Azərbaycan Prezidenti İlham Əliyev Rusiyanın müdafiə naziri Anatoli Serdyukovu qəbul etmişdir

Azərbaycan Respublikasının Prezidenti İlham Əliyev dekabrın 27-də Rusiyanın müdafiə naziri Anatoli Serdyukovu qəbul etmişdir.

Dövlətimizin başçısı Azərbaycanla Rusiya arasında ikitərəfli münasibətlərin müxtəlif sahələrdə uğurla inkişaf etdiyini bildirdi. Prezident İlham Əliyev iki ölkənin hərbi və hərbi-texniki sahədə, müdafiə nazirlikləri arasında əməkdaşlığının genişləndiyini qeyd edərək, bu səfərin Azərbaycan-Rusiya hərbi və hərbi-texniki əməkdaşlığının yeni imkanları və perspektivlərinin nəzərdən keçirilməsi baxımından əhəmiyyətli olacağına əminliyini bildirdi.

Anatoli Serdyukov Rusiya Federasiyasının Prezidenti Dmitri Medvedevin və hökumətin sədri Vladimir Putinin salamlarını və qarşıdan gələn Yeni il münasibətilə təbriklərini dövlətimizin başçısına çatdırdı. Ölkələrimiz arasında əlaqələrin dinamik inkişaf etdiyini bildirən Serdyukov iki ölkə prezidentlərinin görüşlərinin münasibətlərin möhkəmlənməsinə təkan verdiyini xüsusi vurğuladı. O, səfəri zamanı iki ölkə arasında hərbi və hərbi-texniki əməkdaşlığın builki yekunlarının və perspektivlərinin nəzərdən keçiriləcəyini bildirdi.

Prezident İlham Əliyev Azərbaycan və Rusiyanın dövlət başçıları arasında keçirilən görüşlərin ikitərəfli münasibətlərin daha da möhkəmlənməsi baxımından mühüm rol oynadığını vurğuladı. Dövlətimizin başçısı Rusiya Prezidenti Dmitri Medvedevin və hökumətin sədri Vladimir Putinin salamlarına və qarşıdan gələn Yeni il münasibətilə təbriklərinə görə minnətdarlığını bildirdi, özünün də salamlarını və təbriklərini Rusiya Federasiyasının Prezidentinə və hökumətinin sədrinə çatdırmağı xahiş etdi.

AzərTAc

Azərbaycan.-2008.-28 dekabr.-S.1.