Fəal sosial siyasət və investisiya ili

Yekunlaşmaq üzrə olan 2008-ci il müstəqil dövlətçiliyini daha da möhkəmləndirərək Avratlantik məkana inteqrasiya kursunu uğurla davam etdirən, transmilli enerji və kommunikasiya layihələrinin lokomotivinə çevrilən, demokratikləşmə yolunda atdığı ardıcıl addımlarla Cənubi Qafqazın ən nüfuzlu ölkəsi kimi tanınan müstəqil Azərbaycan üçün bir sıra uğurlu hadisələrlə yadda qalmışdır. Ümumilikdə, geridə qalan bir il Azərbaycan dövlətinin yüksəlişi və strateji hədəflərinə yetişməsi üçün zərrə-zərrə formalaşdırdığı böyük potensialın bütün əzəməti ilə reallığa çevrildiyi əlamətdar mərhələdir.

2008-ci ilin sosial-iqtisadi yekunlarına nəzərən əminliklə söyləmək olar ki, siyasətə ideyaların reallaşdırılması vasitəsi kimi yanaşaraq "Əsl siyasət konkret, real iş görməkdən ibarətdir" devizini fəaliyyətində rəhbər tutan Prezident İlham Əliyev konseptual əsasları ulu öndər Heydər Əliyev tərəfindən müəyyənləşdirilmiş milli inkişaf strategiyasını daha da təkmilləşdirmiş, keyfiyyətcə yeni mərhələdə inamla həyata keçirmişdir. Azərbaycan Prezidentinin oktyabrın 24-də keçirilmiş andiçmə mərasimindəki dərin məzmunlu çıxışı ölkəmizin 2008-ci ildə bütün sahələrdə dinamik inkişaf yolu keçdiyini bir daha təsdiqləmişdir.

Azərbaycan Prezidentinin 2008-ci ildəki fəaliyyəti bölgələrin inkişafına xidmət edən kompleks tədbirlərin, xüsusilə, regionların sosial-iqtisadi inkişafına dair Dövlət Proqramının ardıcıl surətdə həyata keçirilməsi ilə əlamətdar olmuşdur. Bölgələrin inkişafındakı fərqi mümkün qədər azaltmaq, bu sahədə balansa nail olmaq Prezidentin sosial-iqtisadi siyasətinin əsas istiqamətlərindən olmuşdur. Bu ilin fevralında regionların sosial-iqtisadi inkişafına dair Dövlət Proqramının 4 illiyinə həsr olunmuş konfransda çıxış edən dövlət başçısı İlham Əliyev regionların inkişafı naminə həyata keçirilən tədbirlərin qarşıdakı illərdə də davam etdiriləcəyini vurğulamışdır. Sözügedən proqramın ölkəmizin sosial-iqtisadi yüksəlişindəki əhəmiyyətini nəzərə alan cənab İlham Əliyev son bir ildə Azərbaycanın ayrı-ayrı bölgələrinə ardıcıl səfərləri zamanı proqramın icrası vəziyyəti ilə yerində tanış olmuş, görülən işlərin səmərəliliyini artırmaq üçün icra strukturlarının rəhbərlərinə müvafiq tapşırıqlar vermişdir. Proqram çərçivəsində yerlərdə sosial, mədəni, infrastruktur obyektlərinin istifadəyə verilməsi, energetika və kommunal xidmətin səviyyəsinin əhəmiyyətli dərəcədə yaxşılaşması bütövlükdə regionları əvvəlki simasından fərqləndirir: rayonlardan paytaxta və digər iri şəhərlərə axın prosesi səngimiş, rayonlarda insanların rahat, firavan yaşayışı üçün lazımi kommunal xidmətlər sistemi yaradılmışdır.

