"İstər təhsil,
istər səhiyyə sahəsində, mədəniyyət sahəsində,
mənəvi irsimizin qorunması işində, Azərbaycanın
dünya birliyində təbliğ edilməsi işində, Azərbaycanın
olduğu kimi təqdimatı işində, Ermənistan-Azərbaycan,
Dağlıq Qarabağ münaqişəsinin geniş mənada
dünya birliyinə düzgün şəkildə
çatdırılması işində Heydər Əliyev
Fondunun rolunu mən çox yüksək qiymətləndirirəm.
Bu fond sübut etdi ki, əgər istək olarsa, əgər
iradə olarsa və əgər xoş niyyət olarsa, istənilən
sahədə istənilən məsələ həll oluna bilər.
Bu fondun çoxşaxəli fəaliyyətini əgər bir
sözlə xarakterizə etmək mümkündürsə, mən
"xoşniyyət" deyərdim. Çünki bütün
sahələrdə biz
bunu görürük".
İlham ƏLİYEV
Dünya siyasətinin
transmilliləşməsi bəşəri səviyyədə
praqmatizm və fərdiçilik meyillərini qabarıq üzə
çıxarsa da, humanizmə, insanpərvərliyə əsaslanan
yüksək dəyərlər insanlığın ali zinəti
kimi aktuallığını, mənəvi təsir
gücünü qoruyub saxlayır. Ədalətlilik,
dürüstlük, xeyirxahlıq və mənəvi saflıq
hər bir insanın özündən sonra qoyub getdiyi ülvi,
müqəddəs dəyərlərdən sayılır. Kamil
və yetkin insanın dünyanın xilası barədə
düşüncələri də məhz bu kimi ülvi, saf dəyərlərin
üzərində köklənir. Başqalarına təmənnasız
yaxşılıq etməkdən rahatlıq tapan belə
insanlar isə, sözün əsl mənasında, mənəvi
ucalığa qovuşur.
Beş il əvvəl
ümummilli lider Heydər Əliyevin zəngin dövlətçilik
irsinin öyrənilməsi və təbliği məqsədilə
yaradılan Heydər Əliyev Fondu da Azərbaycan
xalqının düşüncə sistemində xüsusi yer
tutan mərhəmət, insanpərvərlik, xeyirxahlıq kimi
ali dəyərlərə tapınaraq cəmiyyətin mənəvi
saflaşmasına və yüksəlişinə hesablanan
xoşməramlı missiya həyata keçirmişdir. Fond
ötən müddətdə ölkənin inkişafına və
xalqın rifahının yüksəlməsinə xidmət edən
genişmiqyaslı proqram və layihələrin
reallaşmasına kömək etmək, Azərbaycan mədəniyyətinin
geniş təbliği və qorunması ilə bağlı
aparılan işlərə yardımçı olmaq, milli mənəvi
dəyərlərin qorunub saxlanılmasına dəstək
vermək, ölkə həqiqətlərini dünya ictimaiyyətinə
çatdırmaq, elm, təhsil, mədəniyyət, səhiyyə,
idman, ekologiya sahələrinə aid proqram və layihələr
hazırlayıb həyata keçirmək, xüsusi
qayğıya ehtiyac duyan insanlara yaxından kömək
göstərmək kimi məqsədləri uğurla həyata
keçirmişdir.
Cəmiyyətin ən həssas
qütblərini əhatə edən bu xoşməramlı fəaliyyət
təkcə Azərbaycanda deyil, ümumilikdə ölkə
hüdudlarından kənarda da yüksək dəyərləndirilir.
