Azərbaycan əsgəri torpaqlarımızı erməni işğalından azad etməyə hazırdır

Milli Məclisin deputatları Həvva Məmmədova, Aydın Həsənov, Baba Tağıyev, Rövşən Rzayev, Fuad Məmmədov, eləcə də Parlament Jurnalistlər Birliyinin bir qrup üzvü yanvarın 31-də Xocavənd rayonunda Azərbaycan Ordusunun N saylı hərbi hissəsində olmuş, əsgər və zabitlərlə görüşmüşlər.

Deputatlar H.Məmmədova, A.Həsənov, B.Tağıyev, Xocavənd Rayon İcra Hakimiyyətinin başçısı Eyvaz Hüseynov və başqaları hərbi hissənin şəxsi heyəti qarşısında çıxış etmiş, ordu quruculuğu sahəsində görülən işlərdən, həyata keçirilən islahatlardan danışmışlar. Bildirilmişdir ki, Azərbaycanın sürətli iqtisadi inkişafı ordumuzun maddi-texniki bazasının möhkəmləndirilməsinə geniş imkanlar yaradır. Dövlət büdcəsindən müdafiə sahəsinə ayrılan vəsaitin məbləği ilbəil artırılır. Ölkəmizin iqtisadi inkişafı hərbi qulluqçuların sosial problemlərinin həllini də sürətləndirir.

Hərbi hissənin zabitləri, eləcə də əsgərlər onlara göstərilən diqqət və qayğıya görə minnətdarlıq etmiş, Prezident, Ali Baş Komandan İlham Əliyevin əmri ilə torpaqlarımızı erməni işğalından azad etməyə hər zaman hazır olduqlarını bildirmişlər. Sonra əsgərlərə hədiyyələr təqdim olunmuşdur.

Deputatlar və jurnalistlər Xocavənd rayonu ərazisində yeni inşa olunmuş şəhərciyə gəlmiş, məcburi köçkünlərin vəziyyəti ilə maraqlanmışlar. Xocavəndlilər Azərbaycan Prezidentinin tapşırığı ilə burada tez bir zamanda tikilərək istifadəyə verilmiş evlərdə özlərini rahat hiss etdiklərini bildirmiş, göstərilən diqqət və qayğıya görə dövlətimizin başçısına minnətdarlıq etmişlər.

AzərTAc

Azərbaycan.-2009.-3 fevral.-S.3.