Təbiətin gözəl mənzərəsi

İnsan təbiətin övladıdır. Ağaclar, bulaqlar, çaylar, meşələr, oylaqlar, yaylaqlar, quşlar, heyvanlar onun sevimli yetirmələridir. Hətta şəkillərdə gördüyünüz bu mənzərələr də. İnsanın xislətinə, varlığına təbiətin təsiri var.

Elə bu gözəl guşədən də gül-çiçəyin, dağların, yamacların ətri süzülüb insanların qəlbinə yol tapır. İki daş qayanın altından pöhrə verən, Günəşə doğru boy atan bu tənha gül də, təpənin döşündə əbədilik qazanmış bu ağac da, neçə səyahətçiyə, yolçuya yağışlı, yaxud günəşli havada dincini almağa şərait yaradan bu tənha ev də təbiətin insanlara bəxşişidir. Bu gülün, ağacın dili olsaydı, deyərdi ki, təbiəti qoruyun. Çünki o sizə həyat verir. Hər bir ağacın, gülün, çiçəyin ətri, ruhiyyəsi, sərin bulağın suyu təkcə bir elin, obanın dünyasını işıqlandırmır, təravətləndirmir. Təbiətin qoynuna gələn hər kəsin könlünü oxşayır, ona təravət gətirir.

Bu dərələrin sinəsinə qədəm qoymaq, qayaların zirvəsinə qalxmaq, elə bu tənha gülün gözəlliyinə tamaşa etmək özü də ulu Tanrının bir qismətidir. Fotomüxbirimiz deyir ki, bu dərələrdən şaqqaşaqla üzü aşağı axıb gülün ətrafından keçən çayın laylasını, sanki yaratdığı lirik, həzin musiqini hiss etmək istəyirsən, burada havanı acgözlüklə ciyərlərinə çəkməyə çalışırsan...

Daşdəmir ƏJDƏROĞLU

Azərbaycan.- 2009.- 20 avqust.- S. 6.