Azərbaycanın Silahlı
Qüvvələri Cənubi Qafqazda ən güclü,
hazırlıqlı və təminatlı ordudur
Müsahibimiz Müdafiə
Nazirliyi mətbuat xidmətinin rəisi, polkovnik-leytenant Eldar
SABİROĞLUDUR
- Bu gün Azərbaycanda ordu quruculuğu prosesi daha
sistemli hal alıb. Bu sahədə son dövrlərdə əldə
edilən hansı yeni nailiyyətlər var?
- İndi bizim ordumuz 90-cı
illərin əvvəllərindən tamamilə fərqlənir.
Əgər müqayisə aparsaq, o zaman aydın görərik
ki, haradan haraya gəlib çıxmışıq.
Doğrudur, çətin yol olub, amma ordumuz bunu keçə
bilib! Burada ümummilli lider Heydər Əliyevin müstəsna
xidmətlərini, sarsılmaz iradəsini xüsusilə qeyd
etmək istərdim. Çətin şəraitdə,
ağır tələblər qarşısında, xarici təzyiqlərin
sağdan-soldan sanki qaya parçalarını Azərbaycanın
üzərinə səpələdiyi bir zamanda ordu
quruculuğu prosesini başlamaq və onu təkidlə davam
etdirmək çox da asan deyildi. Ordunun pərakəndə
şəkildə, ayrı-ayrı silahlı dəstələr
halında fəaliyyət göstərməsi hamıya məlum
idi. Bunu vahid komandanlıq formasına gətirmək ən
başlıca vəzifə kimi qarşıda dururdu. Əks təqdirdə
bugünkü inkişaf etmiş orduya sahib ola bilməzdik. Heydər
Əliyevin göstərmiş olduğu böyük səylər
xalqı narahat edən bu problemdən xilas etdi, ordunun idarə
edilməsi vahid komandanlıq altına alındı. Mən bu
prosesi Silahlı Qüvvələrimiz üçün tarixi
nailiyyət hesab edirəm! Bütün inkişaf da bundan sonra
başlamışdır.
İndi Milli Ordumuz Cənubi
Qafqazda ən güclü ordu hesab olunur. İstər
maddi-texniki, istərsə də əsgərin döyüş
ruhuna görə uğurlarımız ilbəil artır. Bu məsələdə
dövlətimizin, Silahlı Qüvvələrin Ali Baş
Komandanı, Prezident İlham Əliyevin diqqət və
qayğısını hər an hiss edirik. Bircə faktı
söyləmək mənə belə gəlir ki, çox mətləblərə
aydınlıq gətirmiş olar. Bu, müdafiə xərcləri
ilə əlaqədardır. 10-15 il əvvəl bu barədə
nikbin danışa bilməzdik. Çünki ölkəmizin
iqtisadi səviyyəsi hələ öz yerini tapa bilməmişdi.
İndi isə sürətli iqtisadi inkişaf bütün sahələri
dirçəltdiyi kimi, ordumuzun yüksəlişinə də
böyük təkan vermişdi. Əgər 2003-cü ildə
müdafiə xərcləri cəmi 163 milyon dollar təşkil
edirdisə, 2008-ci ildə bu rəqəm 1 milyard 850 milyon
dollara çatdırılmışdır. Ümumiyyətlə
isə, 2003-2008-ci illərdə hərbi məqsədlər
üçün 4,5 milyard dollar vəsait sərf edilmişdir.
Fərq, tərəqqi göz qabağındadır! Bu rəqəmlər
hərbi qulluqçularımızın sosial şəraitinin
yaxşılaşdırılması, yeni hərbi
infrastrukturun yaradılmasından tutmuş, ordunun müasir
silahlarla təmin edilməsinədək bütün zəruri
məsələləri əhatə edir. Bu gün ordu
üçün nə tələb olunursa, dövlətimiz
onu edir.
- Yeri gəlmişkən, bir
məsələyə toxunmaq istərdik. Bizim
torpaqlarımız təcavüzə məruz qalıb. Belə
bir vəziyyətdə ölkənin hərbi qüdrətinin
artması tamamilə anlaşılandır. Lakin bəzi xarici
dairələr, xüsusilə də Ermənistan hakimiyyəti
bundan narahatdırlar. Müdafiə Nazirliyinin buna münasibəti
necədir?
