"Turizm və rekreasiya: problemlər və perspektivlər" adlı III Respublika elmi-praktiki konfransı keçirilmişdir

Dekabrın 19-da Azərbaycan Turizm İnstitutunda (ATİ) Mədəniyyət və Turizm Nazirliyi və ATİ-nin birgə təşkilatçılığı ilə "Turizm və rekreasiya: problemlər və perspektivlər" adlı III Respublika elmi-praktiki konfransı keçirilmişdir.

Tədbirdə müxtəlif ali təhsil müəssisələrinin, turizm agentlikləri və mehmanxanaların nümayəndələri, turizm sahəsində tədqiqatla məşğul olan mütəxəssislər iştirak etmişlər.

Mədəniyyət və turizm naziri Əbülfəs Qarayev ənənəyə çevrilmiş konfransın əhəmiyyətindən danışaraq bildirmişdir ki, müzakirə edilən mövzular turizmin bütün sahələrini əhatə edir. Konfrans Azərbaycanda turizmin inkişafına öz töhfəsini verəcəkdir.

Nazir vurğulamışdır ki, bu il ATİ-nin ilk buraxılışı olacaqdır. Məzunlar ölkəmizdə turizm obyektlərində işlə təmin ediləcəklər.

ATİ-nin rektoru Cəfər Cəfərov bildirmişdir ki, turizm sənayesi ölkəmizdə inkişaf etməkdə olan sahədir. Son illər turizm infrastrukturu yaradılması sahəsində Bakıda və regionlarda böyük işlər görülür. Bu sahədə ixtisaslı kadrların yetişdirilməsi üçün əlimizdən gələni edirik. Rektor dünyanın bir sıra nüfuzlu ali təhsil ocaqları ilə əməkdaşlıq nəticəsində ATİ-də təhsilin səviyyəsinin xeyli yüksəldiyini xüsusi vurğulamışdır.

Tədbirdə turizm və rekreasiya ehtiyatlarının tədqiqinin nəzəri və praktiki əhəmiyyəti, milli turizmin müasir vəziyyəti, təhlükəsizlik məsələləri, inkişaf perspektivləri, ekoturizm və onun inkişaf problemləri müzakirə edilmişdir.

Üç bölmədə davam edən konfransda "Turizm təhsilində akreditasiya və keyfiyyət", "Heydər Əliyev və müstəqillik illərində turizm sahəsində beynəlxalq əməkdaşlığın genişlənməsi", "Azərbaycanda turizmin inkişafının tarixi mərhələləri", "Turizmdə xidmət keyfiyyətinin mahiyyəti və əhəmiyyəti" və digər mövzularda məruzələr dinlənilmişdir.

İnstitutun foyesində tələbələrin əl işlərindən ibarət sərgi təşkil edilmişdir.

AzərTAc

Azərbaycan.- 2009.- 20 dekabr.- S. 2.