Sabahımıza böyük inamla
Tələbəliyimin ilk ili
- 2009-cu ilin birinci semestri arxada qaldı. Uğurlu saymaq olar.... Ən
əsası odur ki, bu ilk 4 ay ölkəmizdə təhsilə
dövlət qayğısı barədə təsəvvürlərimi
daha da zənginləşdirdi. 1919-cu ildə Xalq Cümhuriyyəti
dövründə yaranan Azərbaycanın ilk ali təhsil
ocağı, ulu öndərimiz Heydər Əliyevin də məzunu
olduğu Bakı Dövlət Universitetinin tələbəsi
olmağımla bir daha qürur duydum.
Bu il universitetimizin 90
yaşı tamam olur. Çox şadam ki, əlamətdar
yubiley mənim də tələbəlik illərimə təsadüf
edir...
Ötən illərdə
çoxlarının təhsil məbədi saydığı
Bakı Dövlət Universiteti böyük inkişaf yolu
keçib, uğurlar əldə edib. Bütün dövrlərdə
Azərbaycanın dövlət strukturlarında təmsil olunan
şəxslərin əksəriyyəti BDU-nu bitirib. Hazırda
təkcə parlament üzvlərinin əksəriyyəti bizim
universitetin məzunudur. Bu təhsil ocağını hər il
4 min tələbə bitirir. Bu faktın özü universitetin
ölkəmizin təhsil sistemindəki yerini və çəkisini
aydın göstərir. Bu mənada, Bakı Dövlət
Universitetinin yubileyi, həm də Azərbaycan elminin, Azərbaycan
təhsilinin böyük bayramıdır...
...2008-ci il universitetimizin həyatında
xüsusilə önəmli oldu. Sentyabrın 15-i, ilk dərs
günündə möhtərəm Prezident İlham Əliyev
və təhsilimizin hamisi, Heydər Əliyev Fondunun prezidenti,
Milli Məclisin deputatı Mehriban xanım Əliyeva Bakı
Dövlət Universitetinə gəldilər. Yeni tədris
korpusunu açan dövlət başçısı müəllim
və tələbələr qarşısında
çıxış etdi, universitetin perspektivi, inkişafı
ilə bağlı tövsiyələrini verdi. Unudulmaz bir
gün idi. Universitetin, eləcə də biz gənclərin həyatında
əlamətdar hadisə idi. Bu, biz gənclər
üçün həm də dövlət
başçısı ilə ilk görüş idi.
Prezidentimizin bir fikrini heç vaxt unutmayacağam: "...Gənclər,
tələbələr, yaxud da məktəblərdə oxuyan
uşaqlar, çalışan müəllimlər
yaxşı şəraitdə yaşamalıdırlar,
oxumalıdırlar, işləməlidirlər." Daha sonra
Prezident İlham Əliyev belə dedi: "Azərbaycan
çox zəngin ölkədir. Bizim böyük təbii
resurslarımız var. Ancaq bizim ən böyük resursumuz
insanlarımızın biliyidir, savadıdır. Biz öz
imkanlarımızdan səmərəli istifadə edərək
maddi kapitalı insan kapitalına çevirməliyik və bunu
edirik. ....Azərbaycanın uzunmüddətli, dayanıqlı
inkişafı üçün mütləq bütün sahələrdə
çox güclü peşəkar mütəxəssislər
olmalıdır". Prezidentin universitetdəki
çıxışı elm və təhsilin dövlət
üçün prioritet olmasını bir daha ortaya qoydu. Bu
diqqət, əslində Azərbaycanın sabahına qoyulan sərmayədir...
Yeri gəlmişkən... Az
sonra tale məni ikinci dəfə möhtərəm Prezidentlə
qarşılaşdırdı. Oktyabrın 9-da universitetdən
çıxıb eskalatorla metronun "Elmlər
Akademiyası" stansiyasına enirdim. Həmin gün
paytaxtımızda yeni metro stansiyasının - "Nəsimi"
stansiyasının açılışı olmuşdu. Qəflətən
digər eskalatorda ölkəmizin rəhbəri Prezident
İlham Əliyevi gördüm. İlk anda çaşsam da,
özümü ələ alıb dövlət
başçısına qürurla salam verdim. Adəti üzrə
gülümsər çöhrəsi ilə mənim və ətrafdakıların
salamını aldı. Bunu da xatırlatmaqda məqsədim
var. Dövlət başçısı təkcə təhsil
yox, ölkə həyatının bütün sahələrinin
qayğısını çəkir, sadə insanların
arasında olmağa da vaxt tapır. Bu, Onun
böyüklüyüdür. Ulu öndər Heydər Əliyev
də belə idi... Çox arzu edirəm ki, Prezidentlə
üçüncü görüşüm Qarabağda olsun -
ulu babalarımın, ata-anamın doğma yurdu olan
Qarabağda!...
Bu gün universitetimizdə
16 fakültədə 18 min tələbə təhsil alır.
Bu böyük ailənin bir övladı da mənəm.
