Azərbaycan Prezidenti İlham Əliyev Avropa Şurasının baş katibi Terri Devisi qəbul etmişdir

Azərbaycan Respublikasının Prezidenti İlham Əliyev dekabrın 2-də Avropa Şurasının baş katibi Terri Devisi qəbul etmişdir.

Görüşdə Bakıda Avropa Şurasının üzvü olan dövlətlərin mədəniyyət nazirlərinin "Mədəniyyətlərarası dialoq Avropa və onun qonşu regionlarında davamlı inkişafın və sülhün əsasıdır" mövzusunda keçirilən konfransın əhəmiyyəti vurğulandı. Bu cür tədbirlərin ölkələr və xalqlar arasında əlaqələrin möhkəmlənməsində və beynəlxalq əməkdaşlığın genişləndirilməsində rolu qeyd olundu.

Söhbət zamanı həmçinin Azərbaycanla Avropa Şurası arasında əlaqələrin müxtəlif sahələrdə inkişaf etdiyi bildirildi. Avropa Şurasının baş katibi Terri Devisin ölkəmizə bu səfərinin əməkdaşlığın daha da möhkəmlənməsinə töhfə verəcəyinə əminlik ifadə olundu.

AzərTAc

Azərbaycan.-2008.-3 dekabr.-S.1.