Azərbaycanın bölgələri tarazlı inkişaf edir

Azərbaycanda son beş il yarımda uğurla davam etdirilən iqtisadi siyasət xətti ölkənin hər bir vətəndaşının maddi rifah halının daha da yaxşılaşdırılmasına, dünya iqtisadiyyatına sıx inteqrasiyaya geniş imkanlar açmışdır. Ölkənin təbii sərvətlərindən, əlverişli coğrafi-strateji mövqeyinin üstünlüklərindən milli mənafelərimizə uyğun şəkildə istifadə edilməsi, irimiqyaslı qlobal layihələrin həyata keçirilməsi sahəsində böyük nəticələr əldə edilmişdir. Belə iqtisadi layihələrin həyata keçirilməsində aparıcı rol oynayan Azərbaycan yerləşdiyi regionda lider dövlət statusunu qoruyub saxlamışdır.

Azərbaycanın siyasi, iqtisadi, ictimai və mədəni həyatının bütün sahələrində həyata keçirilən kompleks islahatlar bugünkü uğurları şərtləndirmişdir. Dövlət başçısı İlham Əliyev prezidentlik səlahiyyətlərinin icrasına başladığı ilk gündən bildirmişdir ki, demokratik dövlət insanların birgə fəaliyyətinin təşkili və tənzimlənməsinin mühüm şərti, onların qarşılıqlı münasibətlərinin qaydaya salınmasının, cəmiyyətdə nizam-intizamın və sabitliyin başlıca təmini vasitəsidir. Bu yolla irəliləyən dövlətlərin əksəriyyətində ictimai-siyasi sabitliyin möhkəm təmələ söykənməsi, insanların iqtisadi azadlığı, yüksək maddi rifah halı, vətəndaş-cəmiyyət münasibətlərinin ahəngdarlığı, şəxsiyyətin mənafelərinin, hüquq və azadlıqlarının maksimum səviyyədə qorunması, qanunun aliliyi prinsipinə bütün səviyyələrdə əməl olunması demokratiyanın optimal idarəetmə üsulu kimi dominantlığını təmin etmişdir. Həyatın bütün sahələrində dövlətin hüquqi bazasının möhkəm təməllər üzərində qurulması, ictimai ədalət prinsiplərinə ciddi riayət olunması həmin dövlətdə sabitliyin, vətəndaş həmrəyliyinin və dinamik iqtisadi inkişafın başlıca təminatlarından biridir.

Müasir dövrdə demokratiyanın inkişafı, qanunçuluğun təminatı həm də sosial rifah, iqtisadi tərəqqi amilləri ilə şərtlənir. Müasir politoloji nəzəriyyələr də birmənalı təsdiqləyir ki, hər bir dövlətdə demokratikləşmə prosesinin inamla həyata keçirilməsi, insan hüquq və azadlıqlarının etibarlı təminatı üçün ilk növbədə insanın azadlığını təmin edən iqtisadi mühit olmalıdır.

Azərbaycan ümumi daxili məhsulun artım tempinə görə dünyada yenə də birinciliyini qoruyub saxlayır. Dünyanın iqtisadi cəhətdən ən qüdrətli dövlətlərinə qlobal maliyyə böhranı ciddi təsir göstərsə də, Azərbaycan rəhbərliyinin gördüyü qabaqlayıcı tədbirlər və uğurlu iqtisadi siyasət strategiyasınn nəticəsində ölkəmiz bu böhrandan yan keçə bildi. Prezident İlham Əliyev bildirmişdir: "Təxminən bir ilə yaxındır ki, dünyanın əksər ölkələrində ciddi iqtisadi problemlər yaşanır.

Azərbaycanda isə iqtisadiyyat uğurlu inkişafında davam edir. Bu ilin birinci yarısında ümumi daxili məhsul 3,6 faiz artmışdır. Çox sevindiricidir ki, qeyri-neft sektorunda artım 4,1 faiz təşkil etmişdir. Bu, çox gözəl göstəricidir və onu göstərir ki, bizim iqtisadiyyatımız və ümumiyyətlə, ölkəmizin gələcəyi neft amilindən daha az asılıdır. Əlbəttə, neft-qaz sektorunun inkişafı, bu sahədə görülən işlər bizim iqtisadi imkanlarımızı böyük dərəcədə genişləndirmişdir. Biz də bu gözəl imkanlardan səmərəli istifadə etdik və iqtisadiyyatımızın digər sektorlarının inkişafı üçün əməli-praktik işlər görülmüşdür.