Sözümün bu yerində bir məqamı
xatırladım. Dekabrın soyuq bir günü idi. Qış
imtahan sessiyasına lap az qalırdı. Tələbə
yoldaşlarımla universitet yeməkxanasında çay süfrəsi
arxasında imtahana hazırlaşır, sualları müzakirə
edirdik. Bu vaxt dəhlizdən keçən rektor, akademik Abel Məhərrəmov
bizə yaxınlaşdı. Bizim müzakirəmizə biganə
qalmamışdı. Nə etməyimizlə maraqlandı. Dedik
ki, imtahana hazırlaşırıq. Üzünə xoş təbəssüm
qondu, sevindi, "Çox gözəl!" dedi....
Ertəsi gün Dünya Azərbaycanlılarının
həmrəyliyi günü və "İlin tələbəsi"
müsabiqəsi qaliblərinin təltif olunması münasibətilə
keçirilən tədbirdə çıxış edən
rektor Abel Məhərrəmov həmin hadisəni
xatırlayaraq bizi auditoriyaya nümunə göstərdi.
"Çox sevindim, Moskvada təhsil alarkən biz də
imtahanlara o cür qaynarlıqla hazırlaşardıq. Deməli,
bu gün də tələbələrimizdə öyrənməyə
maraq güclüdür", - dedi. Rektorumuzun bu diqqətindən
çox fərəhləndik. Qeyd edim ki, neçə ildir, universitetdə
"İlin tələbəsi" müsabiqəsi
keçirilir, Dünya Azərbaycanlılarının həmrəylik
günü ərəfəsində müsabiqəyə yekun
vurulur. Budəfəki müsabiqədə 16 fakültədən
64 tələbə qalib siyahısında idi. Ən
maraqlısı isə odur ki, "İlin tələbəsi"ni
elə tələbə yoldaşları seçir, burada tədris
göstəriciləri ilə yanaşı, elmi uğurlar,
ictimai işlərdəki fəaliyyət də nəzərə
alınır. Bu, kompleks yanaşmadır. Həmin tədbirdə
rektorumuz onu da tövsiyə etdi ki, gələn ildən hər
fakültə və kurs üzrə bir nəfər yox, iki nəfər
qalib seçilsin....
Babamın 90 yaşı var,
çox dünyagörmüş insandır. Erməni
işğalı babamı yurdundan didərgin salıb. Bizə
elə hey Laçından, Ağdamdan, Şuşadan
danışır. Babamla tez-tez, elə onun özü
demiş, "dünyanın gərdişi" barədə
söhbət edirik. O deyir ki, xalqına güvənən,
xalqını sevən dövlət rəhbərləri
heç vaxt uduzmur, xalqın gözü də, sözü də
onu ucaldır. Xalq sınaqdan çıxardığı liderə
arxalanır, çünki ötən 5 ildə dövlət
başçısının gördüyü işlərin
şahididir. O deyir ki, cənab İlham Əliyevin 5 illik
prezidentliyi dövründə ən böyük xidmətlərindən
biri də çadır şəhərciklərini Azərbaycan
tarixindən silməsi idi. Onun məcburi köçkünlərə
diqqəti əvəzolunmazdır. Bu qayğı kövrək,
həssas insan olan məcburi köçkünlərə təsəllidir.
Babam çadır düşərgələrində
insanların ağır vəziyyətini gözləri ilə
görüb. Deyir, hərdən elə sarsılmışam
ki, xəlvətə çəkilib xısın-xısın
ağlamışam. Xatırlayırsınızmı, ulu
öndərimiz Heydər Əliyev Biləsuvarda çadır
düşərgələrində bir məcburi
köçkünün ailəsində gördüyü mənzərədən
necə sarsılmışdı! Böyük şəxsiyyət,
dəyanətli insan qarşılaşdığı mənzərə
önündə keçirdiyi sarsıntını gizlədə
bilməmişdi... Ümummilli liderimiz məcburi
köçkünlərin həyatının
yaxşılaşdırılması üçün
çox tədbirlər gördü. Dövlət
başçısı İlham Əliyev bu işi də
yarımçıq qoymadı. Acınacaqlı görkəmi
ilə insanı sarsıdan çadır düşərgələrini
indi gözoxşayan müasir, abad, yaraşıqlı,
bütün şəraiti olan yeni qəsəbələr əvəz
edib. Bu qəsəbələrdə məcburi
köçkünlər firavan, rahat yaşayır.
İnanırıq ki, məcburi köçkünləri
müasir qəsəbələrdə isti ocaq başına
yığan Prezident onların öz torpaqlarına
qayıtmalarına da nail oacaq. Azərbaycan xalqının
İlham Əliyevə, İlham Əliyevin isə xalqa olan
inamı ölkəmizin gələcəyini daha firavan və təhlükəsiz
edəcək. Babam belə deyir...
