Yeni Azərbaycan Partiyası "2008-ci il prezident seçkiləri: inkişafın yeni perspektivləri" mövzusunda konfrans keçirmişdir

AzərTAc xəbər verir ki, dekabrın 24-də "Hyatt Regency-Naxçıvan" mehmanxanasında Yeni Azərbaycan Partiyasının təşkilatçılığı ilə "2008-ci il prezident seçkiləri: inkişafın yeni perspektivləri" mövzusunda konfrans keçirilmişdir.

Konfransda dövlət rəsmiləri, Yeni Azərbaycan Partiyasının (YAP) rəhbərliyi, Milli Məclisin deputatları, digər siyasi partiyaların təmsilçiləri, alimlər və ictimaiyyətin nümayəndələri iştirak etmişlər.

YAP sədrinin müavini-icra katibi, Milli Məclisin deputatı Əli Əhmədov konfransı açaraq, onun Azərbaycan Prezidenti İlham Əliyevin anadan olması gününə təsadüf etdiyini bildirmiş, dövlətimizin başçısını doğum günü münasibətilə təbrik etmiş, Azərbaycan xalqının və dövlətinin inkişafı naminə şərəfli işində uğurlar arzulamışdır.

Ə.Əhmədov demişdir ki, əsası ümummilli lider Heydər Əliyev tərəfindən qoyulmuş siyasəti Prezident İlham Əliyevin yaradıcılıqla inkişaf etdirməsi nəticəsində son beş ildə Azərbaycanda həm iqtisadiyyatın yüksəlməsi, həm insanların rifahının yaxşılaşması, həm bölgələrin simasının yeniləşdirilməsi, həm də beynəlxalq münasibətlər sistemində ölkəmizin mövqelərinin möhkəmlənməsi istiqamətində çox ciddi addımlar atılmış, böyük nailiyyətlər qazanılmışdır. Xalqımız Azərbaycan dövlətçiliyinin inkişafı, əhalinin rifahının yüksəldilməsi sahəsində görülən işləri layiqincə dəyərləndirərək, YAP sədri İlham Əliyevi yenidən Prezident seçmişdir. Prezidentin uğurlu siyasətinin bəhrəsi olan nailiyyətlər ölkəmizin həm regionda, həm də bütün dünyada nüfuzunun artmasına səbəb olmuşdur. Ötən 5 ildə Azərbaycanda sürətli inkişaf davam etmiş, dövlətimizin başçısının həyata keçirdiyi siyasət bütün ölkəni gücləndirdiyi kimi, başçılıq etdiyi YAP-ın da möhkəmlənməsinə xidmət etmişdir.

XX əsrin 70-ci illərindən etibarən Azərbaycan tarixinin otuz ildən artıq bir dövrünün ulu öndər Heydər Əliyevin adı ilə bağlı olduğunu xatırladan partiya sədrinin müavini 2003-cü ildən xalqımızın tarixində yeni bir mərhələnin başlandığını və onun məhz Prezident İlham Əliyevin adı ilə bağlı olduğunu vurğulamışdır.

Sonra konfransda Milli Məclisin Elm və təhsil nəsələləri daimi komissiyasının sədri, Azərbaycan Dövlət İqtisad Universitetinin rektoru Şəmsəddin Hacıyev "Azərbaycanda dinamik iqtisadi inkişaf: reallıqlar və perspektivlər" mövzusunda məruzə ilə çıxış etmiş, son beş ildə əldə edilmiş iqtisadi uğurlardan danışmışdır.

Məruzəçi demişdir ki, cəmiyyətin rifahının əsasında iqtisadi inkişafın dayandığını dəfələrlə vurğulayan ümummilli lider Heydər Əliyev müvafiq strategiya hazırlamış və onun uğurla həyata keçirilməsinin bünövrəsini qoymuşdur. Hazırda həmin strategiya Prezident İlham Əliyev tərəfindən yeni çağırışlara uyğun olaraq böyük uğurla davam etdirilir və Azərbaycanı yalnız regionun liderinə deyil, eyni zamanda, bütün dünyanın xüsusi hörmətlə yanaşdığı dövlətə çevirmişdir. Dövlətimizin başçısının həyata keçirdiyi sürətləndirilmiş iqtisadi inkişaf strategiyasının nəticələrindən bu gün hər bir Azərbaycan vətəndaşı bəhrələnir.

Prezident İlham Əliyevin iqtisadi siyasətinin səciyyəvi xüsusiyyətlərindən danışan Ş.Hacıyev onun regional resursların da fəal surətdə cəlb edildiyi, ictimai kapitalın hərəkətinə ciddi nəzarətin təmin olunduğu, streotiplərdən uzaq, ümummilli səviyyədə aparılan innovasiyalı siyasət kimi cəhətlərini vurğulamışdır. Bildirilmişdir ki, qeyri-neft sektorunun və xarici ticarət kvotasının inkişafının diqqət mərkəzində saxlanması, liberalizm tətbiq edilməklə institusional inkişaf, idarəetmə piramidasının zirvəsində deyil, mərkəzində dayanmaq kimi xüsusiyyətlər də bu siyasətin səciyyəvi cəhətləridir.