Azərbaycan şifahi xalq ədəbiyyatının və
musiqi irsinin qorunub saxlanılması və inkişaf etdirilməsi
sahəsindəki səylərinə görə Heydər Əliyev
Fondunun prezidenti Mehriban xanım Əliyeva 2004-cü ildə
YUNESKO-nun xoşməramlı səfiri adına layiq
görülmüşdür. Sivilizasiyalararası dialoq prosesinə
mühüm töhfələr verən Azərbaycanın
birinci xanımının fəaliyyəti İslam Konfransı
Təşkilatına üzv dövlətlər tərəfindən
də yüksək dəyərləndirilmişdir. 2006-cı
ildə Mehriban xanım Əliyevanın daha bir yüksək
titula - İslam Ölkələri Təhsil, Elm və Mədəniyyət
Təşkilatının (İSESKO) xoşməramlı səfiri
adına layiq görülməsi bütövlükdə Azərbaycanın
qazandığı böyük nailiyyət sayıla bilər.
Məhz Azərbaycanın birinci xanımının
timsalında bu status humanist fəaliyyətə,
qayğıkeşliyə, eləcə də hansısa problemlərlə
qarşılaşan, hansısa məqamda hüquqları pozulan
sıravi vətəndaşların ümid yerinə
çevrilmişdir.
Milli-mənəvi irsə qayğı örnəyi
Milli maraq və mənafelərə
daim yüksək sadiqlik nümayiş etdirən Heydər Əliyev
Fondu qloballaşmanın qarşısıalınmaz prosesə
çevrildiyi bir dönəmdə xalqın milli
varlığının, özünəməxsusluğunun
ifadəsi olan zəngin mənəvi irsi, dəyərlər
sistemini, mədəni-intellektual mülkiyyəti yad təsirlərdən
qorumaq kimi çətin missiyanın öhdəsindən inamla
gəlir. Əminliklə demək olar ki, Azərbaycan mədəniyyəti
son illərdə YUNESKO və İSESKO-nun xoşməramlı
səfiri Mehriban xanım Əliyevanın timsalında
özünə etibarlı hami və xilaskar
tapmışdır. Azərbaycanın birinci xanımı
haqlı olaraq bildirir ki, Azərbaycan xalqının milli mədəniyyətinin
yad təsirlərdən qorunması üçün, ilk
növbədə, milli-mənəvi və əxlaqi dəyərlərin
cəmiyyətdə tam bərqərar olmasına, habelə
ictimai şüurda daha möhkəm yer tutmasına
çalışmaq lazımdır.
Heydər Əliyev
Fondunun prezidentinin milli mədəniyyətin dünya
miqyasında təbliği və qorunması naminə həyata
keçirdiyi nəcib missiya, əslində, son illərlə məhdudlaşmır.
Xatırlatmaq lazımdır ki, 1995-ci ildə "Azərbaycan
Mədəniyyətinin Dostları" Fondunu yaratmış
Mehriban xanım Əliyeva hələ o dövrdən məhz
bu missiyanı qarşıya qoymuş, yüksək təşəbbüskarlığı,
fitri idarəçilik keyfiyyətləri ilə milli mədəniyyətimizin
inkişafına töhfəsini vermişdir. Qədim ənənələrə
xas Azərbaycan xalqının maddi və mənəvi mədəniyyət
nümunələrinin, incəsənətinin, folklorunun,
musiqisinin qorunması, eləcə də dünya miqyasında
təbliğ olunması məqsədilə 1996-cı ildən
"Azərbaycan-İrs" jurnalının təsis edilməsi
də xüsusi xatırlanmalıdır. Azərbaycan, rus və
ingilis dillərində işıq üzü görən
jurnalda son 10 ildə milli mədəniyyətimizin, tarixi-milli
irsimizin qorunub saxlanılması və gələcək nəsillərə
ötürülməsi vacibliyi ilə bağlı çoxsaylı
məqalələr işıq üzü
görmüşdür. Azərbaycanın mədəniyyəti
və incəsənəti ilə bağlı ən aktual
problemlərin, böyük məzmun yükünə malik
materialların dərc edildiyi "Azərbaycan-İrs"
jurnalı ölkə həqiqətlərinin beynəlxalq
ictimaiyyətə çatdırılması və təbliği
işinə də böyük dəstək olmuşdur.
