Avqustun 17-də
Gürcüstanın Kvemo Kartli-Borçalı bölgəsinin
Alget kəndindəki qədim məscid binasında əsaslı
təmir işləri başa
çatdırılmışdır.
Təmir işləri
Heydər Əliyev Fondunun dəstəyi ilə həyata
keçirilmişdir. Bununla əlaqədar Algetdə
keçirilmiş tədbiri Marneuli Rayon Məclisinin
(Sakrebulosunun) sədri Ayvaz İsmayılov açmış, kənd
sakinləri və rayon rəhbərliyi adından Ramazan
ayının başlanması ərəfəsində
Marneulinin böyük kəndlərindən sayılan Algetdə
belə bir xeyirxah tədbiri həyata keçirən Heydər
Əliyev Fondunun rəhbərliyinə, fondun prezidenti, Azərbaycanın
birinci xanımı Mehriban Əliyevaya minnətdarlıq ifadə
etmişdir.
Heydər Əliyev
Fondunun icraçı direktoru Anar Ələkbərov fondun
prezidenti Mehriban xanım Əliyevanın xoş
arzularını mərasim iştirakçılarına
çatdırmış, fondun gördüyü işlər
və gələcək planlar barədə ətraflı məlumat
vermişdir. A.Ələkbərov qeyd etmişdir ki, fondun rəhbərliyi
gürcüstanlı soydaşlara xüsusi diqqət yetirir. O,
belə xeyirxah tədbirlərin gələcəkdə də
davam etdiriləcəyini vurğulamışdır.
Azərbaycan
Respublikasının Gürcüstandakı səfiri Namiq Əliyev
Heydər Əliyev Fondu rəhbərliyinin, fondun prezidenti
Mehriban xanım Əliyevanın diqqət və
qayğısı sayəsində Gürcüstanın azərbaycanlılar
yaşayan kəndlərində xeyli problemin yoluna qoyulduğunu
və Azərbaycan rəhbərliyinin ulu öndərin siyasətinə
sadiqlik nümunəsinin ölkənin həm bölgədə,
həm də dünyada nüfuzunun daha da artmasına gətirib
çıxardığını qeyd etmişdir.
Həmin gün fondun dəstəyi
ilə daha bir layihə gerçəkləşmişdir: 6,5
kilometrlik məsafədən Alget və onun
qonşuluğundakı daha iki kəndə içməli su kəməri
çəkilmişdir. Bununla da uzun illər ərzində
içməli sudan korluq çəkən həmin kəndlərin
problemi öz həllini tapmışdır.
El ağsaqqalı
İmran Bayramov mərasim iştirakçıları
adından fondun rəhbərliyinə minnətdarlıq
etmiş və əsasını ulu öndər Heydər Əliyevin
qoyduğu xaricdə yaşayan soydaşlara qayğı siyasətinin
Azərbaycan Prezidenti İlham Əliyev tərəfindən
uğurla davam etdirilməsindən məmnunluq duyduğunu
vurğulamışdır.
Tədbirdə
Gürcüstan Prezidentinin müşaviri Mübariz Qarayev,
Kvemo Kartli-Borçalı bölgəsi qubernatorunun birinci
müavini Zakro Darçiaşvili, Marneuli rayon rəhbərliyi
və digər rəsmi şəxslər iştirak etmişlər.
İslam ƏLİYEV,
AzərTAc-ın xüsusi müxbiri
Tbilisi
Azərbaycan.- 2009.- 18 avqust.- S. 3.