Boris KLİMÇUK: "Əgər Azərbaycan Nabukko layihəsində iştirak edərsə, biz strateji tərəfdaş kimi onu dəstəkləyəcəyik"

Fevralın 4-də Ukraynanın Azərbaycandakı səfiri Boris Klimçuk Azərbaycan Xarici İşlər Nazirliyində bir sıra görüşlər keçirmişdir.

Diplomat bildirmişdir ki, həmin görüşlərdə cari il üçün işlərin reqlamenti müzakirə edilmiş, bir sıra tədbirlər nəzərdə tutulmuşdur.

Səfir bildirmişdir ki, bu il iqtisadi məsələlər Azərbaycan və Ukraynanın ikitərəfli münasibətlərində əsas prioritetlərdən biri olacaqdır. Mənafelərimizin uyğunlaşdırılması, beynəlxalq təşkilatlarda hər iki ölkənin müştərək maraqlarının müdafiə edilməsi məsələləri də az əhəmiyyət kəsb etmir.

Nabukko layihəsinə Ukraynanın münasibəti barədə suala səfir belə cavab vermişdir: "Ukrayna Nabukko layihəsini hələ keçən il dəstəkləmişdir. Biz bu gün də həmin layihəni dəstəkləyirik. Axı qaz kəmərlərinin sayının çox olması qazın real qiymətini müəyyən etməyə imkan verir. Bu baxımdan, həmin layihə bizim üçün maraqlıdır. Ona görə ki, istər Nabukko olsun, istər "Şimal axını", Ukrayna hər iki halda Rusiya qazının Avropaya nəql edildiyi ən iri ərazi olaraq qalır. Nabukko da bizim üçün maraqlıdır, çünki biz həmin layihə üçün müxtəlif diametrli boruların bütün növlərini təklif edirik. Ukrayna boru istehsalçısı kimi bütün dünyada tanınmışdır. Bu borular Azərbaycanda indi də satılır və ola bilsin ki, Nabukko layihəsi üçün də satılacaqdır. Ən başlıcası, əgər Azərbaycan Nabukko layihəsində iştirak edərsə, biz strateji tərəfdaş kimi onu dəstəkləyəcəyik. Axı əslində strateji tərəfdaşlıq elə bir-birini dəstəkləmək deməkdir".

AzərTAc

Azərbaycan.-2009.-5 fevral.-S.2.