Heydər Əliyev Fondu
isə "Azərbaycan Mədəniyyətinin
Dostları" Fondu ilə birgə xalqın milli
varlığını özündə yaşadan maddi-mənəvi
və intellektual irsə böyük diqqət və həssaslıqla
yanaşmış, milli mədəniyyətin dünya
arenasına çıxmasında və təbliğində fəal
iştirak etmişdir. Fondun prezidenti Mehriban xanım Əliyevanın
birbaşa himayəsi ilə son illər Azərbaycanda muğam
sənətinin qorunması, inkişafı və təbliği
sahəsində böyük işlər
görülmüşdür. Azərbaycan muğamının
YUNESKO-nun bəşəriyyətin qeyri-maddi irsinin şah əsərləri
siyahısına daxil olunması da bilavasitə bu fəaliyyətin
nəticəsidir. Fondun milli mədəniyyətin təbliği
sahəsində həyata keçirdiyi uğurlu layihələrdən
biri də "Qarabağ xanəndələri" albomudur. YUNESKO
xətti ilə hazırlanmış alboma belə bir adın
seçilməsi Qarabağın əzəli və əbədi
Azərbaycan torpağı olduğunu bütün dünyaya
nümayiş etdirmək istəyindən irəli gəlmişdir.
Albomun təqdimat mərasimində çıxış edən
Mehriban xanım Əliyeva Azərbaycanda bir neçə
muğam məktəbinin olduğunu, Qarabağ muğam məktəbinin
də aparıcı muğam məktəblərindən
sayıldığını diqqətə
çatdırmış, eyni zamanda, gənc muğam
ifaçılarının sayının
azaldığını narahatlıqla bildirmişdir:
"Balaca muğam ifaçılarını, adətən,
Qarabağ bülbülləri adlandırırlar. Bu gün Qarabağın
sakinləri olan məcburi köçkünlərin
düşərgələrində böyüyən
uşaqlar daha muğam oxumurlar, onların arasında belə
Qarabağ bülbülləri son dərəcə azdır. Oxumaq
üçün onlara Qarabağ dağları, Qarabağ təbiəti,
Qarabağ torpağı lazımdır. Azərbaycan mədəniyyətinin
Üzeyir Hacıbəyov və Bülbül kimi belə
böyük korifeylərinin Şuşada
doğulduqlarını demək kifayətdir".
Heydər Əliyev
Fondunun prezidentinin şəxsi təşəbbüsü ilə
2005, 2007 və 2009-cu illərdə keçirilən və Azərbaycan
televiziyası ilə canlı yayımlanan muğam müsabiqələri
də Azərbaycanın milli sərvəti olan muğamın təbliği
baxımından təqdirəlayiqdir. Azərbaycan mədəniyyətinin
incisi olan muğamın dünyada geniş təbliği məqsədilə
Bakı şəhərində müasir üslubda Beynəlxalq
Muğam Mərkəzinin tikilib istifadəyə verilməsi də
fondun qlobal layihələri sırasında mühüm yer
tutur. 2005-ci il aqvustun 24-də Azərbaycan Prezidenti İlham Əliyev
və YUNESKO-nun Baş direktoru cənab Koişiro Matsuuranın
iştirakı ilə əsası qoyulan Beynəlxalq Muğam
Mərkəzinin 2008-ci ilin dekabr ayında təntənəli
açılış mərasimi olmuşdur. Mərkəzdə
gənc ifaçılar Azərbaycan musiqi mədəniyyətinin
gözəl nümunəsi olan muğam sənətinin incəliklərinə
yiyələnirlər. Mərkəzdə dünya ictimaiyyətinin
diqqətini Azərbaycan muğam sənətinə cəlb etməyi
bacarmış görkəmli muğam ustalarının konsertləri,
muğam gecələri, beynəlxalq konfrans və festivallar təşkil
olunur. Fond regionlarda muğam mərkəzlərinin
yaradılmasına da ciddi dəstək verir. 2008-ci ilin
sentyabrında fondun təşəbbüsü əsasında
Ağcabədidə Qarabağ Muğam Mərkəzi inşa olunmuşdur.