- Bəli, bu cür
yanaşma var. Bəs Azərbaycan nə etməlidir?
Torpağının 20 faizi işğal altındadır, onun
azad edilməsi üçün hansısa tədbirlər
görməlidir, ya yox? Belə mülahizələr irəli
sürənlər böyük səhvə yol verirlər! Həmin
fikirləri səsləndirən bəzi xarici ölkə
nümayəndələrinin vətənində Dağlıq
Qarabağ kimi ağır problemləri yoxdur, yaxud
torpaqlarının 1 qarışı belə təcavüz
altında deyil! Onda sual doğur, nədən özləri hərbi
büdcələrini ildən-ilə artırırlar? Buna bir
lüzum varmı? Azərbaycan müharibə etmək arzusunda
deyil, yaxşı olar ki, münaqişə dinc yolla həllini
tapsın. Lakin göründüyü kimi, illər uzunu bu, bir
səmərə vermir.
- Regionda baş verən son hərbi
olaylar kontekstində bizim Silahlı Qüvvələrimiz
hansı nəticələr əldə etdi?
- Əlbəttə, son hadisələr
region üçün çox ağrılı keçdi,
Rusiya-Gürcüstan arasında gedən iki-üç
günlük savaş demək olar ki, bölgədə yeni hərbi-siyasi
vəziyyət yaratdı. Lakin Azərbaycan rəhbərliyinin,
şəxsən cənab İlham Əliyevin milli
maraqlarımıza tam cavab verən qətiyyətli mövqeyi,
düşünülmüş siyasəti ölkəmizin təməl
prinsiplərini bir daha, özü də daha güclü şəkildə
qoruyub saxlaya bildi. Qeyri-sabit bir regionda Azərbaycanı hər
cəhətdən sabit ölkə kimi qoruyub saxlamaq və
inkişaf etdirmək inanın ki, elə də asan məsələ
deyil, olduqca çətindir. Cənab prezidentin rəhbərliyi
altında Azərbaycan ordusu hər cür ekstremal vəziyyətə
hazırdır. Onu indi qorxutmaq mümkün deyil...
- Bu gün Azərbaycan
Ordusunda mənəvi ab-hava, əsgərlərin hərbi vətənpərvərlik
əhval-ruhiyyəsi barədə nə demək olar?
- Toxunduğunuz məsələ
hədsiz əhəmiyyət kəsb edən amildir. Bir
anlığa təsəvvür edin ki, hər şey -
lazım olan bütün silah-sursat var, lakin əsgərin
döyüş ruhu yoxdur. Ona görə də birinci növbədə
hansı orduda olur-olsun, orada əsgərin vətənpərvərlik
hissləri, duyğuları hər şeydən qabaqda
durmalıdır. Bu mənada Azərbaycan xalqı öz
ordusundakı mənəvi mühitdən, əhval-ruhiyyədən
arxayın ola bilər. Müdafiə Nazirliyinin rəhbərliyi,
şəxsən general-polkovnik cənab Səfər Əbiyev
bu məsələyə çox ciddi önəm verir, şəxsi
heyətin mənəvi-psixoloji vəziyyətinin yüksək
səviyyəyə qaldırılması üçün
lazım olan bütün tədbirləri görür. Bunu
yaxından görmək üçün səngərdə əsgərin
yanında olmaq kifayətdir. Cəbhə bölgələrində
elə ərazilər var ki, Azərbaycan əsgərini
düşmən səngərindən cəmisi 100 metr məsafə
ayırır. Buna baxmayaraq, əsgərimiz
şaxtalı-soyuqlu günlərdə belə cəsurcasına
Vətən keşiyini çəkməkdən usanmır. Bu,
təkcə hərbi nizamnamələrin və qaydaların tələblərini
yerinə yetirməklə bağlı deyil! Bu həm də Azərbaycan
əsgərinin Vətənə bağlılığına
içdən gələn sevginin, məhəbbətin göstəricisi
kimi diqqəti cəlb edir! Əsgərimiz hər an, hər
saat sayıqdır və Ali Baş Komandanın hər bir əmrini
icra etməyə tam hazırdır.
- Müdafiə Nazirliyinin
beynəlxalq əlaqələri necədir?
