Tovuzçay vadisini Heydər
Əliyev seyrangahı bəzəyir. Bura şəhərin
giriş qapısıdır. Baxdıqca adamı valeh edir. Bir
yanda Olimpiya idman kompleksi tikilir, bir tərəfdə
yaşıllıqlar qoynunda istirahət parkı
salınır. Ortada ucalan Qala kompleksi isə ötənləri
yada salır, rayonun ulu tarixindən xəbər verir. Pillələr,
şəlalələr, fəvvarələr göz
oxşayır. Başda - ən uca zirvədə isə
müstəqil ölkəmizin üçrəngli bayrağı
dalğalanır. Tovuz haqqında ilk təəssürat, bax, bu
yaraşıqlı seyrangahda yaranır.
Ətrafı milli
ornamentli bədii görkəmli dayaq barılar bəzəyir. Şəhəri
iki yerə bölən enli, abad magistral göz işlədikcə
uzanır. Hər yanda müasir işıqlandırma sistemi
qurulub. Minlərlə ağac, gül kolu əkilib. Gözəllikdən
doymur ürək. Qədim bir diyarın canlı tarixi olan
karvansara tipli qala kompleksi gəl-gəl deyir. Bura əsl turizm mərkəzidir.
Ölkə üzrə ən yüksək göstərici
Keçən il Tovuzda
294,4 min ton kartof istehsal edilib. Bu, ölkə üzrə ən
yüksək göstərici sayılır. Cari il 7745 hektar sahədə
məhsul yetişdirilib. Bəzi yerlərdə artıq
yığıma başlanılıb. Kartof boldur.
Mütəxəssislər
deyirlər ki, bu il azı 340 min ton məhsul gözlənilir.
Rayonda ənənəvi
təsərrüfat sahələrinin bərpasına xüsusi
fikir verilir. Son vaxtlar üzüm bağlarının sahəsi
477 hektara çatıb. Üzüm və meyvə bolluğu
ilə əlaqədar Aşağı Quşçu kəndində
və Qovlar qəsəbəsində 4 soyuducu kamera istifadəyə
verilib. Rayonda daha 2 min tonluq yeni
anbar tikilir.
Tovuzda iqtisadiyyat aybaay,
ilbəil yüksəlir. Cari ilin 6 ayı ərzində
ümumi daxili məhsul buraxılışının həcmi
44,3 milyon manata çatıb. Ötən müddət ərzində
taxıl, tərəvəz, meyvə, habelə maldarlıq məhsulları
istehsalında da fərəhli nəticələr əldə
edilib. Ən əsası budur ki, tovuzlular kartofçuluqda yenə
də birinciliyi əldə saxlamağa
çalışırlar.
Ödəniş yüz faizdir
Əhaliyə xidmət
məsələsi ön plandadır. Rayonda qazlaşdırma
işi sürətlə davam edir. Son vaxtlar Abulbəyli,
Aşağı Mülkülü və Bayramlı kəndlərində
384 mənzilə təbii qaz verilib. Xatınlı, Qədirli,
Cilovdarlı, Əlimərdanlı kəndlərində də
qazlaşdırma işləri başa çatıb. Hazırda
Azaflı və Əsrik-Cırdaxan kəndlərində
sayğaclaşma işləri gedir. İndi əsas diqqət
Yanıqlı kəndində qaz kəmərinin bərpasına
yönəldilib.
Rayonda əhalinin elektrik
enerjisi ilə təchizatı sahəsində də sistemli
işlər görülür.
Transformatorlar, paylayıcı xətlər təmir edilir, sayğaclaşma, demək olar, başa çatıb. İtkilərin və digər halların qarşısının alınması üçün operativ briqadalar müntəzəm iş aparır. Nəticə fərəhlidir. Son aylar rayon üzrə istehlak olunan elektrik enerjisinin və təbii qazın dəyəri yüz faiz ödənilmişdir.
Dağlardan sərin su gəlir
Bu, çox möhtəşəm bir çeşmədir. Zəyəmçaydan üzü bəri gəlir. Uzunluğu 39,1 kilometrdir. Xəttin xeyli hissəsi hazırdır. Aşağı Quşçu kəndində 2 su anbarı inşa olunub. Burada artıq 5 minə yaxın abonentə içməli su verilir. İnşaat işləri isə davam edir. Yaxın vaxtlarda Tovuz şəhərinin və ona bitişik kəndlərin içməli su ilə təmin edilməsinə və kanalizasiya xətlərinin yenidən qurulmasına başlanılması gözlənilir.
Zəyəmçay su xətti başa çatanda Tovuzda içməli su problemi əsasən həll olunacaq.
Tovuzun öz SES-i olacaq
Ümumiyyətlə, axır vaxtlar Tovuzda qlobal işlər görülür. Dövlət Proqramına uyğun olaraq, Tovuzçay üzərində 8 aşırımlı körpü salınıb, Qazax səmtinə keçən dolama yol şəhərin mərkəzindəki nəqliyyat gərginliyinə son qoyub. Dağların başında nəhəng dəryaçanın tikintisi, Zəyəmçay hövzəsinin təmiri, su kəmərinin çəkilişi də davam edir.
İndi isə Tovuz Su Elektrik Stansiyasının inşasından söhbət gedir. 2009-cu ilin birinci yarısının sosial-iqtisadi yekunlarına həsr olunmuş yığıncaqda Prezident İlham Əliyevin sözləri tovuzluların ürəyindən xəbər verdi. Dövlət başçısı dedi ki, Tovuzçay Su Elektrik Stansiyasının tikintisi ilə bağlı müəyyən işlər görülür. Hesab edirəm ki, yaxın aylarda biz bu məsələni ciddi müzakirə etməliyik və lazım gələrsə, gələn ilin büdcəsindən Tovuzçay su anbarının və elektrik stansiyasının tikintisi ilə bağlı müəyyən vəsait nəzərdə tutmalıyıq. Çünki bu tikinti 3-4 il davam edə bilər. Tovuzçay elektrik stansiyasının enerji potensialı 400 meqavata yaxın ola bilər. Bu, həm çox böyük qənaət olacaq, həm də alternativ enerji mənbələrinin yaranmasına xidmət göstərəcək.
Əhməd İSAYEV
Azərbaycan.- 2009.- 15
avqust.- S. 3.