Heydər Əliyev
Fondunun Azərbaycan xalçaçılıq sənətinin
tarixi şöhrətinin, zəngin ənənələrinin
inkişaf etdirilməsi sahəsindəki fəaliyyəti də
xüsusi vurğulanmalıdır. Fondun dünya
xalçaçılıq sənətinə misilsiz töhfələr
verən, Azərbaycan xalçaçılığının
zəngin ənənələrini yaşadan, istehsal etdiyi
malları dünyaya çıxarmaqla bu qədim el sənətinin
fəal təbliğatçısına çevrilən
"Azər-İlmə" Məhdud Məsuliyyətli Cəmiyyətinə
qayğısı bu nadir sənət incisinə diqqətdən
irəli gəlir. "Azər-İlmə" MMC-nin istehsal
sahəsində xalqın tarixini, məişətini, adət-ənənələrini,
müxtəlif inanclarını, estetik görüşlərini,
fəlsəfi baxışlarını özündə əks
etdirən, bu keyfiyyətləri sirli-sehrli ilmələrdə,
naxışlarda yaşadan sənət nümunələri
bütün dünyada məşhurlaşmışdır. Yüksək
bədii və texnoloji səviyyədə toxunan "Şeyx Səfi"
xalçasının hanadan kəsilməsi mərasimində
YUNESKO-nun baş direktoru Koişiro Matsuura və Azərbaycanın
birinci xanımı, YUNESKO və İSESKO-nun xoşməramlı
səfiri, Heydər Əliyev Fondunun prezidenti Mehriban xanım Əliyeva
iştirak etmişlər.
Fondun bu sahədə həyata
keçirdiyi mühüm layihələrdən biri də Azərbaycan
Xalçası və Xalq Tətbiqi Sənəti Dövlət
Muzeyinin inşasıdır. 2008-ci ilin mayında Bakıda Azərbaycan
Prezidenti İlham Əliyevin və YUNESKO-nun Baş direktoru
Koişiro Matsuuranın iştirakı ilə təməlqoyma
mərasimi keçirilmiş Lətif Kərimov adına Azərbaycan
Xalçası və Xalq Tətbiqi Sənəti Dövlət
Muzeyi Heydər Əliyev Fondunun, Mədəniyyət və
Turizm Nazirliyinin və YUNESKO-nun dəstəyi ilə inşa
olunur. Sərgi salonu, kitabxana, toxuma və tikmə mərkəzi,
suvenir və kitab köşkü, danışıqlar və
audiovizual təqdimatlar otağı, böyük tərtibat
imkanlarına malik sərgi zonası olacaq binada, həmçinin
açıq havada heykəllərin və xalçaların
nümayişi üçün sahə də nəzərdə
tutulmuşdur.
2009-cu ilin martında
fondun təşəbbüsü ilə Bakıda Müasir
İncəsənət Muzeyinin açılması da mədəni
sahədəki qlobal layihələr sırasında xüsusi
vurğulanmalıdır. Muzeydə Azərbaycanın gənc,
avanqard üslubda işləyən rəssam və heykəltəraşlarının
800-dən çox işi toplanmışdır. Burada, həmçinin,
Azərbaycan xalq rəssamlarının əsərləri, rəngkar
və heykəltəraşların işləri də sərgilənir.
Qərbi Avropa incəsənəti
salonunda isə dünya klassiklərinin rəsm əsərləri
və əl işləri nümayiş olunur.