- Təqdirolunası işlərimiz
bu sahədə də çoxdur. İndi 50-dən artıq
ölkə ilə Azərbaycanın Müdafiə Nazirliyinin hərbi
əlaqələri mövcuddur. Bu ölkələrdən
24-ü ilə hərbi saziş bağlamışıq. Daha
30 ölkə ilə hərbi əməkdaşlıq
sazişi bağlanması üzərində iş gedir. Əməkdaşlığın
miqyası ABŞ və Avropa ölkələrindən
tutmuş, Şərq və MDB ölkələrinə qədər
gedib çıxır. Siz coğrafiyaya fikir verin. Müharibə
vəziyyətində olan ölkə görün hansı
inkişaf yolunu seçib? Bu bizim ordumuzun müasirliyinə dəlalət
edən ciddi faktordur. İndi Azərbaycanın hərbi təhsil
müəssisələrində xarici ölkə vətəndaşları
oxuyurlar. Əgər ordumuz zəif olsa idi, şübhəsiz,
onunla təmas qurmağa tərəddüd edərdilər.
İndi biz yaxşı mənada bunun əksini
görürük. Müdafiə Nazirliyi ilə əlaqələr
yaratmaq istəyən ölkələrin sayı ilbəil
artır. Bunlar müsbət hallardır. Mən bu yaxınlarda
Brüsseldə olarkən Azərbaycan Silahlı Qüvvələrində
aparılan islahatlar barədə NATO Mənzil qərargahında
səlahiyyət sahiblərinin əhəmiyyətli fikirlərinin
şahidi olanda çox sevindim.
NATO ilə əməkdaşlıq
sahəsində Azərbaycanın uğurları daha cəlbedicidir.
İndi ölkəmiz bu nüfuzlu hərbi-siyasi təşkilatla
Fərdi Tərəfdaşlıq Proqramı çərçivəsində
əlaqələrini inkişaf etdirir. Proqramın birinci mərhələsini
yerinə yetirən Azərbaycan artıq ikinci mərhələnin
icrasına başlamışdır. Ümid edirik ki, yenə də
yaxşı nəticələr əldə edə biləcəyik.
Ümumiyyətlə, Müdafiə Nazirliyi sistemində
aparılan islahatlar, strateji və taktiki məsələlərin
planlaşdırılması, hərbi təlimlərin və təhsilin
NATO standartlarına uyğunlaşdırılması öz
praktik nəticəsini verir. Bu gün Quru
Qoşunlarımızın, Hərbi Hava və Hərbi Dəniz
Qüvvələrimizin bütün ştat-strukturları və
digər sənədləşmə işləri NATO
standartlarına uyğunlaşdırılmışdır. Gəlin
etiraf edək ki, bu məsələlərin həyata
keçirilməsi həm vaxt, həm də lazımi iradə
tələb edirdi. Bu mənada hər iki amil Azərbaycanın
xeyrinə işləmişdir. NATO ilə əməkdaşlıqla
bağlı çoxlu misallar gətirə bilərik. İndi
bizim zabitlərimiz Avropanın və ABŞ-ın müxtəlif
şəhərlərində fəaliyyət göstərən
NATO qərargahlarında əməkdaşlığa layiqli
töhfələrini verirlər.
Bu həftə Bakıya gələn
NATO Baş katibinin müavini Klaudio Bizoneron Azərbaycan
müdafiə naziri, general-polkovnik Səfər Əbiyevlə
görüşündə də ordumuzda aparılan
islahatlardan və Azərbaycan-NATO əməkdaşlığının
mövcud durumundan razılığını bildirdi.
- Son dövrlərdə bəzi
mətbuat orqanlarında orduda xoşagəlməz halların
baş verməsi barədə çoxsaylı materiallar gedir.
Lakin sonradan bunların bir qisminin həqiqətə uyğun
olmadığı müəyyənləşir. Sizcə ordu
ilə bağlı məlumatların ziddiyyət təşkil
etməsinin səbəbi nədir və Müdafiə Nazirliyi
ilə mətbuat arasında daha sıx, effektiv əməkdaşlığın
qurulması üçün hər iki tərəfdən
hansı addımlar atılmalıdır?
- Ordu böyük bir ailədir.
Buraya fərqli dünyagörüşə, müxtəlif
psixoloji xarakterlərə malik olan gənclər gəlir. Birdən-birə
başqa mühitdən digər mühitə düşür.