"Azərbaycan təhsili köklü islahatlar ərəfəsində" mövzusunda məruzə ilə çıxış edən təhsil naziri Misir Mərdanov demişdir ki, dövlət başçımızın "qara qızılı" insan kapitalına çevirmək barədə tapşırığı uğurla həyata keçirilir. Məktəbəqədər təhsildən tutmuş peşə, peşə-ixtisas təhsilini və ali təhsilin bütün pillələrini əhatə edən 14 dövlət proqramının ardıcıl və məqsədyönlü şəkildə həyata keçirilməsi ölkəmizin gələcəyi olan uşaq və gənclərin hərtərəfli inkişafı üçün geniş imkanlar açır. Nazir təhsil sahəsində aparılan islahatların müsbət nəticələr verdiyini, son bir ildə təkcə Bakıda uşaq bağçalarına gedən uşaqların sayının 1300 nəfərdən çox artdığını, Azərbaycan ali məktəblərində təhsil alan əcnəbi tələbələrin sayının 1860 nəfərdən 7000-ə çatdığını, xaricdə təhsil alan azərbaycanlıların sayının 4000 nəfərdən çox olduğunu bildirmişdir.

Sonra rabitə və informasiya texnologiyaları naziri Əli Abbasov "İKT-iqtisadi modernləşmənin əsas istiqamətləri" mövzusunda məruzə ilə çıxış etmiş, İKT sahəsinin dövlətimizin başçısı tərəfindən prioritet istiqamət elan edildiyini bir daha vurğulamışdır. İKT sektorunun neft və tikinti sahəsindən sonra ən böyük vergi ödəyicilərindən biri olduğunu deyən nazir hazırda Azərbaycanda 1,5 milyon nəfərin internet istifadəçisi olduğunu xatırlatmışdır. Sahənin inkişafı ilə bağlı Prezident tərəfindən təsdiq edilmiş dövlət proqramlarına əsasən, İKT-nin 4 istiqamətdə - nana texnologiyalar, kosmik sənaye, nüvə texnologiyaları və biotexnologiyalar istiqamətində inkişaf etdiriləcəyi və 2018-ci ildə bu sahənin gəlirlərinin neft gəlirləri ilə bərabər səviyyəyə çatacağı bildirilmişdir.

"Etibarlı sosial müdafiə: yeni yanaşma zərurəti" mövzusunda məruzə ilə çıxış edən Dövlət Sosial Müdafiə Fondunun sədri Səlim Müslümov son beş ildə sosial sahədə ciddi dəyişikliklərin baş verdiyini, insanların həyat şəraitinin əsaslı şəkildə yaxşılaşdığını, əməkhaqqının 8, pensiyaların məbləğinin 4 dəfə artırıldığını vurğulamışdır. S.Müslümov bildirmişdir ki, Prezident İlham Əliyev tərəfindən son beş ildə bu sahə ilə bağlı 62 fərman və sərəncam imzalanması Azərbaycan dövlətinin vətəndaşların sosial problemlərinin həllinə qayğısının bariz nümunəsidir.

"Beynəlxalq münasibətlərdə Azərbaycanın artan əhəmiyyəti" mövzusunda məruzə ilə çıxış edən Milli Məclisin Beynəlxalq münasibətlər və parlamentlərarası əlaqələr daimi komissiyasının sədri Səməd Seyidov bildirmişdir ki, əsrin möhtəşəm layihələri - Bakı-Tbilisi-Ceyhan neft və Bakı-Tbilisi-Ərzurum qaz kəmərlərinin tikintisi başa çatdıqdan sonra Azərbaycanın Avropa və ümumən Qərb üçün artan əhəmiyyəti göz qabağındadır. İdeya müəllifi ulu öndər Heydər Əliyev olan bu nəhəng layihələr məhz Prezident İlham Əliyevin qətiyyəti sayəsində reallığa çevrilmiş, Azərbaycanın Avropanın enerji təhlükəsizliyində rolu əhəmiyyətli dərəcədə artmışdır. Məruzəçi vurğulamışdır ki, ölkəmizdə baş vermiş dəyişikliklərin mahiyyəti, onun getdikcə qüdrətli dövlətə çevrilməsi, bu müvəffəqiyyətlərin əldə edilməsində Prezidentin rolu hər bir vətəndaşımız tərəfindən aydın dərk olunur.

Prezidentin xarici siyasətinin uğurlarından danışan S.Seyidov bu siyasətin ulu öndərin azərbaycançılıq ideologiyasına əsaslandığını bildirmişdir.

YAP sədrinin müavini Əli Əhmədov konfransa yekun vurmuşdur.

Azərbaycan.-2008.-25 dekabr.-S.4.