Heydər Əliyev Fondu
Azərbaycanın görkəmli şəxsiyyətlərinin
xatirəsinin əbədiləşdirilməsi istiqamətində
də mühüm addımlar atmışdır. YUNESKO-nun
"Dünya irs siyahısı"na İçərişəhərin
Şirvanşahlar Saray Kompleksinin, Qobustan Qoruq Muzeyinin və Atəşgahın
da daxil edilməsi, Gəncə şəhərindəki Cavad
xan türbəsinin, "Comərd Qəssab" məqbərəsinin,
Bakının Şüvəlan qəsəbəsindəki Pirhəsən
ziyarətgahının, Abdulla Şaiqin ev-muzeyinin əsaslı
təmiri buna əyani sübutdur. Məşhur xeyriyyəçi
Hacı Zeynalabdin Tağıyevin Mərdəkandakı
ev-muzeyinin müasir tələblər səviyyəsində təmir
olunması da fondun həyata keçirdiyi xeyirxah layihələrdən
biridir.
Heydər Əliyev
Fondunun təşəbbüsü ilə 2005-ci ildə
Bakıda və Parisdə dahi bəstəkar Üzeyir Hacıbəyovun
120 illik yubileyi keçirilmiş, Parisdə YUNESKO çərçivəsində
görkəmli kimyaçı-alim, akademik Yusif Məmmədəliyevin
100 illiyi qeyd olunmuş, dünya şöhrətli musiqi
ifaçıları - mərhum Mstislav Rostropoviç və
xanımı Qalina Vişnevskayanın 50 illik birgə fəaliyyətinə
həsr edilmiş albom və disklər
hazırlanmışdır. Eləcə də Mstislav
Rostropoviçin, Şostakoviçin, Bülbülün
yubileylərinə həsr olunmuş beynəlxalq festivallar
keçirilmişdir. Dahi Üzeyir Hacıbəyovun
"Arşın mal alan" əsərinin Vyana Kamera
Teatrı ilə birgə səhnələşdirilməsi barədə
razılığın əldə edilməsi də
xalqımızın milli mədəniyyətinin dünyada təbliği
yolunda mühüm hadisədir.
"İndi, kütləvi
mədəniyyət stereotiplərinin hakim olduğu bir şəraitdə,
milli ənənələrin qorunub saxlanılması, onlara
qayğı ilə, düşünülmüş münasibət
göstərilməsi son dərəcə vacibdir. YUNESKO-nun
çoxsaylı vəzifələrindən biri də
insanın mənəvi dünyasını qorumaqdır. Odur
ki, planetimizdə məskunlaşmış xalqlardan hər
birinin milli "mən"ini daha parlaq əks etdirən
qeyri-maddi irs incilərinin qorunması ən aktual vəzifəyə
çevrilir" deyən Heydər Əliyev Fondunun prezidenti,
YUNESKO və İSESKO-nun xoşməramlı səfiri Mehriban
xanım Əliyeva Azərbaycan xalqının zəngin milli-mənəvi
irsinin qorunub saxlanılması və gələcək nəsillərə
çatdırılması naminə əzmlə
çalışır.
Humanizm və insanpərvərlik nümunəsi
Heydər Əliyev
Fondunun təşəbbüsü ilə həyata keçirilən
çoxşaxəli layihələri birləşdirən əsas
xətt yüksək humanizm və insanpərvərlikdir. Azərbaycanın
birinci xanımı informasiya texnologiyalarının sürətli
inkişafı dövründə mənəvi-əxlaqi dəyərlərin
yad təsirlərdən qorunmasına daha çox ehtiyac olduğunu
bildirir. Azərbaycan cəmiyyəti onun vətəndaşlara
diqqət və qayğı nümunələri ilə zəngin
olan çoxşaxəli fəaliyyətinə nəzərən
mənəvi dəyərlərin nisbətən
aşındığı indiki "sürət əsrində"
- savab və xeyirxah əməllərin nə qədər
müstəcəb olduğunu dərk edir, özlərinin
yaşam fəlsəfəsini bu ideallara
uyğunlaşdırmağa çalışırlar.
