yönəltməsi, sərhəd və sərhədçilər haqqında fikir ifadə etməyə çalışması yüksək qiymətə layiqdir.

Sonra qaliblərə mükafatlar təqdim olunmuşdur.

AzərTAc

Azərbaycan.- 2009.- 15 avqust.- S. 4.