ABŞ-ın Kaliforniya
ştatının Assambleya üzvü Bob Blumenfild Azərbaycanın
Los-Anceles şəhərindəki baş konsulluğuna rəsmi
məktub ünvanlamışdır. Məktubda B.Blumenfild
iyunun 28-29-da İsrail Prezidenti Şimon Peresin respublikamıza rəsmi
səfərinin baş tutması ilə bağlı Azərbaycan
Prezidentinə və hökumətinə minnətdarlığını
ifadə etmişdir. ABŞ qanunvericisi yazmışdır ki,
bununla Prezident İlham Əliyev Yaxın Şərqdə
sülh və əmin-amanlıq, eləcə də həmin
bölgədə tolerantlıq və plüralizm prinsiplərinə
sadiq qaldığını nümayiş etdirmişdir. Bob
Blumenfildin məktubunda deyilir: "Mən bildiyimə görə,
bu dəyərlər Azərbaycanın gündəlik həyatında
öz əksini tapmışdır. Dünyəviliyin hökm
sürdüyü cəmiyyətinizdə yəhudilər digər
vətəndaşlar kimi bərabər dini hüquqlara malikdirlər".
Kaliforniya
Assambleyasının üzvü diplomatik nümayəndəliyimizdən
Prezident İlham Əliyevə dərin təşəkkürünü
çatdırmağı xahiş etmiş və
bildirmişdir ki, Şimon Peresi Bakıya dəvət etmək
haqqında dövlətimizin başçısının qərarını
ürəkdən alqışlayır.
Şəfəq AKİFQIZI,
AzərTAc-ın xüsusi müxbiri
Los-Anceles
Azərbaycan.- 2009.- 20 avqust.- S. 2.