Humanizm prinsipinə
söykənən praktik fəaliyyəti ilə cəmiyyətdə
böyük ictimai nüfuz qazanmış Heydər Əliyev
Fondu bu gün kimsəsiz, köməyə ehtiyacı olan
insanların maddi-mənəvi hamisi rolunda
çıxış edir. Heydər Əliyev Fondu insanlara ən
müxtəlif səviyyələrdə yardım göstərməklə
cəmiyyətdə yalnız sağlam ənənələrin,
zəngin əxlaqi dəyərlərin möhkəmlənməsinə
çalışır. "Bu gün biz müasir texnika və
qloballaşma əsrində yaşayırıq. Fikrimcə, zəmanənin
ən böyük təzadlarından biri ondan ibarətdir ki, əldə
edilən tərəqqi, kommunikasiya imkanları insanların
birləşməsinə, daha sıx ünsiyyət
qurmasına şərait yaratsa da, gerçək həyatda
biganəlik artır, insanlar arasında uçurum artır. Bəzən
nəinki bəşəriyyətin səsini eşitmirik, hətta
qonşu qonşunu eşitmir, qardaş qardaşa kömək əlini
uzatmır. Bu gün dünyanın
qarşılaşdığı ən ağrılı
problemlərdən biri mənəvi idealların
ucuşlaşması, onların saxta ideallarla əvəz edilməsidir"
deyən YUNESKO-nun xoşməramlı səfiri Mehriban
xanım Əliyeva insanları səmimi birlik və həmrəyliyə
çağırır.
Hüquqi dövlət
quruculuğunun fundamental şərtlərindən biri də vətəndaş
cəmiyyəti institutlarının - qeyri-hökumət təşkilatlarının
ictimai münasibətlər sistemində fəal iştirak
imkanlarının təmin edilməsidir. İnkişaf
etmiş dövlətlərin təcrübəsi göstərir
ki, ölkənin ümumi inkişafı ilə bağlı məsələlərin
həllini yalnız dövlətin üzərinə qoymaq
obyektiv yanaşma deyildir. Cəmiyyət üçün
taleyüklü müəyyən məsələlərin həllində
qeyri-hökumət təşkilatları, nüfuzlu,
tanınmış insanlar da fəal mövqe tutmalıdır. Bu
baxımdan YUNESKO və İSESKO-nun xoşməramlı səfiri,
Milli Məclisin deputatı Mehriban xanım Əliyevanın
xeyirxahlıq ruhunda köklənmiş çoxşaxəli fəaliyyəti
cəmiyyət üçün əsl örnək sayıla
bilər. Fondun prezidenti yardım istəyilə ona üz
tutmuş insanların himayədarı, qayğıkeşi kimi
çıxış edir, imkan daxilində onların problemlərinin
həllinə çalışır. Heydər Əliyev
Fonduna üz tutmuş hər bir vətəndaşın
müraciətinə böyük həssaslıq və diqqətlə
yanaşılır, imkan daxilində onun
qayğılarının həllinə yardım göstərilir.
Bu, həm də fondun insan hüquq və
azadlıqlarının müdafiəsində layiqincə
dayanan ictimai təşkilat olduğunu göstərir.
Fondun humanizmə və
insanpərvərliyə əsaslanan fəaliyyəti səhiyyə
sahəsində həyata keçirilən layihələrdə
bir daha parlaq təcəssümünü tapır. Bu layihələr
2004-2009-cu illərdə səhhətindəki problemlər
üzündən əziyyət çəkən minlərlə
insanı yenidən sağlam həyata qaytarmış, onlara həyat
eşqi vermişdir. Bu baxımdan "Diabetli uşaqlara ən
yüksək qayğı" və "Talassemiyasız həyat
naminə" layihələri cəmiyyətdə daha
böyük diqqət və rəğbətlə
qarşılanmışdır. "Diabetli uşaqlara ən
yüksək qayğı" layihəsi Azərbaycan Diabet Cəmiyyəti
və Danimarkanın "Novo Nordisk" şirkəti ilə
birgə əməkdaşlıq nəticəsində həyata
keçirilmişdir. Layihə çərçivəsində
Azərbaycanda diabet xəstəliyinə düçar
olmuş 14 yaşınadək uşaqlar müntəzəm
olaraq lazımi miqdarda insulin preparatları və şpris-qələmlərlə
təmin edilmişlər.
