Nikolay PASTKEVİÇ: Azərbaycan-Belarus münasibətləri daha fəal inkişaf mərhələsinə qədəm qoymuşdur

Belarus Azərbaycan ilə ikitərəfli münasibətlərin inkişafına böyük əhəmiyyət verir.

Bu sözləri Belarusun Azərbaycandakı səfiri Nikolay Pastkeviç demişdir.

Səfir Belarus Ticarət-Sənaye Palatası sədrinin birinci müavini Nikolay Saxarın başçılığı ilə bu ölkənin iş adamlarından ibarət nümayəndə heyətinin Azərbaycana səfəri ilə əlaqədar fevralın 4-də keçirilən mətbuat konfransında demişdir: "Son illər münasibətlərimiz yeni, daha fəal inkişaf səviyyəsinə yüksəlmişdir".

Diplomatın sözlərinə görə, Azərbaycanla Belarus arasında əməkdaşlığın 50-dən çox dövlətlərarası razılaşmaya əsaslanan yaxşı bazası vardır.

N.Pastkeviç demişdir: "2006-2007-ci illərdə Azərbaycan Prezidenti İlham Əliyevin Minskə və Belarus Prezidenti Aleksandr Lukaşenkonun Bakıya qarşılıqlı səfərləri olmuşdur. Həmin səfərlər zamanı çoxsaylı ikitərəfli sənəd imzalanmışdır. Onların arasında 2015-ci ilədək olan dövrdə ticarət-iqtisadi əməkdaşlıq haqqında saziş və iki dövlət arasında dostluq və əməkdaşlıq haqqında müqavilə xüsusi əhəmiyyət kəsb edir".

Səfir bildirmişdir ki, turizm sahəsinə xüsusi diqqət yetirmək lazımdır. Turizm şirkətləri hələlik bu istiqamətdə əməkdaşlığın inkişafına kifayət qədər əhəmiyyət yetirmirlər. Diplomat mədəniyyət sahəsində münasibətlərin inkişafını müsbət səciyyələndirərək xatırlatmışdır ki, ötən il Azərbaycanda Belarus mədəniyyəti günləri keçirilmişdir. N.Pastkeviç demişdir: "Siyasi baxımdan dövlətlərimiz arasında heç bir fikir ayrılığı yoxdur. Biz bu istiqamətdə fəaliyyətimizi daim əlaqələndiririk, beynəlxalq təşkilatlar çərçivəsində fəal əməkdaşlıq edirik". Səfirin sözlərinə görə, Azərbaycan və Belarus hökumətləri çoxşaxəli siyasət yeridirlər, mehriban qonşuluq münasibətlərinin inkişafına tərəfdardırlar.

AzərTAc

Azərbaycan.-2009.-5 fevral.-S.2.