Onun yeni mühitə, müəyyən dərəcədə
sərt qaydalara malik olan şəraitə dərhal
alışması əlbəttə ki, asan olmur. Bəzən
görürsən ki, çox sadə bir məsələnin
üstündə bir əsgərlə digəri arasında
arzuolunmayan mübahisələr yaranır. Halbuki bir qədər
soyuqqanlı yanaşılarsa, bunlar baş verməz.
Ordu cəmiyyətin bir hissəsidir.
Burada gənc necə böyüyür, həyata necə
hazırlanırsa, orduda da özünü o cür
nümayiş etdirir. Ancaq gəlin razılaşaq ki, Milli
Ordumuzda əsasən vətənpərvər, nizam-intizama riayət
edən gənclər çoxluq təşkil edir. Bəzi
istisnalar da baş verir ki, bu da təəssüf doğurur. Bu
gün ordumuzun ruhunu sarsıda biləcək, onu zəiflədəcək
elə bir problem yoxdur. Buna xalqımız tam əmin ola bilər.
Bəzən ordu haqqında həqiqətə uyğun olmayan
uydurma, şişirtmə, qərəzli yazılara da rast gəlirik.
Təəssüf etməkdən başqa çarəmiz
qalmır. Mən bunu mətbuatın hamısına şamil edə
bilmərəm. Çünki KİV-in çoxluq təşkil
edən hissəsi Milli Ordunun dostlarıdır. Müdafiə
Nazirliyi onlarla sıx əməkdaşlıq edir və
açıq deyim ki, belə bir ünsiyyət bizə
çox böyük fayda gətirir. Onlar bizdən istənilən
informasiyanı öyrənə bilirlər. Bəzən
baxırsan ki, narazı qalanı da olur. Bunu da təbii başa
düşürük. Hamını eyni dərəcədə
razı salmaq, sadəcə, mümkün deyil. Bir sözlə,
Müdafiə Nazirliyi mətbuatla əməkdaşlıqda
daha çox maraqlıdır. Biz mətbuatı ordu ilə cəmiyyət
arasında ən möhkəm və ən etibarlı
körpü hesab edirik.
Qoy bizi tənqid etsinlər,
amma əsaslı olsun bu tənqid. Elə qəzetlər və
yazarlar var ki, onlar Müdafiə Nazirliyinə qarşı
düşünülmüş kampaniya aparırlar.
Yazdıqlarının böyük əksəriyyəti də
yalan və iftira! Nəyinsə qisasını alan yazarlar da
var. Qələm əllərindədir deyə sağa-sola
çırpırlar! Beləsi ilə normal əməkdaşlığın
hər hansı effekt verəcəyinə inanmıram.
- Orduya ictimai nəzarət məsələsinə
necə baxırsınız?
- Çox yaxşı!
Müdafiə naziri Səfər Əbiyevin
tapşırığı ilə bu proses ardıcıl surətdə
aparılır. Hərbi hissələrə Milli Məclis
deputatları, qeyri-hökumət təşkilatlarının
nümayəndələri, qəzet redaktorları müntəzəm
səfər edirlər. Bundan başlıca məqsəd ordunun
fəaliyyəti ilə yaxından tanış olmaq və bu
haqda ictimaiyyəti məlumatlandırmaqdır. Bu üsulun
özünü doğrultduğunu təcrübədən
gördük və prosesin gələcəkdə də davam
etdirilməsinin fərqindəyik. Hərbi hissələrə
baş çəkən mülki nümayəndələr
hiss etdikləri problem olursa, Müdafiə Nazirliyinə bu barədə
müraciət edir və birgə şəkildə onun aradan
qaldırılmasına nail oluruq.
Bu yaxınlarda Milli Məclisin
deputatları və QHT rəhbərləri ilə birlikdə
çox faydalı müzakirələr apardıq. KİV
nümayəndələri də həmin tədbirə dəvət
edilmişdi. Hər kəs öz fikrini açıq söylədi,
tənqidi münasibətlərə geniş şərait
yaradılmışdı. Orada sizin qəzetin Baş redaktoru,
hörmətli millət vəkilimiz Bəxtiyar Sadıqov da
iştirak edirdi. Yaxşı söhbətlərimiz oldu.
Müzakirələrimizi bundan sonra da davam etdirmək fikrindəyik.
Yaxın günlərdə yeni bir heyətlə cəbhə
bölgəsinə səfər təşkil etmək istəyirik.
Bunlar gələcək əməkdaşlıq
üçün möhkəm zəmin yaradacaqdır.