"Talassemiyasız həyat
naminə" layihəsi çərçivəsində isə
bu xəstəlikdən əziyyət çəkən
insanların təhlükəsiz və keyfiyyətli qanla təminatı
üçün könüllü donor xidmətinin inkişaf
etdirilməsi, əhalinin maarifləndirilməsi, prenatal
diaqnostika üsulu ilə xəstəliyin
proqnozlaşdırılması, talassemiya ilə mübarizə
aparan bir sıra dövlətlərlə əməkdaşlığın
genişləndirilməsi və ölkədə yüksək
ixtisaslı kadrların hazırlanması tədbirləri həyata
keçirilmişdir. Talassemiya Diaqnostika Mərkəzinin 2009-cu
il mayın 10-da istifadəyə verilməsi də ulu öndərin
xatirəsinə böyük töhfə olmuşdur.
Heydər Əliyev
Fondunun xəttilə Əzizbəyov rayonunun Türkan və
Zirə qəsəbələrində poliklinika, təcili
yardım stansiyası, aptek, Şüvəlan qəsəbəsində
xəstəxana, İsmayıllı rayonunun İvanovka kəndində
poliklinika yenidən qurulmuş və avadanlıqla təchiz
olunmuşdur. Almaniyanın "Fresenius Medical Care" şirkətinin
Heydər Əliyev Fonduna hədiyyə etdiyi 10 ədəd
hemodializ aparatı və "Storz" şirkətinin hədiyyəsi
olan endoskopik avadanlıq tibb müəssisələrinə
verilmişdir.
Eləcə də
Fransanın "Servye" şirkəti tərəfindən
fonda verilmiş "Diabeton MR" preparatları diabetdən əziyyət
çəkən insanlara paylanmışdır.
Fond uşaqların
müayinə və müalicəsi üçün geniş
mərkəzin zəruriliyini nəzərə alaraq 2009-cu ildə
Bakı şəhərində Psixo-nevroloji Uşaq Mərkəzinin
inşasını da təmin etmişdir. Ümumiyyətlə,
Heydər Əliyev Fondu səhiyyə məsələləri
ilə bağlı hər bir müraciəti diqqətlə
araşdırır, onlara kömək göstərilməsi
üçün tibb müəssisələri ilə sıx əlaqə
qurur.
Regional inkişafa töhfə
Heydər Əliyev
Fondunun prezidenti, YUNESKO və İSESKO-nun xoşməramlı
səfiri Mehriban xanım Əliyeva 2005-ci ildən Milli Məclisin
deputatı kimi seçicilərini qayğılandıran
problemlərin həllində yaxından iştirak edir, ona
ünvanlanan bütün müraciətlərə həssaslıqla
yanaşır. Mehriban xanım Əliyevanın təşəbbüsü
ilə "Əzizbəyov rayonunun İnkişaf Fondu"nun
yaradılması və Ədliyyə Nazirliyində qeydiyyatdan
keçərək əməli fəaliyyətə
başlaması rayonun inkişafında keyfiyyətcə yeni mərhələnin
əsasını qoymuşdur.
2004-2009-cu illərdə
fondun xəttilə Əzizbəyov rayonunun Zirə, Binə,
Türkan, Qala və digər qəsəbələrində
yollar çəkilmiş, Binə qəsəbəsində
elektrik yardımçı stansiyası bərpa edilmiş,
habelə qəsəbələrin su təchizatı
yaxşılaşdırılmış, abadlıq-quruculuq
işləri həyata keçirilmişdir. Fondun maliyyə vəsaiti
hesabına dini və tarixi-mədəniyyət abidələrinin
ətraf ərazisi abadlaşdırılmış,
insanların asudə vaxtlarını səmərəli
keçirməsi üçün parklarda lazımi şərait
yaradılmışdır. Əzizbəyov rayonunun Mərdəkan
qəsəbəsində kütləvi kitabxanada yenidənqurma
işləri aparılmış, Pirhəsən ziyarətgahının
yenidən qurulması ilə bağlı işlər başa
çatmışdır.
