Polşanın xarici işlər nazirinin müavini Milli Məclisdə olmuşdur

Milli Məclisin mətbuat xidmətindən bildirmişlər ki, dövlətlərimiz və parlamentlərimiz arasında münasibətlərin inkişafında belə səfərlərin xüsusi əhəmiyyəti olduğunu bildirən Valeh Ələsgərov əməkdaşlığımızın daha da genişləndirilməsinin vacibliyini vurğulamışdır. V.Ələsgərov Milli Məclisin strukturu, fəaliyyəti, beynəlxalq əlaqələri, ölkəmizdə həyata keçirilən iqtisadi islahatlar, neft strategiyası, Ermənistan-Azərbaycan, Dağlıq Qarabağ münaqişəsi ilə bağlı mövcud vəziyyət və digər məsələlər barədə qonaqlara ətraflı məlumat vermişdir. Azərbaycan ilə Polşa arasında münasibətlərin inkişafı üçün böyük potensialın mövcud olduğu və bu sahəyə parlamentlərin mühüm töhfələr verə biləcəyi diqqətə çatdırılmışdır.

Anjey Kremer ölkəmizin onda xoş təəssürat yaratdığını və burada gedən inkişafdan məmnun qaldığını bildirmişdir. Qonaq Ermənistan- Azərbaycan, Dağlıq Qarabağ münaqişəsində Polşanın Azərbaycanın ərazi bütövlüyünü dəstəklədiyini diqqətə çatdırmışdır.

Sonra görüşdə Avropa enerji təhlükəsizliyi prosesində Azərbaycanın rolu, ölkəmizin təşəbbüskarı və iştirakçısı olduğu qlobal miqyaslı neft və qaz layihələri, əlaqələrimizin inkişaf perspektivləri barədə geniş söhbət açılmış, qarşılıqlı maraq doğuran məsələlər barəsində fikir mübadiləsi aparılmışdır.

Milli Məclisin

mətbuat xidməti

Azərbaycan.-2009.-5 fevral.-S.2.