İlin birinci yarısında sosial məsələlərin həlli də uğurla davam edir, bütün sosial proqramlar həyata keçirilir. Məktəb, xəstəxana tikintisi, digər sosial proqramlar icra edilir. Ünvanlı sosial yardım alan insanların sayı 800 minə çatmışdır və orta hesabla hər bir ailəyə yüz manat yardım göstərilmişdir. Bu da çox böyük məbləğdir və çətin vəziyyətdə yaşayan soydaşlarımızın sosial vəziyyətinin yaxşılaşdırılması üçün Azərbaycan dövləti tərəfindən görülən konkret tədbirdir".

Prezident İlham Əliyev tərəfindən təsdiq edilən sosial-iqtisadi inkişaf proqramlarının uğurla davam etdirilməsi əhalinin rifah halının yüksəlməsinə, bölgələrin tarazlı inkişafına, yeni infrastrukturların yaradılmasına, sahibkarlıq mühitinin genişləndirilməsinə geniş imkan açmışdır. Son beş ildə ölkə üzrə yeni yaradılan müəssisələrin 40 faizinin, iş yerlərinin isə 80 faizinin regionların payına düşməsi deyilənləri bir daha təsdiq edir. 2004-2008-ci illəri əhatə edən regional inkişaf proqramının keyfiyyətlə icra olunması nəticəsində bütün rayonların siması dəyişmiş, paytaxtla bölgələr arasında kəskin inkişaf fərqi aradan qaldırılmışdır. Proqramda qarşıya qoyulan vəzifələrin layiqincə yerinə yetirilməsi və son beş ildə bütün sahələrdə əldə olunmuş yüksək nailiyyətlər 2009-2013-cü illəri əhatə edən yeni Dövlət Proqramının hazırlanmasını labüd etmişdir. Prezident İlham Əliyevin təsdiq etdiyi respublikanın regionlarının sosial-iqtisadi inkişafına dair II Dövlət Proqramı qarşıdakı illərdə dinamik inkişafın davam etdirilməsinə, investisiya mühitinin daha da yaxşılaşdırılmasına, qeyri-neft sektorunun inkişafının sürətləndirilməsinə, əhalinin sosial durumunun daha da yaxşılaşdırılmasına imkan yaradacaqdır. Dövlət Statistika Komitəsinin verdiyi məlumata görə, cari ilin yanvar-iyun ayları ərzində ölkədə 36 min 565 yeni iş yeri açılmışdır. Bu müddət ərzində iş yerlərinin 13,3 faizi yeni, 15,2 faizi mövcud, 0,9 faizi fəaliyyətini bərpa edən müəssisələrdə, 70,6 faizi isə fiziki şəxslər tərəfindən açılmışdır. Yeni açılan iş yerlərinin 71,1 faizinin regionların payına düşməsi aparılan iqtisadi siyasət strategiyasının məqsədyönlülüyündən xəbər verir.

Makroiqtisadi nailiyyətlər müxtəlif sahələrdə sosial rifaha, iqtisadi azadlığa və səmərəli təşəbbüskarlığa yönələn, hər bir vətəndaşın həyatında kardinal dəyişikliklərlə müşayiət olunan, demokratik islahatların dərinləşdirilməsi yolu ilə insan amilinin inkişafına xidmət edən liberal islahatları dinamizmlə gerçəkləşdirmək imkanı yaradır. Bazar iqtisadiyyatı prinsiplərinin cəmiyyətdə özünə dayaqlar tapması, özəl sektorun inkişafına yaradılmış şərait, iqtisadiyyatın liberallaşdırılması uğurlu iqtisadi siyasətin müsbət nəticələridir. Ölkədə minimum əməkhaqlarının, büdcə təşkilatlarında çalışan işçilərin məvaciblərinin, sosial pensiya və müavinətlərin davamlı artırılması dövlətin vətəndaşlara olan diqqət və qayğısının bariz təcəssümüdür.

Ölkəmizdə iqtisadi islahatların uğurla aparılması və əldə olunan müsbət irəliləyişlər nüfuzlu beynəlxalq maliyyə qurumlarının hesabatlarında da əks olunmuşdur. Azərbaycanın iqtisadi potensialının ildən-ilə artması iqtisadiyyatımıza daha böyük həcmdə xarici investisiyaların yatırılmasına geniş imkanlar açmışdır. Dünyanı bürüyən maliyyə böhranına baxmayaraq, nüfuzlu şirkətlərin ölkə iqtisadiyyatına investisiya yatırmaları Azərbaycanda əlverişli biznes mühitinin olduğunu sübuta yetirir. Bu ilin yeddi ayının makroiqtisadi nəticələri göstərir ki, Azərbaycan iqtisadiyyatı davamlı inkişaf edir.

E.HACIALIYEV

Azərbaycan.- 2009.- 25 avqust.- S. 1.