Azərbaycan Dövlət Teleqraf Agentliyi müsabiqənin qalibi olmuşdur

AzərTAc xəbər verir ki, dekabrın 25-də Rusiya Federasiyasının Azərbaycandakı səfirliyinin keçirdiyi "Rusiya və Azərbaycan strateji tərəfdaşlardır" ikinci jurnalistlər müsabiqəsinin qaliblərinin mükafatlandırılması mərasimi olmuşdur.

Rusiyanın ölkəmizdəki səfiri Vasili İstratov tədbir iştirakçılarını qarşıdan gələn Yeni il bayramı, yaradıcılıq qələbələri münasibətilə təbrik edərək onlara yeni uğurlar arzulamışdır.

Rusiya ilə Azərbaycan arasında tərəfdaşlıq münasibətlərinin yüksək səviyyədə olduğunu vurğulayan V.İstratov demişdir ki, başa çatmaqda olan ildə prezidentlər İlham Əliyevin və Dmitri Medvedevin görüşləri və danışıqları bu münasibətlərə yeni təkan vermişdir. İkitərəfli əmtəə dövriyyəsinin həcmi 2 milyard dollara çatmışdır. Mədəni, humanitar əlaqələrin inkişafı xətti ilə də xeyli iş görülmüşdür. Jurnalistlər arasında müsabiqənin keçirilməsi ənənəvi hal almışdır. Bu dəfə müsabiqədə Azərbaycanın aparıcı KİV-i, onlarca müəllif iştirak etmişdir.

V.İstratov bir qrup fərqlənmiş jurnalistə və KİV nümayəndəsinə mükafatlar təqdim etmişdir.

"Rusiya-Azərbaycan münasibətləri mövzusunun geniş işıqlandırılmasına görə" Fəxri diploma AzərTAc - Azərbaycan Dövlət Teleqraf Agentliyi layiq görülmüşdür.

Müsabiqənin qalib jurnalistlərindən biri AzərTAc-ın buraxılış redaktoru Vladimir Morozkov olmuşdur.

Azərbaycan.-2008.-26 dekabr.-S.3.