Səbail Rayon İcra
Hakimiyyətinin təşəbbüsü və təşkilatçılığı,
Quba Rayon İcra Hakimiyyəti və DİN Daxili
Qoşunlarının iştirakı ilə aztəminatlı
ailələrdən olan 150 uşaq üçün Qubanın
Qımıl-Qazma kəndində təşkil olunmuş hərbi-vətənpərvərlik
təmayüllü "Şahinlər" yay istirahət
düşərgəsində keçən günlər
uşaqların xatirində silinməz izlər
buraxmışdır. Səbail rayon yeniyetmələri ilə
yanaşı ümumrespublika "SOS" uşaq kəndində
yaşayıb tərbiyə alan uşaqların bir qrupu,
"Sodrujestvo" Həmrəylik Cəmiyyəti və Azərbaycandakı
rus icması üzvlərinin uşaqları, Quba rayonu Zərdabi
adına xüsusi internat məktəbin şagirdləri,
UNİSEF-in Uşaq və Gənclərin Sosial Reabilitasiya Mərkəzinin,
Azərbaycan "Uşaqdan-uşağa" Sülh Şəbəkəsinin,
həmçinin Səbail Rayon İcra Hakimiyyəti nəzdində
Yetkinlik yaşına çatmayanların işləri və
hüquqlarının müdafiəsi üzrə
Komissiyanın nəzarətində olan balacalar da düşərgədə
istirahət ediblər.
Yenicə təmir
olunmuş Qımıl-Qazma kənd məktəbində Daxili
Qoşunların Qubadakı hərbi hissəsinin
komandanlığı tərəfindən hər dəstə
üçün lazımi ləvazimatla təchiz olunmuş
kazarmalar yaradılmış, həyətdə hərbi-səhra
çadırları quraşdırılmışdır. Yeməyin
hərbi səhra mətbəxində bişirilməsi, məşğələlərin
dəstə rəhbərləri ilə yanaşı zabit və
çavuşların da iştirakı ilə hərbi nizamnaməyə
uyğun tərzdə keçirilməsi uşaqların istirahətini
daha da maraqlı etmişdir.
İstirahət
dövründə uşaqlar üçün Qubanın
görməli yerlərinə, meşələrə, rayonun
tarixi guşələrinə gəzintilər də təşkil
olunmuşdur. Qubada Heydər Əliyev Muzeyinin, şəhidlərin
və soyqırım qurbanlarının xatirəsinə
ucaldılmış abidələrin ziyarəti
uşaqların yaddaşında əbədi iz
buraxmışdır. Quba Rayon İcra Hakimiyyəti
uşaqların istirahətinin daha mənalı keçməsi
üçün hər cür kömək göstərmiş,
düşərgə yüksək kalorili yeməklə
yanaşı gündəlik meyvə-tərəvəz, süd
məhsulları ilə də təmin olunmuşdur.
Düşərgədə
məktəblilərə xalqımızın tarixindən bəhs
edən "Vətən sevgisi" dərsləri çərçivəsində
"Müasir Azərbaycan ulu öndərimiz Heydər Əliyevin
şah əsəridir", "Azərbaycanın tarixi və
siyasi coğrafiyası", "Azərbaycanın
bugünü və gələcəyi" mövzularında məşğələlər
və idmanın müxtəlif növləri üzrə
yarışlar keçirilmişdir.
Yeniyetmələrin hərbi
vətənpərvərlik tərbiyəsi istiqamətində
"Azərbaycan Ordusu: nizam-intizam hərbçilərə
xas olan vacib xüsusiyyətlərdir", "Dağlıq
Qarabağ problemi və müasir dünya"
mövzularında məşğələlər, Qarabağ
savaşı zamanı qanlı döyüşlərdə həlak
olmuş soydaşlarımızın anım mərasimləri
keçirilmiş, hərbçilərin bilavasitə
iştirakı ilə ibtidai hərbi hazırlıq, mülki
müdafiə və ilk tibbi yardım təlimləri təşkil
olunmuşdur. Ən yaddaqalan tədbirlərdən biri də
Daxili Qoşunların Xüsusi Təyinatlı
Bölüyünün üzvləri tərəfindən
göstərilən nümunəvi çıxışlar və
əlbəyaxa döyüş növləri olmuşdur. Şagirdlər
hərbçilərin silahları və döyüş
texnikası ilə yaxından tanış olmuş, əsgərlərin
xidmət və məişət şəraiti barədə
çoxlu suallar vermişlər.
Rumıniya
Respublikasının paytaxtı Buxarest şəhərinin Səbail
rayonu ilə qardaşlaşmış II sektorunun meri cənab
Nikolay Ontsanunun başçılıq etdiyi nümayəndə
heyətinin düşərgədə olması yeniyetmələrin
xüsusi marağına səbəb olmuş, uşaqlar
qonaqlara öz istirahət və təhsillərindən
danışmış, qısa müddətdə əldə
etdikləri nəzəri və əməli biliklər barədə
məlumat vermişlər. Düşərgənin təntənəli
bağlanışı ilə əlaqədar təşkil
olunmuş tədbirdə iştirak edən Azərbaycan
Respublikasının insan hüquqları üzrə müvəkkili
- ombudsman Elmira Süleymanova, Daxili Qoşunlar
Komandanının müavini general-mayor Fəxrəddin Səmədov,
Səbail və Quba rayon icra hakimiyyətlərinin nümayəndələri
və başqa qonaqlar uşaqların istirahəti, burada onlar
üçün yaradılmış şəraitlə
yaxından tanış olmuşlar.
İdman
yarışlarında qalib gəlmiş bir qrup şagirdə fəxri
fərman və mükafatlar, uşaqların tərbiyəsində
fərqlənmiş dəstə rəhbərlərinə qiymətli
hədiyyələr təqdim edilmişdir.
Respublikamızın
tanınmış incəsənət xadimləri və gənc
istedadların iştirakı ilə keçirilən bayram
konsertində düşərgədə istirahət edən
uşaqlar da öz məharətlərini göstərmişlər.
Azərbaycan.- 2009.- 19 avqust.- S. 5.