Qəbələdə şəhər bələdiyyələrinin respublika yığıncağı keçirilib

Dekabrın 22-də Qəbələ şəhərində Azərbaycanın Şəhər Bələdiyyələri Milli Assosiasiyasının (ŞBMA) yığıncağı keçirilmişdir.

AzərTAc xəbər verir ki, respublikanın 61 şəhər bələdiyyəsi sədrinin iştirak etdiyi toplantıda "Bələdiyyə: yerli özünüidarəetmənin yeni mərhələsi" adlı sənədli film nümayiş etdirildikdən sonra ŞBMA-nın sədri Əbülfəz Babayev 2008-ci ildə görülmüş işlər, qarşıda duran vəzifələr barədə məruzə etmişdir. Bildirmişdir ki, ötən dövr ərzində qurum ölkə bələdiyyələrinin fəaliyyətini canlandırmaq, onların qabaqcıl təcrübəyə yiyələnməsi üçün məqsədyönlü iş aparmışdır. Mütəxəssislər bələdiyyələrə ezam olunmuş, onların həyata keçirdiyi işlər öyrənilmiş, müqayisələr, ümumiləşdirmələr aparılmış, nəticələr müzakirə edilmişdir. Müxtəlif bölgələrdə konfrans və "dəyirmi masalar" keçirilmiş, bu tədbirlərdə bələdiyyələrin qarşısında duran vəzifələrdən söz açılmış, təcrübə mübadiləsi aparılmışdır.

Ə.Babayev "Bələdiyyə torpaqlarının torpaq hərracları və ya müsabiqələri vasitəsilə verilməsinin tənzimlənməsi məqsədilə Azərbaycan Respublikasının bəzi qanunvericilik aktlarına dəyişikliklər və əlavələr edilməsi barədə" 2008-ci il 28 oktyabr tarixli qanunu və onun təsdiq edilməsi haqqında Prezident İlham Əliyevin imzaladığı 2008-ci il 10 dekabr tarixli fərmanı xatırlatmışdır. Qeyd etmişdir ki, bu sənədlər ölkəmizdə bələdiyyə institutunun inkişafına göstərilən ardıcıl dövlət qayğısına növbəti bariz nümunədir. Bələdiyyələr bu qayğını yüksək qiymətləndirir, qüvvələrini ölkəmizin inkişafı naminə səfərbər edirlər. Şəhər, qəsəbə və kənd bələdiyyələrinin milli assosiasiyaları müxtəlif təşəbbüslər irəli sürmüşlər. "Bir bələdiyyə-bir layihə" təşəbbüsü yerli əhəmiyyətli məsələlərin həlli istiqamətində görülən işlərə təkan vermiş, ölkə üzrə 3 minə yaxın müvafiq layihə reallaşdırılmışdır.

Vurğulanmışdır ki, fəaliyyətini əhalinin sosial sifarişləri əsasında quran bələdiyyələr daha böyük uğur qazanırlar. Bunu nəzərə alaraq, assosiasiyalar hər ayın birinci çərşənbə gününü respublikada "Bələdiyyə günü" elan etmişlər. Bununla yanaşı, "Seçicilərimizi eşidək", "Abad şəhər", "Abad kənd", "Təmiz məhəllə", "Bizim ünvan" və digər layihələr də bələdiyyələrin potensialının açılmasına imkan yaratmışdır. "Azərbaycanda yerli demokratiya həftəsi" ölkədə vətəndaş cəmiyyətinin qurulmasında və demokratik prinsiplərin tətbiqində əhəmiyyətli rol oynamışdır. Onun ənənəvi olaraq hər il keçirilməsi barədə qərar qəbul edilmişdir. "Bələdiyyə: yeni forma, yeni məzmun" adlı kitab çap edilərək paylanmışdır. Vətəndaşlarla birbaşa əlaqə üçün "qaynar telefon" xətləri, internet saytlarında "Bələdiyyəyə sözüm var" pəncərələri açılmışdır. Yaşayış məntəqələrində "Bələdiyyə poçtu" qutuları qoyulmuş, "Məlumat lövhələri" quraşdırılmışdır. Bütün bunlar və digər tədbirlər vətəndaşlar tərəfindən razılıqla qarşılanmış, onların bələdiyyələrə inamını artırmışdır.

