Naxçıvanda Sərhəd Qoşunları yaradılmasının 90 illik yubileyi qeyd olunmuşdur

Avqustun 18-də "Naxçıvan" Sərhəd Diviziyasında Azərbaycan Sərhəd Qoşunları yaradılmasının 90 illik yubileyi qeyd olunmuşdur.

"Naxçıvan" Sərhəd Diviziyasının komandiri Asəf Quliyev yubiley tədbirinə gələn Naxçıvan Muxtar Respublikası Ali Məclisinin Sədri Vasif Talıbova raport vermişdir.

Ali Məclisin Sədri şəxsi heyəti salamlamış, onları Azərbaycan Sərhəd Qoşunları yaradılmasının 90 illik yubileyi münasibətilə təbrik etmişdir.

Ali Məclisin Sədri və tədbirin iştirakçıları diviziyanın həyətində xalqımızın ümummilli lideri, müstəqil Azərbaycanın qurucusu və memarı, görkəmli dövlət xadimi Heydər Əliyevin büstü önünə gül dəstəsi qoymuş, ulu öndərin xatirəsini ehtiramla yad etmişlər.

Sonra hərbi hissənin döyüş bayrağı meydana gətirilmişdir.

Dövlət himni səsləndirilmişdir.

Asəf Quliyev muxtar respublikada sərhədçilərə göstərilən diqqət və qayğıdan danışmışdır.

Sonra əsgər Elçin Rüstəmov çıxış etmişdir.

Vasif Talıbov əziz bayram - Azərbaycan Respublikası Sərhəd Qoşunlarının yaradılmasının 90 illiyi və sərhəd qoşunları əməkdaşlarının peşə bayramı münasibətilə dövlət sərhədimizin etibarlı keşikçilərini, onların şəxsində muxtar respublikanın ərazisindəki bütün hərbi hissələrin heyətlərini, daim sərhədçilərimizlə birlik nümayiş etdirən naxçıvanlıları və şəhid ailələrini təbrik edərək demişdir ki, ölkəmizdə sərhəd qoşunlarının yaradılması möhtərəm Heydər Əliyevin ali hakimiyyətə qayıdışından sonra dövlət siyasətinin mühüm tərkib hissəsinə çevrilmiş, peşəkar xarakter almışdır.

Milli dövlətçiliyin əsas atributlarından olan dövlət sərhədlərinin mühafizəsinə ulu öndərimizin göstərdiyi diqqət və qayğının nəticəsidir ki, dövlət sərhədləri boyu zəruri infrastruktur yaradılmış, Müstəqil Dövlətlər Birliyinə daxil olan digər dövlətlərdən fərqli olaraq Azərbaycan öz sərhədlərini müstəqil qorumağa qadir olduğunu bütün dünyaya nümayiş etdirmişdir.

Sonra xidmətdə fərqlənənlərə Azərbaycan Respublikası Prezidentinin təltifləri və Ali Məclis Sədrinin qiymətli hədiyyələri təqdim olunmuşdur.

Şəxsi heyət təntənəli marşın sədaları altında nizami addımlarla tribunanın önündən keçmişdir.

Ali Məclisin Sədri və tədbirin iştirakçıları əsgər yeməkxanasında əsgərlərlə birlikdə nahar etmişlər.

Naxçıvan Dövlət Filarmoniyasının "Gəmiqaya" instrumental ansamblı konsert proqramı ilə çıxış etmiş, muxtar respublikanın incəsənət ustalarının ifasında ümummilli liderimizə, doğma vətənimizə həsr olunmuş mahnılar səslənmişdir.

Azərbaycan.- 2009.- 19 avqust.- S. 3.