Dövlət başçısı İlham Əliyev andiçmə mərasimindəki çıxışı zamanı bölgələrə səfərlərinə də toxunmuş, ötən beş ildə rayonlarla paytaxt arasındakı fərqin azaldığını xüsusi vurğulamışdır: "Bölgələrdəki vəziyyətlə çox yaxından tanışam və göstərilən bütün təşəbbüslər, atılan bütün addımlar Azərbaycan xalqı tərəfindən dəstəklənmişdir. Son beş il ərzində əksər rayonlarda iqtisadi artım 2 dəfədən çox olubdur. Bəzi rayonlarda ümumi daxili məhsul 2,5 dəfə, 2,7 dəfə, 3 dəfə artıbdır. Bizim rayonlarda neft hasilatı yoxdur. Yəni, nəyin hesabına artıbdır? Bax, yaradılan iş yerlərinin hesabına, qoyulan investisiyaların hesabına, açılan zavodların, fabriklərin hesabına. Bu gün Azərbaycanda işləmək istəyən böyük dərəcədə iş tapa bilər".

Hesabat dövrünün yekunları bazar iqtisadiyyatı yolunu seçmiş Azərbaycanda sosial məsələlərin həllinin daim diqqət mərkəzində olduğunu, hakimiyyətin fəaliyyətində sosialyönümlü layihələrin dominantlıq təşkil etdiyini bir daha təsdiqləmişdir: 2003-cü ildə cəmi 1,2 milyard dollar təşkil edən Azərbaycanın dövlət büdcəsi 2008-ci ildə 16 milyard manata çatmış, hərbi xərclər 11 dəfə artmışdır. Əgər 2003-cü ildə adambaşına düşən milli gəlirin həcmi 888 ABŞ dolları təşkil edirdisə, 2008-ci ildə 5800 dollara çatmışdır. Ötən müddətdə ölkə iqtisadiyyatı ümumilikdə 2,7 dəfə artmış, yoxsulluğun səviyyəsi 49 faizdən 15,7 faizə düşmüşdü, Mərhələlərlə qaldırılan minimum əməkhaqqı 2008-ci il yanvarın 1-dən 60 manata, sentyabrın 1-dən 75 manata qaldırılmışdır. 2008-ci ildə dövlət büdcəsindən maliyyələşən əksər strukturlarda əməkhaqqı qaldırılmış, hərbi qulluqçuların sosial vəziyyətinin yaxşılaşdırılması sahəsində əsaslı tədbirlər görülmüşdür.

2009-cu ildən pensiyaların baza hissəsi yenidən artırılacaq, eyni zamanda pensiyaların sığorta hissəsi illik inflyasiya faizinə uyğun indeksləşdiriləcək və nəticədə qiymət artımının pensiyaçıların sosial vəziyyətinə heç bir təsiri olmayacaq. Bütün bu tədbirlər sosial müdafiənin keyfiyyətcə yeni mərhələyə keçid alması kimi dəyərləndirilə bilər. Bu konsepsiyanın davamı yeni beşillikdə, 2009-2013-cü illərdə respublikamızın sosial siyasətində tərəqqi dövrü kimi xarakterizə olunacaqdır. "Uzaq və yaxın tarixdən də bilirik ki, köklü islahatlar müvəqqəti olaraq insanların yaşayış səviyyəsini endirir. Azərbaycanda isə biz bunun əksini görürük. Biz köklü iqtisadi islahatlar aparmaqla bərabər, sosial məsələlərin həllində böyük işlər görmüşük. Son beş il ərzində minimum pensiyanın məbləği 4 dəfə artırılmışdır. Minimum əməkhaqqı 8 dəfə, orta əməkhaqqı 3,6 dəfə artırılmışdır. Bu gün dövlətdən birbaşa ünvanlı sosial yardım alan insanların sayı 600 minə çatmışdır. Dövlət ehtiyacı olan vətəndaşlarının yaşayış səviyyəsinin yaxşılaşdırılması üçün öz köməyini göstərir və biz gələcəkdə bu siyasəti davam etdirəcəyik. Azərbaycanda yoxsulluğun azaldılması məni çox sevindirir. Əgər 2003-cü ildə yoxsulluq şəraitində yaşayanların sayı 49 faiz idisə, 2007-ci ilin yekunlarına görə, bu rəqəm 16 faizə düşübdür" - deyə Azərbaycan Prezidenti andiçmə mərasimində vurğulamışdır.

