Azərbaycan Respublikasının Baş naziri Artur Rasizadə Moskvanın və bütün Rusiyanın patriarxı II Aleksinin vəfatı ilə əlaqədar başsağlığı vermişdir

AzərTAc xəbər verir ki, Rusiyanın Azərbaycandakı səfirliyində Moskvanın və bütün Rusiyanın patriarxı II Aleksinin vəfatı ilə əlaqədar matəm kitabı açılmışdır.

Azərbaycan Respublikasının Baş naziri Artur Rasizadə dekabrın 9-da patriarx II Aleksinin vəfatı ilə əlaqədar başsağlığı vermək üçün səfirliyə gəlmişdir. Baş nazir Azərbaycan dövləti və hökuməti adından başsağlığı vermiş, matəm kitabına ürək sözlərini yazmışdır.

Diplomatik nümayəndəliyə gələn Azərbaycanın dövlət və hökumət rəsmiləri, xarici ölkələrin Bakıdakı səfirləri, ictimaiyyətin nümayəndələri də patriarx II Aleksinin vəfatından kədərləndiklərini bildirmiş, matəm kitabına başsağlığı sözlərini yazmışlar.

Rusiyanın ölkəmizdəki səfiri Vasili İstratov vurğulamışdır ki, patriarx II Aleksi Azərbaycan ilə Rusiyanın ənənəvi dostluq əlaqələrinin inkişafına, xalqlarımız arasında qarşılıqlı anlaşma və etimadın möhkəmlənməsinə sanballı töhfə vermişdir.

Moskvanın və bütün Rusiyanın patriarxı II Aleksi dekabrın 5-də vəfat etmişdir. Öz əvəzsiz xidmətləri ilə həm Rusiyada, həm də beynəlxalq aləmdə iz qoymuş patriarx II Aleksinin xatirəsi dünyanın müxtəlif ölkələrini əhatə edən milyonlarla insanın qəlbində əbədi yaşayacaq və hörmətlə yad ediləcəkdir.

Azərbaycan.-2008.-11 dekabr.-S.1.