Xoşbəxtəm ki,
artıq mənim də səs vermək, seçmək
hüququm var. 18 yaşım ötən ilin oktyabrında,
ölkəmizdə keçirilən prezident seçkilərinə
11 gün qalmış tamam oldu. Seçki gününü
unutmuram, həmin günün sevinci və həyəcanı həmişə
mənimlə olacaq. İlk dəfə seçkilərdə
iştirak edirdim. Seçimimi isə çoxdan etmişdim: CƏNAB
İLHAM ƏLİYEV. Bu, əksəriyyətin seçimi idi
- düz 3 232 259 nəfərin. Bu, hər kəsin - istər
müəllim, istər tələbə, istərsə də
sadə Azərbaycan vətəndaşının cənab
İlham Əliyevin 2003-2008-ci illərdəki ilk Prezidentliyi
dövrünə verdiyi qiymət idi. Bu səs Azərbaycanın
sabit inkişafına, tərəqqisinə bəslənən
ümid və inamın səsi idi. İndi də fəxr edirəm
ki, bu səsin biri mənimdir. Bu qələbə, əslində,
xalqımızın qələbəsi idi. Hər kəs
özünün etibarlı sabahına səs verdiyinin fərqində
idi....
Prezident seçkiləri
öncəsi və seçkilərdən sonra cənab
İlham Əliyevə məktub göndərdim. Özü də
birbaşa dövlət başçısının elektron
poçtuna. Bu, həm də bizim demokratik bir ölkədə
yaşamağımıza dəlalət edir. Belə
olmasaydı, dövlət başçısının elektron
poçtuna məktub yaza bilməzdim ki...
Ölkəmizdəki sabitlik,
tərəqqi, yeniləşmə, müasirləşmə,
insanların həyatının yaxşılaşması bir vətəndaş
kimi məni çox qürurlandırır. İndi Azərbaycan
iqtisadi göstəriciləri, siyasi nüfuzu, mədəni
potensialına görə dünyanın ən nüfuzlu
ölkələrindən biridir.
....Azərbaycan
hamımızın Vətənidir. İndi ölkəmiz
Qafqazın lider dövlətinə çevrilib. Hər
baxımdan sürətlə inkişaf edir. Gəncliyin
nümayəndəsi kimi öz ölkəmlə fəxr edirəm.
Ümummilli liderimizin
yaratdığı gənclər siyasəti bu gün etibarla
qorunur. Heydər Əliyevin yaradıcısı olduğu YAP
üzvlərinin 190 mini gəncdir. Biz gənclər dövlətimizin
hərtərəfli dəstəyini öz üzərimizdə
hiss edirik. Bu dəstək təmsil olunduğum Gənclər
Parlamenti üzvlərinin fəallığını daha da
artırır. Ölkəmizdə minlərlə gənc lider
yetişib. Üzvü olduğum Gənclər Parlamentində
belələri onlarladır. Azərbaycanı sevən, ona
bağlı olan, milli-mənəvi dəyərləri və
müasirliyi özündə birləşdirən bu gənclər
Azərbaycan naminə hər bir fədakarlığa
hazırdırlar. Biz özümüzü Vətənimizin və
Prezidentin sədaqətli əsgərləri hesab edirik. Bilikləri
mənimsəmək və Azərbaycanın inkişafına
öz töhfəmizi vermək - amalımız budur. Təhsilimizə
və ictimai fəallığımıza yaradılan şərait
sabahımıza daha inamla baxmağa əsas verir. "Hər
bir xalqın, hər bir millətin, hər bir ölkənin gəncləri
onun həm bu günüdür, həm də sabahıdır,
ümididir" - ulu öndər Heydər Əliyevin bu fikri
biz gəncləri Azərbaycanın sabahı naminə səfərbər
edir....
2 fevral Gənclər
Günüdür. Bu il Azərbaycan gəncləri 12-ci dəfədir
ki, Gənclər Gününü qeyd edir. Bu bayram da biz gənclərə
ulu öndər Heydər Əliyevin yadigarıdır. Həm də
müdrik dövlət xadiminin gənclərə verdiyi qiymətdir.
Onların sabahına olan ümidi, inamıdır. "XXI əsr
Azərbaycanda gənclərin müstəqil dövlətimizi
qurub-yaratmaq və inkişaf etdirmək dövrüdür"
deyən ümummilli liderin gəncliyə və gənclərə
olan bu etimadı bu gün öz təsdiqini tapmaqdadır. Biz
Heydər Əliyevin ideyalarına sadiqliyimizi, Azərbaycan və
onun sabahı naminə həmrəy olduğumuzu gəncliyə
böyük dəyər verən və hərtərəfli fəaliyyətimiz
üçün geniş meydan açan Prezident İlham Əliyevin
ətrafında sıx birləşməklə, əla təhsilimiz
və əməli işimizlə sübut etməliyik....
Sitarə Cabbarlı
BDU-nun biologiya
fakültəsinin birinci kurs tələbəsi, Gənclər
Parlamentinin üzvü
Azərbaycan.-2009.-1 fevral.-S.5.