Dövlət başçısı cənab İlham Əliyev haqlı olaraq bu fikirdədir ki, Azərbaycan vətəndaşlarının normal yaşayışı üçün kommunal xidmətlərin səviyyəsi yüksəldilməli, zəruri infrastruktur layihələri gerçəkləşdirilməli, əhali fasiləsiz olaraq elektrik enerjisi, təbii qaz, içməli su ilə təmin olunmalıdır. Eyni zamanda yolların bərpası və yenidən çəkilişi, zəruri abadlıq işlərinin aparılması dövlətin bir nömrəli vəzifəsi olmalıdır. Son bir ildə nəticə etibarilə insan resurslarının inkişafına xidmət edən mühüm investisiya layihələri Azərbaycanı hər bir sahədə mütərəqqi yeniliklərə istinad edən, müasir dövlətə çevirmək məqsədi daşıyır. Dövlət başçısı haqlı olaraq vurğulayır ki, Azərbaycanda iqtisadi modernləşmənin başlıca şərti hər bir sahədə yeni dövrün tələblərinə cavab verən infrastrukturun yaradılması yolu ilə insan resurslarının inkişafıdır. Respublika əhəmiyyətli magistral yolların təmiri, bölgələrin elektrik enerjisi, işıq, qaz, su kimi problemlərinin həlli, kommunal xidmət sferasında mütərəqqi islahatların aparılması kimi tədbirlər bütövlükdə Azərbaycan vətəndaşlarının firavan və rahat yaşayışının təmin edilməsi məqsədindən irəli gəlir. Xatırlatmaq yerinə düşər ki, son 5 ildə hökumətin investisiya vəsaitləri hesabına bir çox ucqar rayonlara qaz kəməri çəkilmiş, təmirinə ciddi ehtiyac olan yollar düzəldilmiş, İsmayıllı-Oğuz bölgəsindən Bakıya içməli su kəmərinin çəkilişinə başlanılmış, paytaxtda müasir körpülərin və yol qovşağının salınması, şəhər infrastrukturunun yeniləşdirilməsi, tarixi memarlıq və mədəniyyət abidələrinin, park və xiyabanların yenidənqurulması istiqamətində kompleks tədbirlər həyata keçirilmişdir. Dövlət başçısı İlham Əliyev andiçmə mərasimindəki çıxışında infrastrukturun yeniləşdirilməsi vacibliyini bir daha önə çəkmişdir: "Bizim böyük infrastruktur layihələrimiz həyata keçirilir. Son beş il ərzində 4 beynəlxalq aeroport istismara verilibdir. Səkkiz elektrik stansiyası tikilibdir. Minlərlə kilometr yollar salınıbdır. Qazlaşdırma prosesi uğurla gedibdir. Əgər 2003-cü ildə Azərbaycanda qazlaşdırma 62 faiz idisə, bu gün 85 faizdir. Su kəmərləri çəkilir. Yəni, bütün bu infrastruktur layihələri Azərbaycanı gücləndirir. Amma bununla bərabər, insanların yaşayış səviyyəsinin qalxması, yoxsulluq içində yaşayanların vəziyyətinin yaxşılaşması - bu, mənim üçün az əhəmiyyət kəsb etmir, bəlkə daha da böyük əhəmiyyət kəsb edir. Çünki bizim bütün siyasətimiz Azərbaycan xalqının yaxşı yaşamasına, Azərbaycanın möhkəmlənməsinə yönəldilibdir".

Bütün bunlar bir daha təsdiqləyir ki, 2008-ci il Azərbaycanın bütün həyati əhəmiyyətli sahələrdə inkişaf və tərəqqisi baxımından əhəmiyyətli hadisələrlə zəngin olmuşdur. 2008-ci ili fəal sosial siyasət və investisiya ili elan etmiş cənab İlham Əliyev qarşıdakı ildə də sosial məsələlərə geniş diqqət ayırmaq niyyətindədir. Cari ilin büdcə göstəriciləri deməyə əsas verir ki, 2009-cu ildə Azərbaycan vətəndaşlarının maddi rifah halı daha da yaxşılaşacaq, sosial-iqtisadi inkişaf və sabitlik kursunun respublikamıza gətirdiyi dividendləri hər bir azərbaycanlı öz gündəlik həyatında qabarıq hiss edəcəkdir.

S.ELMANOĞLU

Azərbaycan.-2008.-24 dekabr.-S.9.