Heydər Əliyev
Fondunun dəstəyi ilə Qəbələdə keçirilən
Beynəlxalq musiqi festivalı çərçivəsində
gənc pianoçuların müsabiqəsi başa
çatmışdır.
Avqustun 19-da Qəbələdəki
"Qafqaz Resort" otelində müsabiqənin final mərhələsi
keçirilmişdir. Müsabiqənin mükafatları
uğrunda Azərbaycan, Rusiya, Xorvatiya və Yaponiyanı təmsil
edən 5 pianoçu mübarizə aparmışdır.
Rusiya pianoçusu
İlya Maksimov müsabiqənin ən yüksək
mükafatına - "Qran-pri"yə sahib olmuşdur. Azərbaycan,
ABŞ, İtaliya, İspaniya, Meksika və Rusiya mütəxəssislərinin
təmsil olunduğu münsiflər heyətinin qərarı
ilə finalda mübarizə aparan digər gənc
pianoçulardan xorvatiyalı Qoran Filipets birinci, rusiyalı
Aleksandr Yakovlev ikinci, azərbaycanlı Toğrul Hüseynli
dördüncü və yaponiyalı Şimomura Misako
beşinci mükafata layiq görülmüşlər. Münsiflər
heyəti iştirakçıların heç birini 3-cü
mükafata layiq bilməmişdir. Nəticələri musiqi
festivalının bədii rəhbəri Fərhad Bədəlbəyli
və müsabiqənin münsiflər heyətinin sədri
Oksana Yablonskaya elan etmişlər.
Həmçinin Azərbaycan
bəstəkarlarının əsərlərini ən
yaxşı ifa etmək nominasiyası üzrə mükafata Nərgiz
Kəngərli və Nataliya Landfed (ABŞ) layiq
görülmüşlər.
Mükafatlar avqustun 20-də
təqdim olunacaqdır.
Xatırladaq ki,
müsabiqəyə müxtəlif ölkələrdən
ümumilikdə 22 gənc pianoçu qatılmışdı
və onlardan 7-si azərbaycanlı idi.
Qəbələ Beynəlxalq
musiqi festivalı çərçivəsində avqustun 20-də
pianoçuların müsabiqəsinin münsiflər heyətinin
qala konserti, ayın 21-də isə muğam axşamı təşkil
ediləcəkdir. Festivalın təntənəli
bağlanışı avqustun 22-də olacaqdır.
AzərTAc
Azərbaycan.- 2009.- 20 avqust.- S. 3.