Təhsil sahəsi dövlətin qayğısı ilə
əhatə olunmuşdur
Bu sahədə imzalanan qərar və
sərəncamlar, gerçəkləşən proqram və
layihələr bunu təsdiqləyir
Ulu öndər Heydər Əliyevin
təhsil siyasəti bu gün ölkə
başçısı tərəfindən uğurla davam
etdirilir. Birləşmiş Millətlər Təşkilatının
"Təhsil əsri" elan etdiyi XXI əsrdə yüksək
intellektə malik insan kapitalının formalaşmasında və
davamlı inkişafa zəmin yaradan güclü
iqtisadiyyatın qurulmasında bu sahənin rolu heç vaxt
indiki qədər aktual olmamışdır.
Xüsusilə, son illər
orta və ali təhsilin inkişafı istiqamətində
dövlət tərəfindən atılan addımlar olduqca təqdirəlayiqdir.
Ali təhsilin inkişafı məqsədilə "Azərbaycan
Respublikasının ali təhsil müəssisələrinin
Avropa ali təhsil məkanına inteqrasiyası ilə
bağlı bəzi tədbirlər haqqında" ölkə
başçısının 31 yanvar 2008-ci il tarixli sərəncamına
əsasən "2009-2013-cü illərdə Azərbaycan
Respublikasının ali təhsil sistemində islahatlar üzrə
Dövlət Proqramı" layihəsinə, eyni zamanda,
YUNESKO və digər beynəlxalq qurumların qəbul etdiyi sənədlərə
uyğun olaraq hazırlanmış ixtisasların yeni
siyahısı tərtib olunmuşdur. Proqram layihəsində
bir sıra mühüm məsələlərlə
yanaşı, ali təhsil müəssisələrinin
strukturunun və idarə olunması sisteminin müasir tələblər
baxımından modemləşdirilməsi də öz əksini
tapmışdır.
Ölkədə həyata
keçirilən təhsil islahatları, tədris müəssisələrinin
maddi-texniki bazasının möhkəmləndirilməsi və
digər tədbirlər ADPU-da, o cümlədən mühəndis
pedaqoji və bədii qrafika fakültəsinin fəaliyyətinə
də öz müsbət təsirini göstərmişdir. Son
on il ərzində fakültədə struktur dəyişiklikləri
edilməklə yeni ixtisaslar açılmışdır.
"Peşə təlimi", "Ümumtexniki fənnlər
üzrə fizika" və "Rəsm, rəsmxətt, əmək
təlimi" dövrün tələbinə uyğun yeni
ixtisaslardır. Kafedralar həmin ixtisaslara
uyğunlaşdırılaraq yenidən qurulmuş və bura gənc
kadrlar cəlb edilmişdir.
Ötən illər ərzində
təhsilin keyfiyyətini yüksəltmək, tələbələrin
intellektual səviyyəsini qaldırmaq, fakültənin
maddi-texniki bazasını möhkəmləndirmək məqsədilə
bir sıra tədbirlər həyata keçirilmişdir.
Universitetin rəhbərliyi tərəfindən semestr
imtahanlarının testlə keçirilməsi qaydası
qoyulmuşdur. Hazırda yeni sistemə - kredit sisteminə
keçilməsi üzərində ciddi iş aparılır.
Belə ki, akademik borcu olan tələbələr kursdan-kursa
keçirilsələr də, aşağı kurslardakı
mühazirələrdə iştirak edib fənni öyrənməklə
borclarını vermək imkanı qazanacaqlar.
Universitetdə, o
cümlədən fakültəmizdə imtahan prosesinin obyektiv
aparılması qazandığımız ən böyük
nailiyyətlərdən biridir. Fakültədə tədrisin
keyfiyyətini yüksəltmək məqsədilə texniki
avadanlıqlar, əyani vəsaitlər, laboratoriya
üçün texniki cihazlar alınaraq istifadəyə
verilmişdir. Ali məktəb tələbələrini, o
cümlədən mühəndis pedaqoji və bədii qrafika
fakültəsinin tələbələrini zəruri dərs vəsaiti
ilə təmin etmək məqsədilə
"Elektrotexnika", "Radiotexnika", "Dövrələr
nəzəriyyəsinin əsasları", "Avtomatika və
elektron hesablama texnikası" və digər nəşrlər
çap olunmuş, eyni zamanda, 100-ə qədər elmi məqalə
dərc edilmişdir.
