Azərbaycan haqqında nəşrlərə Kiyevdə maraq böyükdür

Ukrayna paytaxtında V Kiyev Beynəlxalq kitab sərgi-yarmarkası keçirilir.

Üç min kvadratmetrdən çox ərazidə dünyanın 30 ölkəsindən - Azərbaycan, Belarus, Bolqarıstan, Rusiya, İtaliya, Çin, Litva, Polşa, Rumıniya və digər ölkələrdən naşirlər kitab məhsullarını nümayiş etdirirlər. Kiyev sərgisində ilk dəfə olaraq İran və İsrail də iştirak edir.

Azərbaycanın Ukraynadakı səfirliyi tərəfindən təşkil olunmuş stenddə dövlətimizin qədim tarixi, dünya şöhrətli siyasi xadim, ümummilli lider Heydər Əliyev haqqında, həmçinin Prezident İlham Əliyevin rəhbərliyi altında respublikamızın daxili və xarici siyasət sahələrində əldə etdiyi nailiyyətlər, xalqımızın zəngin mədəniyyəti, Ermənistan-Azərbaycan, Dağlıq Qarabağ münaqişəsi və ölkəmizlə bağlı digər aktual məsələlər barədə Azərbaycan, Ukrayna və ingilis dillərində kitablar və dövri mətbuat nümunələri nümayiş etdirilir.

E.Axundovanın "Heydər Əliyev. Şəxsiyyət və zaman", "Heydar Aliyev and national policy in Azerbaijan", S.Rüstəmova - Tohidinin "Bakı ş. 1918-ci il mart. Azərbaycandakı talanlar sənədlərdə", V.Quliyevin "Azərbaycan məktəbi Rusiya orientalistikasında" kitabları, M.Miroşniçenkonun "Azərbaycan poeziyasının antologiyası" ikicildliyi, "Bakı", "Azərbaycan dünyası", "Azərbaycan və dünya" jurnalları və digər nəşrlər sərgiyə gələnlərdə böyük maraq doğurmuşdur.

V Kiyev Beynəlxalq kitab sərgi-yarmarkası avqustun 21-dək davam edəcəkdir.

Zeynal AĞAZADƏ,

AzərTAc-ın xüsusi müxbiri

Kiyev

Azərbaycan.- 2009.- 20 avqust.- S.2.