Maliyyə hesabatlarının auditi və bu sahədə şəffaflıqla bağlı
seminar-müşavirə
keçirilmişdir
Azərbaycan Auditorlar
Palatasında Qiymətli Kağızlar üzrə Dövlət
Komitəsi ilə birgə "Azərbaycan Respublikasında
maliyyə hesabatlarının auditi və şəffaflıq"
mövzusunda seminar-müşavirə keçirilmişdir.
Sərbəst auditorlar və
auditor təşkilatlarının nümayəndələri
üçün təşkil edilmiş tədbirdə
Auditorlar Palatasının sədri, professor Vahid Novruzov
mövzunun aktuallığından və əhəmiyyətindən
danışmışdır. Bildirmişdir ki, ölkəmizdə
həyata keçirilən islahatların mühüm bir istiqaməti
də iqtisadiyyatda və bütövlükdə cəmiyyətdə
şəffaflığın təmin edilməsidir. Bu istiqamətdə
bir sıra vacib dövlət proqramları qəbul edilmiş və
Prezident İlham Əliyevin rəhbərliyi altında həmin
proqramlar uğurla həyata keçirilməkdədir. Azərbaycan
Respublikası Prezidentinin 2007-ci il 28 iyul tarixli sərəncamı
ilə təsdiq edilmiş "Şəffaflığın
artırılması və korrupsiyaya qarşı mübarizə
üzrə Milli Strategiya"da maliyyə hesabatlarının
auditi və şəffaflığın təmin edilməsi və
bu sahədə beynəlxalq standartların ölkəmizdə
tətbiqi məsələləri ön plana çəkilmişdir.
Bununla əlaqədar Auditorlar Palatası Qiymətli
Kağızlar üzrə Dövlət Komitəsi ilə
birlikdə bugünkü seminar-müşavirəni
keçirir. Azərbaycan müəssisələri həqiqətən
də dünya iqtisadiyyatına inteqrasiya etmək istəyirsə,
bu istiqamətdə özlərinə layiqli tərəfdaş
tapmaq üçün ilk növbədə maliyyə
hesabatlarını beynəlxalq standartlara uyğun aparmalı,
bunun da əsasında iqtisadiyyatımızda şəffaflığın
təmin olunmasına nail olmalıdırlar.
Tədbirdə "Azərbaycan
Respublikasında mühasibat uçotu qanunvericiliyi və maliyyə
hesabatlarının auditi", "Səhmdar cəmiyyətlərinin
maliyyə hesabatlarının cari vəziyyəti: problemlər
və inkişaf istiqamətləri", "Auditor təşkilatlarında
mütərəqqi mühasibat uçotu proqramlarının tətbiqi"
və "Maliyyə şəffaflığının təmin
edilməsində auditin rolu" mövzularında məruzələr
dinlənilmişdir.
Sonda məruzələr
ətrafında müzakirələr aparılmış,
iştirakçıların sualları
cavablandırılmışdır.
AzərTAc
Azərbaycan.- 2009.- 15 avqust.- S. 2.