Fondun prezidenti Mehriban
xanım Əliyeva respublikanın hər bir bölgəsinə,
eyni zamanda paytaxt rayonlarına xüsusi diqqət və
qayğı ilə yanaşır, sosial infrastrukturun yeniləşdirilməsi
ilə bağlı həyata keçirilən dövlət
siyasətinə töhfəsini verir. Regional inkişafa xidmət
edən sosial layihələr sırasında Qaradağ rayonu
Lökbatan qəsəbəsində 20 min sakinin su təminatının
yaxşılaşdırılmasına imkan verən su kəmərinin
çəkilişini, Şamaxı rayonunda müvəqqəti
məskunlaşmış məcburi köçkün ailələri
üçün 16 mənzilli yaşayış
binasının inşasını, istilik sistemi, ev əşyaları
və zəruri avadanlıqla təmin edilməsini xüsusi
qeyd etmək lazımdır.
Fondun respublikanın
bütün regionlarını, hətta ən ucqar kəndləri
əhatə edən layihələri isə, əsasən, təhsillə
bağlı olmuşdur. Təhsil infrastrukturunu yeniləşdirmədən,
müasir tipli yeni məktəblər inşa etmədən, təlim-tədris
prosesinə lazımi şərait yaratmadan, dünya ölkələrinin
mütərəqqi təhsil ənənələrini nəzərə
almadan bu məqsədlərə nail olmaq da
qeyri-mümkündür. Azərbaycanın birinci
xanımının birbaşa təşəbbüsü ilə
həyata keçirilən "Yeniləşən Azərbaycana
yeni məktəb" layihəsi bu baxımdan cəmiyyətdə
daha böyük əks-səda doğurmuşdur. Layihə
çərçivəsində yalnız 2005-ci ildə Azərbaycanın
ən müxtəlif bölgələrində rekord sayda - 132,
sonrakı mərhələdə isə 100-dən artıq
yeni məktəb binasının tikilərək istifadəyə
verilməsi və lazımi avadanlıqlarla təchiz
olunması dövlətin bu sahədə həyata
keçirdiyi işlərə əvəzsiz töhfədir.
"İnsan doğularkən
verilən ad onun bütün taleyinə təsir göstərir.
Deyə bilmərəm, bu nəzəriyyə real həyatda
özünü nə dərəcədə doğruldur, amma
yaxşılıq, mərhəmət kimi anlayışlar mənim
üçün, həqiqətən, ümdə
anlayışlardır. Hər zaman öz fəaliyyətimdə
çalışmışam ki, bir neçə amala əsaslanım.
Bunlar vətənpərvərlik, insansevərlik və mərhəmətdir"
deyən Heydər Əliyev Fondunun prezidenti Mehriban xanım Əliyeva
ulularımızdan bizə miras qalan ali mənəvi dəyərləri
öz fəaliyyətində yaşatmaqla həyatını
xalqa həsr edən maarifpərvər
ziyalılarımızın, nurlu insanlarımızın yolunu
uğurla davam etdirir. Bu məsuliyyətli seçim ulu öndər
Heydər Əliyevin müəyyənləşdirdiyi, onun
layiqli siyasi davamçısı - Azərbaycan
Respublikasının Prezidenti İlham Əliyevin böyük
müvəffəqiyyətlə davam etdirdiyi strateji siyasət kursunun
həyata keçirilməsinə, bu siyasətin hər bir vətəndaşın
həyatında hiss olunmasına dəstək verməyə
yönəlmişdir.
Gülağa TƏNHA,
xeyriyyəçi-şair
Azərbaycan.- 2009.- 23 avqust.- S. 3.