2008-2009-cu tədris ilində buraxılış imtahanları mərkəzləşdirilmiş qaydada keçiriləcək

Ölkəmizin ümumtəhsil sistemində tətbiq olunan mərkəzləşdirilmiş qaydada buraxılış imtahanları 2008-2009-cu tədris ilində bütün ölkəni əhatə edəcək.

Orta məktəblərin 11-ci sinifləri ilə yanaşı, peşə liseylərində də buraxılış imtahanları yeni qayda ilə keçiriləcək. Bununla bağlı fevral-aprel aylarında mərkəzləşdirilmiş qaydada bir yoxlama-sınaq imtahanının keçirilməsi nəzərdə tutulub. İmtahanların peşə liseylərində ayrıca, ümumtəhsil məktəblərində isə bölgələr üzrə mərhələlərlə keçirilməsi planlaşdırılır. Ölkə üzrə 5 bölgə - Bakı, Sumqayıt şəhərləri və Abşeron rayonu, şimal-qərb, qərb və cənub bölgələri müəyyənləşdirilib. İlk yoxlama imtahanı fevralın 22-də olacaq. Peşə liseyləri üçün 29 mərkəz yaradılıb. Onların 7-si Bakıda, 22-si isə ölkənin digər şəhər və rayonlarında yerləşir. Bölgələr üzrə sınaq imtahanlarına mart ayından başlanacaq. Bakı və Sumqayıt şəhərlərinin, Abşeron rayonu məktəblərinin bu sahədə 2 illik təcrübəsinin olması nəzərə alınaraq ilk imtahan martın 1-də məhz bu bölgə üzrə keçiriləcək. Sonra şimal bölgəsinə daxil olan rayonların ümumtəhsil məktəbləri imtahanlara qatılacaqlar.

Azərbaycan.-2009.-1 fevral.-S.4.