Azərbaycan
Respublikasının Auditorlar Palatası ilə
Rumıniyanın Maliyyə Auditorları Palatası arasında
bu il mayın 5-də Bakıda imzalanmış Anlaşma
memorandumu iki dost ölkənin müstəqil maliyyə nəzarəti
qurumları arasında peşə əlaqələrinin
intensivləşdirilməsi üçün əsas
olmuşdur. O cümlədən Anlaşma memorandumuna uyğun
olaraq, palataların əməkdaşlarının və
üzvlərinin milli səviyyədə peşə ilə
bağlı təşkil edilən tədbirlərdə -
seminar və konfranslarda iştirakı barədə öhdəlik
artıq reallaşdırılmağa
başlanmışdır. İlk addım olaraq, Azərbaycan
Respublikası Auditorlar Palatasının üzvü, "RM*LM
Audit Ltd" məhdud məsuliyyətli cəmiyyətinin
auditoru İsmət Cabbarov bu günlərdə Rumıniya
Maliyyə Auditorları Palatasının təşkil etdiyi
beynəlxalq elmi-praktik konfransda iştirak etmişdir.
İ.Cabbarov konfransla əlaqədar demişdir:
- Ən əvvəl,
qeyd etməliyəm ki, konfransın ümumi plenar iclası
Rumıniyanın Kluj-Napoka şəhərindəki "Opera
Plaza" hotelinin iclas salonunda oldu. Rumıniya Maliyyə
Auditorları Palatasının prezidenti, professor İon
Mihailesku giriş nitqində konfransın məqsədi barədə
məlumat verdi, qonaqları salamlayaraq, onları təqdim etdi. ACCA-nın
sədr müavini Mark Qold, Dünya Bankının Maliyyə
Hesabatı İslahatları Mərkəzinin rəhbəri Con
Hegarty, ACCA-nın Cənub-Şərqi Avropa üzrə rəhbəri
Andrea Manea, Avropa Mühasiblər və Auditorlar
Federasiyasının prezidenti Federiko Diomenda, Belçika Məcburi
Auditorlar İnstitutunun prezidenti Pyer Berger və baş katibi
David Şafran və başqlarının konfransda
iştirakı müzakirə mövzusunun - "Maliyyə
auditi peşəsində milli və beynəlxalq ünsürlər"
- aktuallığından və konfransa peşəkar maraqdan xəbər
verirdi.
Plenar iclasın əsas
mövzusu "İdarəçilik və ictimai nəzarət"
idi. Bu mövzu ətrafında çox maraqlı məruzələr
səsləndirildikdən sonra konfrans "Keyfiyyətə nəzarət",
"Etika məcəlləsi", "Peşəkar təhsil",
"Qlobal iqtisadi böhran və auditorun məsuliyyəti",
"Peşəkar davranış və intizamla bağlı təhqiqatlar"
və "Cənub-Şərqi Avropada peşə ilə
bağlı cari məsələlər" mövzuları
üzrə bölmə iclaslarında işini davam etdirdi.
Mən "Qlobal iqtisadi
böhran və auditorun məsuliyyəti" bölməsində
çıxış edərək, qlobal iqtisadi
böhranın Azərbaycana təsirini minimuma endirmək
üzrə dövlətimizin başçısı cənab
İlham Əliyevin yeritdiyi siyasətin uğurlu nəticələrindən,
şəffaflığın artırılması və
korrupsiyaya qarşı mübarizə sahəsində həyata
keçirilən ardıcıl tədbirlər, bu prosesdə
auditorların iştirakı barədə məlumat verdim.
Mənim
çıxışım, xüsusən qlobal böhrana
qarşı Azərbaycanın dayanıqlılığı
ilə bağlı məqamlar iştirakçıların
böyük marağına səbəb oldu. Yekun plenar
iclasına sədrlik edən keçmiş sovet və Şərqi
Avropa ölkələri arasında Azərbaycanın
özünəməxsus uğurlu inkişaf strategiyasına
toxundu, bu strategiyanın ulu öndər Heydər Əliyev tərəfindən
müəyyənləşdirildiyini və hazırda Prezident
İlham Əliyev tərəfindən uğurla həyata
keçirildiyini xüsusi qeyd etdi.
Konfransdan kənar vaxtda
ayrı-ayrı nümayəndələrlə maraqlı
görüşlərimiz, söhbətlərimiz oldu və
bütün bunlar məndə xoş təəssürat
oyatdı.
Azərbaycan.- 2009.- 26 avqust.- S. 3.