Bu gün tələbələrin
mənəvi cəhətdən zənginləşməsində,
onların bilik və bacarıqlarının üzə
çıxarılmasında və hərtərəfli
dünyagörüşə malik ixtisaslı kadrlar kimi
yetişməsində müəllimlərin pedaqoji məharəti
mühüm rol oynayır. Bu baxımdan, fakültədə təcrübəli,
bacarıqlı pedaqoji kollektiv çalışır.
Hazırda müasir mütəxəssisi şərtləndirən
başlıca xüsusiyyət onun əmək bazarının
tələblərinə cavab verməsidir. Bunun
üçün indi ali təhsil müəssisələrində
ən çox diqqət yetirilən nəzəri
hazırlıq kifayət deyil, digər bacarıq və keyfiyyətlər
də tələb olunur. Onların sırasında mütəxəssisin
tənqidi təfəkkürə, mədəni intellektual səviyyəyə,
İKT-dən istifadəyə malik olması, daim öyrənməyə
və ixtisas səviyyəsini təkmilləşdirməyə
meyil göstərməsi, yaradıcılığı, təşəbbüskarlığı,
intizamlılığı ilə fərqlənməsi,
sağlam rəqabətə dözümlü olması, birmənalı
şəkildə qəbul edilən xüsusiyyətlərdir.
Ona görə də müəllimlərimiz tələbələrin
hazırlıq sisteminin təkmilləşdirilməsinə,
onların tələb olunan səviyyəyə yüksəlməsinə
yönəlmiş tədbirlərə xüsusi diqqət
yetirir, bilik və bacarıqlarını ixtisaslı
kadrların hazırlanmasına, cəmiyyət
üçün əsl vətəndaş kimi yetişmələrinə
yönəldirlər.
Bu ilin ən əlamətdar
hadisələrindən biri də Heydər Əliyev Fondunun
prezidenti, YUNESKO və İSESKO-nun xoşməramlı səfiri,
Milli Məclisin deputatı Mehriban xanım Əliyevanın təşəbbüsü
ilə 30 ölkənin 200-dək təhsil ekspertinin iştirak
etdiyi "Dünyada savadlılığın dəstəklənməsi"
mövzusunda Bakıda keçirilən YUNESKO-nun regional
konfransı olmuşdur. Bu təhsil tariximizdə mühüm
hadisə olmaqla bərabər, dünyada Azərbaycanın
qabaqcıl tendensiyalarını dəstəkləyən
ölkə imicini daha da yüksəltmişdir. Belə tədbirlər
ölkəmizin təhsil sistemində əsaslı
islahatların aparıldığı bir vaxtda fəaliyyətimizin
məzmun və mahiyyətinə yenidən baxmağı, təhsilimizin
perspektiv inkişaf istiqamətlərini müasir yanaşmalar əsasında
dəqiqləşdirməyi tələb edir.
Təhsil, bilik,
müasirlik, gələcəyə açılmış
geniş üfüqlər deməkdir. Azərbaycan
xalqının intellektual gələcəyini təmin etməyin
yeganə yolu məhz bu sahənin inkişafı, təhsil
ocaqlarının ən müasir tələblər səviyyəsinə
çatdırılması ilə əlaqədardır.
Hazırda
respublikanın ali məktəblərində həyata
keçirilən elmi fəaliyyət mahiyyət etibarilə
bütövlükdə Azərbaycan elminin, təhsilinin
mühüm tərkib hissəsinə çevrilməklə
onun nailiyyətlərinin artırılmasına xidmət edir.
O cümlədən, fakültənin pedaqoji kollektivi də bu
istiqamətdə fəaliyyət göstərir və yüksək
səviyyəli müəllim kadrlarının
hazırlanması üçün var qüvvəsi ilə
çalışır.
Həşim HƏŞİMOV,
Azərbaycan Dövlət Pedaqoji
Uni-
versitetinin mühəndis
pedaqoji və bədii qrafika
fakültəsinin dekanı,
professor
Azərbaycan.-2008.-23 dekabr.-S.5.