Ölkə Prezidenti
İlham Əliyevin sərəncamına əsasən, 2009-cu
il respublikamızda "Uşaq ili" elan edilmişdir. Bu səbəbdən
də uşaqlara göstərilən diqqət və
qayğı daha da artırılmışdır. Bu sərəncamın
işığı uşaqlar üçün nəşr
edilən kitabların da taleyində rol oynayıb.
"Beşik" nəşriyyatı
xalq şairi Xəlil Rza Ulutürkün uşaqlar
üçün yazdığı şeirləri təkrar nəşr
etmişdir. "Marallar da duz yeyərmiş" adlı kitabın
tərtibçisi şairin həyat yoldaşı Firəngiz
xanım Ulutürk, rəyçisi Əlizadə Əsgərlidir.
Uşaq ədəbiyyatının zəiflədiyi bir dövrdə
belə kitabların nəşri həqiqətən təqdirəlayiqdir.
Topluda şairin vətənlə,
təbiətlə bağlı, əməyi tərənnüm
edən şeirləri toplanmışdır. Uşaq
psixologiyasına, təfəkkür tərzinə uyğun olan
bu nümunələr həqiqətən tez yadda qalır,
kiçik oxucuların bilik və bacarıqlarının
möhkəmlənməsində əhəmiyyət
daşıyır. Məsələn, "Sual-cavab"
adlı şeirə fikir verək.
- Kimdir ən
böyük şair?
- Mənim babam Nizami!
- Ən qəhrəman sənətkar?
- İmadəddin Nəsimi!
- İldırım
sürətli at?
- Koroğlunun
Qıratı!
- Qısa qaynar bir həyat?
- Cabbarlının həyatı!
- Dünyada ən
gözəl səs?
- Xanın,
Bülbülün səsi!
- Ən doğma,
yaxşı ölkə?
- Azərbaycan ölkəsi!
Göründüyü
kimi, üç bəndlik bir şeirdə də kiçik
oxucu ona lazım olacaq hər bir şeyi əxz edə bilir. Həqiqətən
də məşhur uşaq şairlərinin
yaradıcılığına müraciət edərək
onların əsərlərini yenidən çap etdirmək
çox gərəklidir. Çünki bu şeirlərdə
hər şey yerli-yerindədir. İstər sənətkarlıq
baxımından, istərsə də bədii cəhətdən.
Təəssüf ki, bu gün dərsliklərdə elə
şeirlərə rast gəlinir ki, onlar nəinki
uşaqların yaşına, səviyyəsinə uyğundur,
həm də mənasız, məzmunsuz söz
yığınından ibarətdir.
Gərəkdir ki, Azərbaycan
poeziyasında, xüsusilə də uşaq ədəbiyyatında
öz sözünü demiş müəlliflər
unudulmasın.
Bəhruz NİFTƏLİYEV,
Azərbaycan Dövlət
Mədəniyyət və İncəsənət
Universitetinin magistrantı
Azərbaycan.- 2009.- 19 avqust.- S. 6.