Görkəmli xanəndə anıldı

Musiqimizin nadir səs sahiblərindən, təkrarolunmaz ifaçılarından biri olan unudulmaz xanəndə Mütəllim Mütəllimovun 110 illik yubileyidir. Bu münasibətlə Mədəniyyət və Turizm Nazirliyinin dəstəyi ilə Dövlət Muğam Teatrında təntənəli mərasim keçirildi.

Teatrın direktoru Arif Qazıyev sənətkarın həyat və yaradıcılığı barədə geniş söhbət açdı. Akademik Vasim Məmmədəliyev, xalq artistləri Arif Babayev, Habil Əliyev və Alim Qasımov M.Mütəllimovun sənəti ilə yanaşı, klassik Azərbaycan ədəbiyyatının da bilicisi olduğunu bildirdilər.

Qeyd olundu ki, görkəmli muğam ifaçısının yubileyinə həsr edilmiş tədbirin biri Ağcabədi rayonundakı Qarabağ Muğam Mərkəzində keçirilib.

Milli Məclisin deputatı Tahir Rzayev ustad sənətkarın muğam ifaçılığı sahəsində qazandığı uğurları yada saldı. Şair Ənvər Əhməd Qarabağın, o cümlədən Ağcabədinin Azərbaycana bəxş etdiyi layiqli övladlar sırasında Mütəllim Mütəllimovun xüsusi yeri olduğunu söylədi.

Digər çıxış edənlər də orijinal ifa tərzinə malik Mütəllim Mütəllimovun yüksək səhnə mədəniyyətindən, qeyri-adi səsindən söz açdılar və onun tarixə düşdüyünü vurğuladılar.

Teatrın solistləri sənətkarın repertuarına daxil olmuş muğam və təsniflərdən, xalq musiqimizdən, bəstəkar mahnılarından nümunələri ifa etdilər.

Sonda xanəndənin nəvəsi Mütəllim Mütəllimov tədbir iştirakçılarına və təşkilatçılara minnətdarlığını bildirdi.

Zəkurə QULİYEVA

Azərbaycan.- 2009.- 24 dekabr.- S. 12.