Bakıda Azərbaycan və Belarus işgüzar dairələrinin biznes-forumu işə başlamışdır

Azərbaycan və Belarus respublikaları Ticarət və Sənaye palatalarının təşkilatçılığı ilə fevralın 3-də Bakıda, "Caspian" qonaq evində iki ölkənin işgüzar dairələrinin biznes-forumu öz işinə başlamışdır.

Azərbaycan Respublikası Ticarət və Sənaye Palatasının birinci vitse-prezidenti Niyaz Əlizadə tədbirin ölkələrimiz arasında iqtisadi əməkdaşlığın daha da genişlənməsinə, xalqlarımızın dostluq əlaqələrinin inkişafına yeni təkan verəcəyinə əmin olduğunu bildirmişdir.

Belarus Respublikası Ticarət və Sənaye Palatası sədrinin birinci müavini Nikolay Saxar təmsil etdiyi ölkənin işgüzar dairələri nümayəndələrinin Bakıya səfərinin məqsədi barədə məlumat vermişdir. Bildirmişdir ki, bu gün iqtisadi inkişaf sürətinə görə nəinki regionun, hətta dünyanın lider dövlətlərindən biri olan Azərbaycanın istehsal müəssisələri və biznes dairələri ilə əlaqələri genişləndirmək Belarus üçün mühüm əhəmiyyət kəsb edir. N.Saxar bugünkü görüşdə Belarusun bütün regionlarını əhatə edən, strateji əhəmiyyətli məhsul istehsalı ilə məşğul olan 11 ən iri müəssisəsinin rəhbər işçilər səviyyəsində təmsil olunduğunu diqqətə çatdırmışdır.

Belarusun Bakıdakı səfiri Nikolay Pastkeviç ölkəsinin nəhəng istehsal müəssisələri və biznes strukturlarının rəhbər vəzifəli nümayəndələrinin yeni ildə ilk işgüzar səfərini Azərbaycana reallaşdırmalarının təsadüfi hadisə olmadığını diqqətə çatdırmışdır. Səfir demişdir ki, əsasını Azərbaycan xalqının ümummilli lideri Heydər Əliyevin qoyduğu və Prezident İlham Əliyev tərəfindən müasir şəraitə uyğun uğurla davam etdirilən strateji xətt ölkə iqtisadiyyatını sürətli inkişaf yoluna çıxarmışdır. Bu inkişaf, Azərbaycan bazarının bütün dünyanın üzünə açıq olması Belarusun işgüzar dairələrinin diqqətini cəlb etməyə bilməzdi.

Ölkələrimiz arasında əməkdaşlığın getdikcə möhkəmləndiyini bildirən diplomat, münasibətlərin dərinləşməsində Azərbaycan və Belarus prezidentləri İlham Əliyev və Aleksandr Lukaşenkonun qarşılıqlı səfərlərinin mühüm əhəmiyyətini vurğulamış, forumun əlaqələrin inkişafına təkan verəcəyinə əmin olduğunu bildirmişdir.

Sonra Azərbaycan və Belarus müəssisələri nümayəndələrinin ikitərəfli görüşləri olmuşdur.

Günün ikinci yarısında belaruslu qonaqlar Azərbaycan paytaxtının görməli yerlərinə baxmışlar.

Fevralın 4-də biznes-forum öz işini davam etdirəcəkdir. Həmin gün Belarusun işgüzar dairələrinin təmsilçiləri Bakının istehsal müəssisələrində olacaq, daha sonra isə tərəflər arasında fərdi proqram çərçivəsindəgörüşlər davam etdiriləcəkdir.

AzərTAc

Azərbaycan.-2009.-4 fevral.-S.5.