Oğuzda 1-ci Foto və Sənət düşərgəsi açılmışdır

"İrəli" İctimai Birliyi və "iStudio" bədii foto məktəbinin təşkilatçılığı ilə avqustun 26-dan 29-dək Oğuz rayonunda 1-ci Foto və Sənət düşərgəsi keçirilir. Azərbaycanda ilk dəfə keçirilən düşərgədə incəsənət, bədii yaradıcılıq sahəsində xüsusi istedada malik olan 40 fəal gənc iştirak edir.

Avqustun 27-də Oğuz şəhərindəki AFRA otelinin konfrans zalında düşərgənin rəsmi açılış mərasimi olmuşdur. Tədbiri giriş sözü ilə açan "İrəli" İctimai Birliyinin sədri Ceyhun Osmanlı bildirmişdir ki, düşərgənin məqsədi sənət yönümlü yaradıcı gənclərə peşəkar təlimçilər tərəfindən təlimlərin keçirilməsi, onları maraqlandıran layihələrin müəyyən olunub dəstəklənməsi üçün mexanizmlərin araşdırılması, yaradıcı gənclərin sayının artırılması, bu istiqamətdə yeni layihələrin reallaşdırılmasıdır. Bu layihə qurum tərəfindən cari ilin yay aylarında, yəni iyunun 1-dən indiyədək reallaşdırılan sayca 26-cı düşərgədir. Düşərgələrin 17-si "İnformasiya Texnologiyaları Akademiyası" layihəsi ilə bağlı olmuşdur. Bundan əlavə, arxeoloji və beynəlxalq düşərgələr, habelə gənc liderlər üçün yay universiteti təşkil olunmuşdur. Növbəti düşərgə isə regionlardan olan gənclərin də iştirak edəcəyi liderlik və idarəetmə düşərgəsi olacaqdır.

Qurumun sədri bildirmişdir ki, bu layihə digərlərindən onunla fərqlənir ki, onun iştirakçıları sənətə, fotoya bağlı olan, istedadlıq qabiliyyəti ilə seçilən yaradıcı gənclərdir.

Tədbirdə "iStudio" bədii foto məktəbinin direktoru İsa Aydın çıxış edərək iştirakçılara keçirilən təlimlərdə fəal olmağı tövsiyə etmiş, düşərgənin işinə uğurlar arzulamışdır.

Tədbirin ilk günü gənclərə "Foto sənətinin tarixi" mövzusunda mühazirə keçirilmiş, eyni zamanda peşəkar fotoqrafın riayət etməli olduğu texniki biliklər aşılanmışdır. Daha sonra gənclər qruplara bölünərək interaktiv təlimlərdə iştirak etmişlər.

Düşərgədə olduqları müddətdə iştirakçılar Oğuz rayonu, onun təbiəti ilə də yaxından tanış olacaqlar.

AzərTAc

Azərbaycan.- 2009.- 28 avqust.- S. 3.