Assosiasiyanın nəzarət-təftiş komissiyasının sədri, Xırdalan şəhər bələdiyyəsinin sədri Eldar Əhmədov, Qəbələ, Göygöl, Xudat, İmişli, Nərimanov bələdiyyələrinin sədrlərinin hesabatları dinlənilmişdir.

Çıxışlarda bələdiyyələrin fəaliyyətinin daha da təkmilləşdirilməsinə dair fikirlər səsləndirilmişdir. Bələdiyyələrin milli assosiasiyaları ilə əlaqəli işləmək, qabaqcıl təcrübənin öyrənilməsi, vətəndaşlarla səmimi münasibətlər qurulması, vergilərin toplanmasına kömək məqsədilə müvafiq qanunvericilik aktları barədə əhalinin məlumatlandırılması, büdcənin artırılması üçün kiçik istehsal müəssisələri və xidmət obyektlərinin yaradılması tövsiyə edilmişdir.

Tədbirdə Azərbaycan Respublikası Prezidenti İcra Aparatının regional idarəetmə və yerli özünüidarəetmə orqanları ilə iş şöbəsinin baş məsləhətçisi Rüfət Əliyev, Ədliyyə Nazirliyinin bələdiyyələrlə iş mərkəzinin rəisi Mehdi Səlimzadə, Azərbaycan Kənd Bələdiyyələri Milli Assosiasiyasının sədri Şəmistan Yusifov çıxış etmişlər. Natiqlər bələdiyyələrin fəaliyyətinin təkmilləşdirilməsi, onların işinin daha da canlandırılması məqsədilə dövlətin apardığı uğurlu siyasətdən, yaradılmış imkanlardan danışmışlar. Tövsiyə etmişlər ki, bələdiyyələr özlərinin maddi-texniki bazasının möhkəmləndirilməsi, əhalinin ehtiyaclarından irəli gələn məsələlərin həll edilməsi, yerlərdə vətəndaşların kənd təsərrüfatı məhsulları istehsalına marağının artırılması istiqamətində lazımi tədbirlər görsünlər. Qanunvericiliklə müəyyən edilmiş vergilərin toplanmasında və digər məsələlərdə bələdiyyələrin üzləşdikləri çətinliklərin aradan qaldırılması yollarından söz açılmış, onların digər qurumlarla daha sıx əlaqəli şəkildə işləməsinin vacibliyi qeyd edilmişdir.

Tədbirdə bələdiyyələrin əldə etdiyi uğurlarla, qarşılaşdığı çətinliklərlə yanaşı, mövcud nöqsan və çatışmazlıqlara da toxunulmuşdur. Qeyd olunmuşdur ki, ötən dövrdə 15 bələdiyyənin fəaliyyətində ciddi qanun pozuntusu aşkar edilmişdir. Bu istiqamətdə prokurorluq orqanları tərəfindən araşdırma aparılır. İki bələdiyyə sədri barəsində isə cinayət işi açılmış və barələrində həbs qətimkan tədbiri seçilmişdir.

Yığıncaqda bələdiyyələrin fəaliyyətinin daha da təkmilləşdirilməsi ilə bağlı çoxlu təkliflər səsləndirilmiş, bələdiyyə sədrlərinin sualları cavablandırılmışdır. Gələn il bələdiyyələrin fəaliyyətinin 10 illik yubileyi münasibətilə həvəsləndirici mükafatların təsis edilməsi təklifi maraqla qarşılanmışdır.

Xatırladaq ki, dekabrın 24-də Abşeron rayonunun Saray qəsəbəsində Qəsəbə Bələdiyyələri Milli Assosiasiyasının, dekabrın 26-da isə Ucar rayonunun Qazıqumlaq kəndində Kənd Bələdiyyələri Milli Assosiasiyasının ümumi yığıncağı keçiriləcəkdir.

Azərbaycan.-2008.-23 dekabr.-S.2.