Ümumiyyətlə, münasibətlərdə
çarpazlaşan elə bir xətt görmürəm ki,
bunlar bizim görüşlərimizə və birgə nəticələrə
gəlməyimizə maneçilik törətsin. Bu ordu
xalqındır. Onun inkişafına hər bir vətəndaş
öz töhfəsini verməlidir. Bu mənada ictimai nəzarətin
təmin edilməsini Müdafiə Nazirliyi öz fəaliyyətinin
əsas tərkib hissəsi sayır.
- Cəmiyyətin
güzgüsü olan orduda elə cəmiyyətə xarakterik
olan neqativ halların, bəzən hətta cinayətlərin
baş verməsi də olur və bu, təbii
qarşılanmalıdır. Bəs belə halların aradan
qaldırılması, onun nəticələrinin təhlili və
bir daha baş verməməsi üçün nazirlik tərəfindən
nə tədbirlər görülür? Bu proseslərin mətbuatda
işıqlandırılması mümkündürmü?
- Sizin müqayisəniz
tamamilə məntiqidir. Ordu cəmiyyətin davamıdır.
Onu ayrılıqda təsəvvür etmək və qiymətləndirmək
doğru yanaşma olmazdı. Hadisələrə gəlincə
isə qeyd etməliyəm ki, bəzən gözlənilmədən
elə narahatlıqlar baş verir ki, onun
qarşısını kəsmək bir qədər çətin
olur. Ümumiyyətlə isə, son illər görülən
təsirli tədbirlər nəticəsində nizamnamə
pozuntularının, cinayət tərkibli hadisələrin
sayı xeyli dərəcədə azalmışdır. Bu bir
sıra amillərlə bağlıdır. Əsasən
komandir heyətinin məsuliyyət hissinin
artırılması, hərbi hissələrdə əsgərlə
yalnız nizamnamə qaydaları çərçivəsində
davranış normalarının bərqərar olması xidməti
işdə böyük dönüşə səbəb
olmuşdur. Komandir öz cavabdehliyini dərindən hiss etməlidir.
O, bilsə ki, hansısa kobud səhvinə görə
bağışlanan deyil, öz vəzifə borcunu həmişə
layiqincə yerinə yetirəcəkdir. Odur ki, Müdafiə
Nazirliyinin rəhbərliyi işin bu cəhətini daima ciddi nəzarət
altında saxlayır. İndi hərbi hissə və birləşmələrdə
qarşılıqlı məsuliyyət hissi - əsgərin
komandir, komandirin isə, tabeliyində olan əsgər
qarşısında cavabdehliyi yüksək səviyyədə
qurulmuşdur. Mən bunu tam səmimiyyətlə deyirəm.
Ayrı-ayrı hallarda nəzərəçarpan
hadisələrə görə isə ordunun fəaliyyətini
aşağılatmağı ədalətli mövqe
saymıram. 100-200 illik tarixi olan ordularda bu gün elə hadisələr,
cinayətlər baş verir ki, adam təsəvvür belə
edə bilmir. Götürün elə erməni ordusundakı vəziyyəti.
Fərarilik, cinayət xarakterli digər hadisələr
artıq əməlli-başlı problemə çevrilib.
Ayrı-seçkilik erməni ordusunu içindən
dağıdır. Öz mətbuatlarının verdiyi məlumata
görə, təkcə 2007-2008-ci illərdə Qarabağda
xidmət edən Ermənistan vətəndaşlarına
qarşı törədilmiş 483 döyülmə və
işgəncə faktları ilə bağlı 97 zabit və
124 gizir barəsində cinayət işi
qaldırılmışdır. Mən bunu özümüzə
bəraət üçün demirəm. Ancaq müharibə
apara-apara qısa müddətdə bu cür mütəşəkkil
orduya nail olmağı dəyərləndirməyi
unutmamalıyıq.
Qaldı mətbuatda baş
verən bu və ya digər hadisənin
işıqlandırılmasına, məncə burada bir problem
yoxdur. Vaxtaşırı biz bunu diqqətdə
saxlayırıq. Bu nəinki mümkündür, həm də
çox zəruri məsələdir.
