Cabbarlışünaslığa dəyərli töhfə

Azərbaycan ədəbiyyatının XX əsr görkəmli nümayəndələrindən olan Cəfər Cabbarlının 110 illik yubiley tədbirləri çərçivəsində tanınmış tədqiqatçı-alim Asif Rüstəmlinin gərgin elmi axtarışlarının bəhrəsi olan "Cəfər Cabbarlı: Həyatı və mühiti" kitabının təqditmat mərasimi olmuşdur.

Kitabın elmi redaktoru akademik Bəkir Nəbiyevdir. Mərasim dramaturqun ev muzeyində keçirilmişdir. Tədbirə alimlər, araşdırıcılar, ali məktəb tələbələri, müəllimlər, mügənnilər, aktyorlar, ictimaiyyətin nümayəndələri, bir sözlə, cabbarlısevərlər toplaşmışdılar.

Muzeyin direktoru Gülarə Cabbarlı Cəfər Cabbarlı yubileyinin respublika miqyasında davam etdiyini və bugünkü mərasimin həmin silsilə tədbirlərdən olduğunu vurğuladı. Gülarə Cabbarlı atası haqqında yazılmış yeni kitabda ədibin ailəsinə indiyədək məlum olmayan müxtəlif yeni faktlar və sənədlərlə ilk dəfə tanış olduğunu bildirdi.

Məclisin aparıcısı, filologiya elmləri doktoru, professor Qəzənfər Paşayev tədqiqatçı-alim Asif Rüstəmlinin Cəfər Cabbarlı yaradıcılığı ilə bağlı qaranlıq məqamlara aydınlıq gətirərək müəllifin "Cəfər Cabbarlı: Həyatı və mühiti" əsərinin böyük dramaturqun müxtəlif illərdə yazdığı "Çırpınırdı Qara dəniz" (1992), "Tufanlardan keçən ömür" (1995), "Susmaz duyğuların səltənətində" (2002) və "Ədəbi istiqlalımız" (2004) kitablarından sonra ədəbi-ictimaiyyətlə beşinci görüşü olduğunu bildirdi.

AMEA-nın Nizami adına Ədəbiyyat İnstitutunun direktoru, akademik Bəkir Nəbiyev Cəfər Cabbarlının Azərbaycan ədəbiyyatında, Azərbaycan dramaturgiyası tarixində rolundan danışaraq qeyd etdi ki, Cəfər Cabbarlı Azərbaycan ədəbiyyatı tarixində barmaqla sayılası sənətkarlardandır. Əsl istedad sahibi, nadir ədəbi sima, böyük dramaturq, xalqına və vətəninə bağlı insan olan Cəfər Cabbarlının yaradıcılığı həyatın bütün dövrlərində aktualdır, həmişəyaşardır. Akademik daha sonra vurğuladı ki, sovet dönəmindən üzü bəri ədibin həyatı, yaradıcılığı, əsərlərindəki adlar və obrazlar qalereyası haqqında yazılan çoxsaylı tədqiqat əsərləri sırasında Asif Rüstəmlinin illərdən bəri üzərində işlədiyi "Cəfər Cabbarlı: Həyatı və mühiti" kitabı elmi yenilikləri və ədəbi tapıntıları ilə daha zəngindir, qiymətli və oxunaqlıdır.

Xalq artisti Məleykə Əsədova çıxış edərək Cəfər Cabbarlı dramaturgiyasına hələ orta məktəb illərindən vurğunluğundan söhbət açdı, böyük səhnəyə "Aydın" əsərindəki Gültəkin obrazı ilə gəldiyini fəxrlə vurğuladı.

Filologiya elmləri doktoru, professor Vaqif Arzumanlı, Azərbaycan Dövlət Mədəniyyət və İncəsənət Universitetinin kafedra müdiri, filologiya elmləri doktoru Gülşən Əliyeva, sənətşünaslıq fakültəsinin dekanı Vəfa Xanoğlan, professor Əzizağa Quliyev, "Xalq qəzeti"nin baş redaktor müavini, əməkdar jurnalist Tahir Aydınoğlu, şair Oqtay Rza, əməkdar artist Eyyub Yaqubov, AMEA-nın Nizami adına Ədəbiyyat İnstitutunun böyük elmi işçisi Xədicə Murad, Qarabag müharibəsinin iştirakçısı, polis mayoru Aida Şirin, Salman Mümtaz adına Azərbaycan Dövlət Ədəbiyyat və İncəsənət Arxivinin direktoru Maarif Teymur, "Zirvə" Ziyalılar İctimai Birliyinin sədri Minayə Dəyanətqızı və başqaları çıxış edərək kitabın məziyyətlərindən söz açdılar.

Azərbaycan ədəbiyyatının korifeylərindən olan Cəfər Cabbarlının anadan olmasının 110, vəfatının 75 illiyi ilə əlaqədar "Elm" nəşriyyatı tərəfindən nəfis tərtibatla çap olunmuş "Cəfər Cabbarlı: Həyatı və mühiti" kitabı əsasən ədəbiyyatşünaslar, tədqiqatçılar və geniş oxucu auditoriyası üçün nəzərdə tutulmuşdur.

Tədbirin sonunda tədqiqatçı-alim Asif Rüstəmli çıxış edərək yenə də ədibin bədii irsinin araşdırılması ilə ciddi məşğul olacağını bildirdi.

Rəhman SALMANLI

Azərbaycan.- 2009.- 24 dekabr.- S. 12.