Azərbaycan Avropa Şurası üçün xüsusi maraq doğuran ölkədir

AzərTAc xəbər verir ki, dekabrın 2-də ədliyyə naziri, Məhkəmə-Hüquq Şurasının sədri Fikrət Məmmədov Azərbaycanda səfərdə olan Avropa Şurasının baş katibi Terri Devis ilə görüşmüşdür.

Ölkəmizdə həyata keçirilən demokratik dəyişikliklər, Azərbaycanın Avropa Şurası qarşısında götürdüyü öhdəliklərin yerinə yetirilməsi, o cümlədən məhkəmə sisteminin müasirləşdirilməsi üzrə görülən genişmiqyaslı işlər barədə məlumat verən nazir bu islahatların Avropa Şurası ilə intensiv və səmərəli əməkdaşlıq şəraitində aparıldığını xüsusi qeyd etmişdir.

Azərbaycanın Avropa Şurası üçün xüsusi maraq doğuran ölkə olduğunu bildirən Terri Devis, respublikamızda gedən islahatlara bundan sonra da hər cür dəstək verməyə hazır olduğunu vurğulamışdır.

Görüşdə əməkdaşlığın perspektivləri, söz və mətbuat azadlığı, korrupsiyaya qarşı mübarizə, məhkumların hüquqlarının qorunması, əfv institutunun tətbiqinə dair ətraflı müzakirələr aparılmış, qarşılıqlı maraq doğuran məsələlərə aydınlıq gətirilmişdir.

Azərbaycan.- 2008.-3 dekabr.-S.3.