Heydər Əliyev
Fondunun dəvəti ilə Azərbaycanda səfərdə
olan rusiyalı yazıçı-publisist, Rusiya Təbii Elmlər
Akademiyasının akademiki, professor Yuri Pompeyev jurnalistlərə
müsahibəsində demişdir ki, mən Azərbaycanın
yeni tarixinə həsr olunmuş bir neçə kitabın
müəllifiyəm. Ermənistanın Azərbaycana
qarşı təcavüzü ilə bağlı ilk
kitabım - "Qarabağ qan girdabında" 1992-ci ildə
Sankt-Peterburqda nəşr etdirilmişdir. Müəllif
xudbinliyi ilə demək istərdim ki, kitabın çap
olunmasından 17 il keçsə də, əsər
aktuallığını, əhəmiyyətini itirməmişdir.
Kitab internet vasitəsilə yayılmış və bir
çox beynəlxalq forumlarda müzakirə olunmuşdur.
Hazırda İslam
Konfransı Təşkilatının Gənclər Forumu Heydər
Əliyev Fondunun dəstəyi ilə mənim Ermənistan-Azərbaycan,
Dağlıq Qarabağ münaqişəsinə həsr
olunmuş üçcildliyimi çap etdirmək niyyətindədir.
Mənim bu mövzu ilə bağlı 1993-cü ildə
"Məşəqqətli günlər" kitabım da
çap olunmuşdur. Əvvəlki kitabın davamı olan bu əsərdə
də ermənilərin məfkurəvi millətçiliyi tənqid
olunur. Son 10-15 ildə isə mənim bu istiqamətdə məqalələrim,
oçerklərim Sankt-Peterburqun qəzet və jurnallarında,
eləcə də Bakıda nəşr olunan beynəlxalq
"İrs" jurnalında dərc edilmişdir. Bu məqalə
və oçerklər, eləcə də Rusiya, Ermənistan mətbuatında
Azərbaycanın işğal olunmuş ərazilərindəki
hazırkı vəziyyətlə bağlı dərc
olunmuş materiallar əsasında kitabımın
üçüncü cildi - "Xarabalıqlar" adlı
kitab ərsəyə gələcəkdir. Onu da qeyd edim ki, ermənilərin
özlərinin təsdiqinə görə, işğal
olunmuş torpaqlarda Azərbaycan zərb-məsəlinə əsasən
"ot da bitmir" və o ərazilərin qanuni sahibləri -
azərbaycanlı qaçqın və məcburi
köçkünlər doğma yurdlarına qayıtmayana qədər
heç bitməyəcəkdir də.
Azərbaycan.- 2009.- 22
avqust.- S. 3.