- Əsgər valideyinləri,
QHT təmsilçiləri və eləcə də mətbuat
nümayəndələri tərəfindən ordudakı hər
hansı bir xoşagəlməz fakt barədə məlumat
alanda bunun içtimailəşdirmədən aradan
qaldırılması müharibə şəraitində olan
dövlət üçün zəruridir. Elə bir mexanizm
yaratmaq olarmı ki, həm nöqsanlar aradan qalxsın, həm
də içtimai nəzarətin effektiv təmini
mümkün olsun?
- Bu barədə yuxarıda
fikirlərimizi müəyyən dərəcədə
bildirdik. Ordu elə bir təşkilatdır ki, xüsusilə
indiki həssas zamanda onun fəaliyyəti içtimaiyyəti
daha çox maraqlandırır. Biz bunu başa
düşürük. Ona görə də nə qədər
informasiya, məlumat verilərsə, bunun yalnız müsbət
təsiri olar. İnformasiya qıtlığı isə, əksinə,
içtimaiyyətlə ordu arasında boşluq yarada bilər.
Bu səbəbdən Müdafiə Nazirliyi maksimum dərəcədə
çalışır ki, həm baş verən hadisə, həm
də onun aradan qaldırılması barədə
görülən tədbirlərdən içtimaiyyət
vaxtında xəbərdar olsun. Təcrübə göstərir
ki, cəmiyyətə açıqlıq münasibətlərin
formalaşması və inkişaf etdirilməsində daha
böyük rol oynayır.
- Atəşkəsin
işğalçı qüvvələr tərəfindən
tez-tez pozulması son illərdə "normal hal"
sayılır. Ancaq son vaxtlar bu sahədə şəxsi heyətin
daha çox tələfatı müşahidə olunur. Bu nə
ilə bağlıdır: sayıqlıq itir, yoxsa?..
- Xeyr! Sayıqlıq itməyib!
Buna tam əmin ola bilərsiniz. Təxminən 1000 km-ə
yaxın təmas xəttində düşmənlə
üz-üzə dayanan Müdafiə Nazirliyinin hərbi hissə
və birləşmələri Vətən
torpaqlarının keşiyini cəsurcasına çəkirlər.
Səngər sanki əsgərin xidmət illərində evinə
çevrilir. Səhər açılır, əl-üzlərini
orada yuyur, səhər yeməyini, nahar və axşam yeməklərini
də orada edirlər. Bax əsgərimiz belə ağır
şərait altında gecəni-gündüzə qataraq əlində
silah qəhrəmanlıq nümayiş etdirir. Bu bizim
hamımız üçün qürur mənbəyidir.
İndi lokal müharibə getməsə də, atəşkəs
rejiminin intensiv şəkildə pozulmasını bəlkə
də mövqe müharibəsi kimi qiymətləndirmək
olar. Bu mənim subyektiv mülahizəmdir. Bu cür vəziyyətdə
təkcə Azərbaycan yox, düşmən tərəfdən
də itkilər olur. Və bunun sayı az deyil.
Atəşkəsin son
zamanlar tez-tez pozulması əsasən ermənilərin
günahı ucbatından baş verir. Bu da daha çox təxribatçılıq
məqsədi güdür. Xatırlayırsınızsa bu il
martın əvvəllərində Ermənistanda hökumətə
etiraz əlaməti olaraq küçələrə
axışan dinc sakinləri gülləbaran edən xüsusi
təyinatlı qüvvələrin cinayətini
ört-basdır etmək, daxili gərginlikdən beynəlxalq
içtimaiyyətin diqqətini yayındırmaq məqsədilə
cəbhə xəttində Azərbaycan əsgərinə
düşmən qəfildən hücüm etdi. Təxminən
bir sutka döyüş getdi. 12 itki, 15 yaralı verməklə
düşmən geri çəkildi. Bircə bu hadisəni
yada salmaqla lazımi nəticə çıxarmaq
mümkündür.
Hazırda bizim ordumuz öz
qüdrətinə görə Cənubi Qafqazda ən
güclü ordulardan hesab olunur. Torpaqlarımızı
işğalçılar dinc yolla azad etməzlərsə, Azərbaycanın
ordusu Ali Baş Komandan cənab İlham Əliyevin rəhbərliyi
ilə bu taleyüklü məsələni
xalqımızın istəyinə uyğun həll edəcəkdir!
Üçüncü yol yoxdur!
Müsahibəni apardı:
İ.HÜSEYNLİ
Azərbaycan.-2008.-17 dekabr.-S.3.