"Fərqli olsaq da, birlikdəyik" layihəsinin yekunlarına dair mətbuat konfransı keçirilmişdir

Avqustun 26-da Azərbaycan Media Mərkəzində Gənclər üçün Təhsil Mərkəzinin Avropa Şurası Gənclər Fondunun maliyyə dəstəyi ilə keçirilən "Fərqli olsaq da, birlikdəyik" layihəsinin yekunlarına dair mətbuat konfransı keçirilmişdir.

Gənclər üçün Təhsil Mərkəzi ötən aydan başlayaraq Avropa Gənclər Fondunun maliyyə dəstəyi ilə həyata keçirilən layihə çərçivəsində Azərbaycanın müxtəlif regionlarında yaşayan milli azlıqlar üçün təlim proqramının icrasına başlamışdır. Belə ki, mərkəz 25 nəfər müxtəlif milli azlıq qrupundan olan gənci Bakıda bir araya gətirmişdir.

Əsas məqsədi milli azlıqlardan olan gənclərin vətəndaş cəmiyyətinin inkişafı prosesində rolunu artırmaq, onların QHT idarəçiliyi, layihələrin yazılması və idarə edilməsi, liderlik qabiliyyətlərinin inkişafı istiqamətində təlimatlandırılması və aktiv vətəndaşlıq dəyərlərinin aşılanması olan təlimin avqustun 27-də başa çatması nəzərdə tutulmuşdur.

Gənclər üçün Təhsil Mərkəzinin təsisçisi Vüsal Quliyev mətbuat konfransı zamanı qeyd etmişdir ki, layihə çərçivəsində regionlarda da təlim proqramları təşkil olunmuş və təlim keçmiş gənclər vasitəsilə yerlərdə milli azlıqlardan olan gənclərin iştirakı ilə kiçik layihələr həyata keçirilmişdir.

AzərTAc

Azərbaycan.- 2009.- 27 avqust.- S. 2.