Azərbaycanla Suriya arasında ikili vergitutma ləğv ediləcək

Azərbaycan və Suriya hökumət nümayəndələri ikili vergitutmanın ləğvi, eləcə də vergidən yayınmaların qarşısının alınması ilə bağlı növbəti danışıqlar aparıblar.

Vergilər Nazirliyi mətbuat xidmətinin yaydığı məlumata görə, hər iki tərəf sözügedən məsələlər üzrə işləri Suriya Prezidenti Bəşər Əl-Əsədin Azərbaycana səfərindən sonra sürətləndiriblər. Belə ki, Suriya Maliyyə Nazirliyinin nümayəndələri ötən həftə Bakıya səfərləri zamanı azərbaycanlı həmkarları ilə saziş layihəsinin maddələrini müzakirə ediblər. Tərəflər layihənin əsas maddələri üzrə prinsipial razılığa gəliblər. Nümayəndə heyətinin başçısı Naim Əlməsri danışıqlar prosesini uğurlu qiymətləndirib: "Bu saziş hər iki ölkənin investorları üçün vacibdir. Bizim iş adamları Azərbaycana sərmayə qoymağı planlaşdırırlar və bu sazişsiz onu etmək çətindir. Güman edirəm ki, saziş qısa zamanda hazır olacaq".

Danışıqların sonunda tərəflər memorandum imzalayıblar və növbəti - sonuncu danışıqların Suriyada keçirilməsi ilə bağlı razılığa gəlinib.

Xatırladaq ki, Suriya Prezidenti Bəşər Əl-Əsədin ötən ay Bakıya rəsmi səfəri çərçivəsində suriyalı 200 iş adamının iştirakı ilə biznes-forum keçirilmişdir. Səfər zamanı hər iki ölkənin prezidentlərinin iştirakı ilə "İnvestisiyaların dəstəklənməsi və müdafiəsi haqqında" müqavilə də imzalanmışdır.

Məlumat üçün bildirək ki, Azərbaycan ikili vergitutmanın ləğvi və vergidən yayınmaların qarşısının alınması üzrə 39 ölkə ilə saziş imzalayıb. 28 ölkə ilə həmin saziş artıq işləyir.

Azərbaycan.- 2009.- 29 avqust.- S. 3.